1 Kolinda 10 - KNTP

Lujimuno lwa kupopwela bankishi

¹ Anweba bakwetu, kechi nasaka namba mulube ne amba, bashakulu betu bonse bajinga munshi ya jikumbi, ne kupita bapichile bonse mu kalunga ka mema.

² Kabiji ba batizhilwe mwi Mosesa mu jikumbi ne mu kalunga ka mema.

³ Ne bonse bajiile kajo kamo ka bumupashi

⁴ kabiji bonse batomene mema amo a bumupashi. Mambo batomenenga ku aja jibwe ja bumupashi jibalondejilenga; kabiji aja jibwe jajinga Kilishitu.

⁵ Nangwa byonkabyo bamo bavula kechi bamutokeshe bulongo Lesa pa muchima ne, pakuba baonawilwe mungyetu.

⁶ Bino bintu byo bya kumwenako atweba amba, kechi musake bintu bibi byonka byo basakile abo ne.

⁷ Nangwa kechi mwikale ba kupopwela bankishi pamo ne abo bamo ne. Byonka byo kyanembwa amba, “Bantu baikajile na kuja ne kutoma, ne kwimana ke bazhe.”

⁸ Nangwa kuuba bulalelale byonka byo baubile abo bamo ne, abo bafwile mu juba jimo biumbi makumi abiji ne biumbi bisatu.

⁹ Nangwa kumweseka Nkambo byo bamwesekele abo bamo ne, kabiji baipayilwe ku milolo.

¹⁰ Nangwa kumunyinyita byo bamunyinyichile abo bamo ne, abo baonaikile kwi aye monaushi.

¹¹ Kabiji bino bintu bibamwekejile amba bikale ke bya kumwenako bakwabo, kabiji byanembejilwe kufundwa kwetu atweba bo yafikila mpelo ya myaka.

¹² Onkao mambo awa ulanguluka amba naimana ajimuke, kuchiina amba wakapona.

¹³ Kafwako lweseko lwimufikila lo babula kumona bantu bakwabo ne. Mambo Lesa ye wakishinka kechi ukemuleka amba, mumone lweseko lwakila pa bulume bwenu ne, bino mu lweseko ukemumwena jishinda ja kupulukilamo, amba mumone mwa kwilukonshesha.

¹⁴ Onkao mambo anweba batemwe bami, muchiine kupopwela bankishi.

¹⁵ Mbena kwimwambila byo muji bantu bamaana, bipimai byo naamba.

¹⁶ Nanchi katomeno ka mapesho kotupesha, kechi ko kushilang'ena kwa mashi a Kilishitu nenyi? Kabiji shinkwa ye tutebula kechi ko kushilang'ena kwa mubiji wa Kilishitu nenyi?

¹⁷ Bino shinkwa byo aji umotu, atweba nangwa twavula, twi mubiji umo, mambo bonse tuja ku shinkwa umo.

¹⁸ Langulukai bena Isalela ba mwayila buntunshi, aba baja ku bitapisho kechi bashilang'ana na kyakusokelapo kitapisho nenyi?

¹⁹ Nanchi mbena kwamba amba ka? Namba kintu kyo batapisha ku bankishi kyo kintu nyi? Nangwa namba, nkishi kyo kintu nyi?

²⁰ Bino naamba namba abya bintu byo batapisha Bangentila, bebitapisha ku bademona, kechi kwi Lesa ne. Kabiji kechi nasaka namba mushilang'ane na bademona ne.

²¹ Kechi mwakonsha kutoma katomeno ka Nkambo pamo na katomeno ka bademona ne. Kabiji kechi mwakonsha kuja ku tebulu wa Nkambo ne ku tebulu wa bademona ne.

²² Nanchi tumulengeshe kichima aye Nkambo nyi? Twamukila mu kukosa nyi?

²³ “Bintu byonse byabula kuzhila kwi amiwa,” Bino kechi byonse biji na bukwasho ne. “Bintu byonse byabula kuzhila,” Bino kechi byonse bikomesha ne.

²⁴ Kafwako nangwa umo ekebele byamuwamina mwine ne, kana byawamina bakwabo.

²⁵ Byonse byo bapotesha pa kisankanyi kya nyama bijaitu, kwakubula kwipuzha nangwa kimo na mambo a jiwi ja mu muchima.

²⁶ Mambo “ntanda yo ya kwa Nkambo ne byonse bijimo.”

²⁷ Umvwe umo wabula kwitabila wimwita ku kijiilo, ne anweba mwaswa kuya, byonse byo bemutujila bijaitu, kwipuzha nangwa kimo na mambo a jiwi ja mu muchima ne.

²⁸ Bino umvwe muntu umo wimwambila amba, “Kino bekitapisha ku bankishi,” kwikija ne na mambo a jiwi ja mu muchima,

²⁹ byo naamba namba jiwi ja mu muchima, kechi jobe obewa mwine ne kana ja mukwenu. Mambo ka bwana bwa bene bwami kyo bebuzhachisha mu milanguluko ya mu muchima wa mukwetu?

³⁰ Umvwe nja na kunsanta, mambo ka o nnenenwa bibi na mambo a byobya byo nasanchila?

³¹ Byonkabyo nangwa muja, nangwa mutoma, nangwa muuba kya byepi, byonse kasa mwibyubila lukumo lwa Lesa.

³² Kabiji kechi mwikale ke ba kwituntulako Bayudea, nangwa Bagiliki, nangwa kipwilo kya Lesa ne.

³³ Byonka byongeseka ne amiwa kwibatokesha bantu bonse ku michima mu bintu byonse byo nguba, kechi nekebela byawama amiwa mwine ne, kana kwibakebela byawama bakwetu bavula namba bapuluke.