1 Kolinda 11 - KNTP

¹ Ikalai ba kundondela, pamo byonka byo ndondela Kilishitu amiwa.

Kuvweta ku mutwe mu kipwilo

² Pano nemutota anweba byo mumvuluka amiwa, ne byo mubena kulondela mafunjisho o nemufunjishe anweba.

³ Bino nasaka namba muyuke amba, Kilishitu ye mutwe wa banabalume bonse, kabiji mwanamulume ye mutwe wa mukazhanji, ne Lesa ye mutwe wa Kilishitu.

⁴ Mwanamulume ulomba nangwa kwaula kasa avwala ku mutwe wanji, wapelula mutwe wanji.

⁵ Bino mwanamukazhi ulomba nangwa kwaula kasa abula kuvwala ku mutwe, wapelula mutwe wanji; mambo kiji pamo nobe wa kuyulwa mutwe.

⁶ Kabiji umvwe mwanamukazhi wabula kuvwala ku mutwe, kyawama atendwe. Bino byo kiji kya bumvu mwanamukazhi kutendwa nangwa ku kuyula mutwe, nanchi avwaleko.

⁷ Pakuba mwanamulume kechi kyamufwainwa kuvwala ku mutwe ne mambo aye ye kipasha kya Lesa, ye lukumo lwa Lesa. Bino mwanamukazhi ye lukumo lwa mwanamulume.

⁸ Mambo mwanamulume kechi wafumine ku mwanamukazhi ne, bino mwanamukazhi ye wafumine ku mwanamulume.

⁹ Kabiji mwanamulume kechi walengejilwe mwanamukazhi ne, kana mwanamukazhi ye walengejilwe mwanamulume.

¹⁰ Mwanamukazhi wafwainwa kuvwala ku mutwe wanji kayukilo ka luusa lwa mwata wanji, mambo a bamalaika.

¹¹ Nangwa byonkabyo mu bwikalo bwetu mwi Nkambo, mwanamukazhi kechi bamwabanya na mwanamulume ne, ne mwanamulume naye kechi bamwabanya na mwanamukazhi ne.

¹² Mambo mwanamukazhi bamufumishe ku mwanamulume, ne mwanamulume usemwa ku mwanamukazhi, bino byonse byafuma kwi Lesa.

¹³ Langulukai anweba bene kana kyafwainwa mwanamukazhi kulomba kwi Lesa kwakubula kuvwala ku mutwe nyi?

¹⁴ Lelo nanchi kechi kya bumvu mwanamulume kwikala na nsuki yalepa kwi aye mwine nenyi?

¹⁵ Pakuba mwanamukazhi umvwe uji na nsuki yalepa, lo lukumo lwanji, mambo bamupele nsuki amba ikale ya kuzhika mutwe wanji.

¹⁶ Kabiji umvwe muntu wasaka mapata pa ano mambo, atweba pamo ne bipwilo bya Lesa kechi tuji na kisela kya byonkabyo ne.

Kijiilo kya Nkambo

¹⁷ Kabiji pa kwimupa mafuunde mu byo nsakwimwambila, kechi nemutota ne, mambo mu kupwila kwenu kechi mubena kuuba byawama ne, mubena kwitamisha.

¹⁸ Mambo kitanshi naumvwa amba, byo mupwila mu kipwilo muji mapata mwi anweba, kino ne amiwa nekiitaba pacheche.

¹⁹ Mambo byo kyafwainwa amba ne mepatulo nao ekale mwi anweba, amba balumbuluka basoloke mwi anweba.

²⁰ Byo mupwila pamo, kechi kyo kijiilo kya Nkambo kyo muja ne.

²¹ Mambo pa kuja kwenu yense utendekelapo kuja byanji mwine, kabiji umo wikala na nzala ne mukwabo naye upendwa.

²² Nanchi kechi muji na ma nzubo a kujiilamo ne kutomenamo nenyi? Inyi mwasuula kipwilo kya Lesa, ne kwibalengesha bumvu abo bakajilwa nyi? Ikika kyo nsakwimwambila? Ne mutote nyi? Mukino bino kechi nemutota ne.

²³ Mambo natambwile kwi Nkambo akya kyonka kyo nemufikizhizhe anweba, namba, Nkambo Yesu mu bonkabwa bufuku bo bamusolwele, washikwile shinkwa,

²⁴ ne pa kusanta, wamutebwile ne kwamba amba, “Uno ye mubiji wami wimupainwa anweba. Mukobenga kikye mu kumvuluka amiwa.”

²⁵ Kabiji byonkabyo ne katomeno nako, pa kupwisha kuja amba, “Kano katomeno ye mulaye mupya wa mu mashi ami, mukobenga kikye bimye byonse byo mukatomanga mu kumvuluka amiwa.”

²⁶ Mambo bimye byonse byo mukajanga uno shinkwa, ne kutoma kano katomeno, mukasapwilanga lufu lwa Nkambo poso waiya.

²⁷ Na onka ano mambo awa uja ku uno shinkwa, nangwa kutoma ku katomeno ka Nkambo kyabula kufwainwa, ukazhatwa nao a mubiji ne a mashi a Nkambo.

²⁸ Muntu akieseke mwine, bino aje ku uno shinkwa ne kutoma ku kano katomeno.

²⁹ Mambo awa uja ne kutoma, umvwe ne kumona buneme bwa mubiji wa Nkambo ne, wijiila ne kwitomena mwine luzhachisho.

³⁰ Na onka ano mambo bavula ba mwi anweba banekena ne kukolwa, ne bavula bafwa kala.

³¹ Umvwe twipima atweba bene kechi tukazhatwe ne.

³² Kabiji umvwe aye Nkambo wituzhachisha, witufunda amba kechi tukazhatwe pamo na ba pano pantanda ne.

³³ Byonkabyo anweba bakwetu, byo mupwila na kuja, ipembelai anweba bene na bene.

³⁴ Umvwe muntu wafwa nzala, ajiile jimo ku nzubo, namba kupwila kwenu kechi kwikale kwa kuleeta luzhachisho ne. Bikwabo byashalaapo nkebyolola byo nkeya.