1 Kolinda 13 - KNTP

Butemwe

¹ Nangwa ng'amba na njimi ya bantu ne ya bamalaika, umvwe ne kwikala na butemwe ne, naaluka pamo nobe kuvuma kwa kyela kya lubemba nangwa kuvuma kwa ngengele.

² Kabiji nangwa nji na bungauzhi ne kuyuka byafyamika byonse, ne maana onse, kabiji nangwa nji na lwitabilo lonse lwa kutuntulula mitumba, umvwe ne kwikala na butemwe ne, abyo ne watu.

³ Nangwa mpane bintu byami byonse byonji naabyo, ne kupana mubiji wami namba asokwe, umvwe ne kwikala na butemwe ne, kechi mmwenamo kintu ne.

⁴ Butemwe butekanyatu kasa buba lusa, butemwe kechi buba kichima ne, nangwa kwitota ne, kechi bwilundumika ne;

⁵ nangwa kwitota ne, kechi bwikebela bintu ne, kechi buzhingila ne, nangwa kutaako muchima pa kubiwa byatama ne,

⁶ kechi busekela mu byabula koloka ne, kana na bya bukine.

⁷ Butemwe busenda byonse kasa bwazhindama, kabiji bwitaba byonse, buketekela byonse, kabiji butekanya mu byonse.

⁸ Butemwe kechi bupwa ne. Pakuba bya bungauzhi bikapita, ne njimi nayo ikapwa, ne maana nao akapita.

⁹ Mambo kuyuka kwetu kwa kibese kimo, ne kwaula kwetu nako kwa kibese kimo;

¹⁰ bino akya kyapwijijika byo kikafika akya kya kibese kimo, kikapita.

¹¹ Byo nakijinga mwanyike, na ambilenga bya bwanyike, kabiji nalangulukilenga bya bwanyike ne kutwala milanguluko mu bya bwanyike, pakuba pano byo nakoma ke mukulumpe, nebileka bya bwanyike.

¹² Mambo pa kino kimye tumona nobe kinzhimwenzhimwe nobe mu katajilo, pakuba mu kyokya kimye tukatalang'ana naabyo kilungi ne kilungi. Pa kino kimye nayukako bimo bicheche, pakuba mu kyokya kimye nkayukisha bulongo byonka byo nayukanyikwa kwi aye Lesa.

¹³ Pakuba bino bisatu, lwitabilo ne luketekelo ne butemwe, byaikajikwa, kabiji kikatampe kya mu bino bisatu, bo butemwe.