1 Kolinda 12 - KNTP

Bya bupe bya Mupashi wa Wazhila

¹ Balongo bami, mwayila bya bupe bya bumupashi kechi nasaka namba mulube ne.

² Anweba mwayuka amba, byo mwajinga Bangentila, mwatwajilwe mungi mu kupopwela bankishi babula kwamba.

³ Onkao mambo nasaka muyuke amba, kafwako muntu wamba na Mupashi wa Lesa amba, “Yesu wafingwa mafingo ne,” Kabiji kafwako wakonsha kwamba amba, “Yesu ye Nkambo” ne, poso na Mupashi wa Wazhila.

⁴ Kuji misango yavula ya bya bupe, bino Mupashi umo.

⁵ Kabiji kuji misango ne misango ya mingilo ya kwibengijila bakwabo, pakuba Nkambo ye umo.

⁶ Kabiji kuji misango yavula ya mingilo, bino ye Lesa umo yenka ye wingila byonse mu bonse.

⁷ Muntu yense wapewa kya bupe kya Mupashi na mambo a kwibashukisha bantu bonse.

⁸ Mambo umo bamupa byambo bya milangwe kwi aye Mupashi, kabiji yenka Mupashi umo wapana maana ku muntu mukwabo.

⁹ Mukwabo bamupa lwitabilo kwi aye Mupashi, ne mukwabo naye bamupa bya bupe bya kubuka bikola kwi aye yenka Mupashi.

¹⁰ Kabiji mukwabo bamupa kya kwingila mingilo ya bulume, ne mukwabo naye bamupa bungauzhi, ne mukwabo naye bamupa kya kuyuka mipashi, mukwabo naye bamupa misango ne misango ya njimi, kabiji mukwabo naye bamupa kya kulumbulula njimi.

¹¹ Mambo bino byonse bingila yenka Mupashi umo ye wibabenya pa muntu pa muntu monka mo aswila mwine.

Mubiji umo bino uji na bibese byavula

¹² Byonka byo aji mubiji umo, bino uji na bibese bya mubiji byavula; kabiji ne bya mubiji byonse nangwa byavula ye mubiji umo, byo biji ne Kilishitu.

¹³ Ne atweba bonse twabatizhilwe ku Mupashi umo mu mubiji umo, nangwa twi Bayudea, nangwa twi Bagiliki, nangwa twi bazha, nangwa twi baana ba bene, bonse twapewa kutoma ku yenka Mupashi umo.

¹⁴ Pakuba mubiji kechi ujitu na kya mubiji kimotu ne, uji na byavula.

¹⁵ Umvwe kuulu kwa amba amba, “Amiwa byo nabula kwikala kuboko, kechi ne kibese kya mubiji ne” nanchi kuulu kwabula kwa mubiji nyi?

¹⁶ Kabiji kutwi kwa amba amba, “Byo nabula kwikala jiso, kechi ne kibese kya mubiji ne” Nanchi kwabula kwa mubiji nyi?

¹⁷ Umvwe mubiji yense wajinga jiso, inge kumvwa kuji pi? Umvwe mubiji yense wajinga kutwi, inge bwema bebumvwina pi?

¹⁸ Pakuba aye Lesa wabiika bibese bya mubiji, aki pakyo, aki pakyo, monka mwaswila muchima wanji.

¹⁹ Umvwe bibese byonse byajingatu kya mubiji kimo inge mubiji uji pi?

²⁰ Pakuba bibese bya mubiji nangwa byavula, bino mubiji ye umo.

²¹ Mambo jiso kechi jakonsha kwambila kuboko amba, “Kechi nakusaka obewa ne!” Kabiji nangwa mutwe na maulu amba, “Kechi nemusaka ne!”

²² Ine kine, bibese bya mubiji byamweka amba byanekena, byo bine byafwainwa.

²³ Kabiji ne abya bibese bya mubiji byo tulanguluka namba byabula kushing'ama, byo bine byotuvwika na buneme bwakila, ne bya mibiji yetu byabula buuya twibivwika na bya buneme,

²⁴ pakuba bya mibiji yetu bya buuya, kechi biji nabyo bisaka ne. Pakuba Lesa mwine ye wanungankenye ne kwesakanya bulongo mubiji, ne kupana buneme bwakila ku abya byabujilwe buneme.

²⁵ Amba mu mubiji kechi mwikale kwiabanya ne, poso amba bya mubiji byonse bilame bine pamo.

²⁶ Kabiji umvwe kibese kya mubiji kimo kyatumbijikwa, byonse bya mubiji bisekela pamo.

²⁷ Anweba mwi bya mubiji wa Kilishitu, ne bonse pa muntu pa muntu mwi bya mubiji wanji.

²⁸ Kabiji aye Lesa watongwele mu kipwilo batanshi batumwa, ba bubiji bangauzhi, ba busatu bafunjishi, kabiji ke bamingilo ya bulume, kabiji ke ba bya bupe bya kubuka bikola, kabiji ne ba bukwasho, kabiji ke bamaana a kulama bantu, ne bamba misango ne misango ya njimi.

²⁹ Nanchi bonse bo batumwa nyi? Bonse bo bangauzhi nyi? Bonse bo bafunjishi nyi? Bonse bo bakwingila mingilo ya bulume nyi?

³⁰ Nanchi bonse baji na bya bupe bya kubuka bikola nyi? Bonse bamba na njimi nyi? Bonse balumbulula njimi nyi?

³¹ Bino sakishai bya bupe byakila. Pano nemubule jishinda jakila mu kuwama.