1 Kolinda 1 - KNTP

¹ Paulo, waichilwe monka mu kyaswa muchima wa Lesa amba ekale mutumwa wa Kilishitu Yesu, pamo ne mulongo wetu Sositenesa.

² Ku kipwilo kya Lesa kiji mu Kolinda, baitwa amba bekale bazhila mwi Kilishitu Yesu, ne ku bonse beta pa jizhina ja Nkambo Yesu Kilishitu konse konse, Nkambo yabo ne wetu pamo.

³ Bupe bwikale ne anweba ne mutende bifuma kwi Lesa Taata wetu ne kwi Nkambo Yesu Kilishitu.

Bibusa mwi Kilishitu

⁴ Nsanta kwi Lesa moba onse mambo anweba mwapewa bupe bwa Lesa mwi Kilishitu Yesu.

⁵ Mambo mwi aye mo mwamwena bunonshi bonse, ne bwa kwamba konse ne bwa maana onse.

⁶ Kushimuna kwa kumushimuna Kilishitu kwa lumbulukila mwi anweba.

⁷ Mambo anweba kechi pajipo kya bupe kyo mwabulwa kupewa ne, byo mubena kupembela lumwekesho lwa Nkambo yetu Yesu Kilishitu.

⁸ Ye ukemukosesha kufika ne kumpelo, amba mukekale ba kubula mambo mu juba ja Nkambo yetu Yesu Kilishitu.

⁹ Lesa ye wakishinka, kabiji moka mwi aye mo mwaichilwe mu lumvwang'ano lwa Mwananji Yesu Kilishitu Nkambo yetu.

Lwabano mu kipwilo

¹⁰ Pano ne musashijila anweba bakwetu, monka mu jizhina ja Nkambo yetu Yesu Kilishitu, namba mwikale ba kuyila mumo, kechi mwikale lwabano mwi anweba ne. Poso mulamankane pamo na muchima umo ne milanguluko imo.

¹¹ Mambo amiwa bambujile ku ba mukisemi kya kwa Kelowe amba, mwi anweba balongo bami muji mapata.

¹² Ng'ambe namba, anweba pa muntu pa muntu, mu beena kwamba amba, “Amiwa ne wa kwa Paulo” mukwabo naye amba, “Amiwa ne wa kwa Apolosa” nangwa amba, “Amiwa ne wa kwa Kefasa” ne mukwabo amba, “Amiwa ne wa kwa Kilishitu”.

¹³ Nanchi Kilishitu waabana nyi? Nangwa Paulo waipayilwe pa musalabu na mambo a anweba nyi? Nangwa mwabatizhilwe mu jizhina ja kwa Paulo nyi?

¹⁴ Nasanta kwi Lesa mambo kechi nabatizhepo nangwa umo ne, poso bonka ba Kilishipusa ne Ngayusa.

¹⁵ Kuchiina muntu akambe amba, mwabatizhilwe mu jizhina jami.

¹⁶ (Ee, kine, kabiji nabatizhile ne ba mukisemi kya kwa Setefanusa; bino kechi nayuka kana kujipo bakwabo bo nabatizhe ne.)

¹⁷ Mambo Kilishitu kechi wantumine mu kubatizha ne, poso kusapwila Mambo Awama, nako kechi mu byambo bya maana ne, kuchiina amba, musalabu wa Kilishitu wa kaalulwa ke watu.

Kilishitu bo bulume ne maana a Lesa

¹⁸ Pakuba mambo a musalabu bo bumbulwa maana kwi abo babena konaika, pakuba kwi atweba tubena kupuluka, bo bulume bwa Lesa.

¹⁹ Mambo kyanembwa amba, “Amiwa nkonauna kujimuka kwa bamaana ne kuyukisha kwa boba bajimuka nkekuvulang'anya.”

²⁰ Nanchi wa maana uji pi? Munembeshi naye uji pi? Wayukisha kwamba pa bya pano pantanda naye uji pi? Aye Lesa kechi wialula maana a pano pantanda ke bumbulwa maana nenyi?

²¹ Mambo monka mwayila maana anji aye Lesa kechi kyakonshekele amba, ba pano pantanda ba muyuke Lesa mu kujimuka kwabo abo bene ne. Bino kyamuwamijile Lesa kwi bapulusha baitabila na bumbulwa maana bo tusapwila.

²² Mambo Bayudea basaka biyukilo, ne Bagiliki bakebakeba maana.

²³ Pakuba atweba tusapwila mambo a Kilishitu waipayilwe pa musalabu, ku Bayudea kyokya kwintuntulako, ne Bangentila ke kya bumbulwa maana,

²⁴ pakuba kwi abo baitwa, nangwa Bayudea nangwa Bagiliki, Kilishitu bo bulume bwa Lesa ne maana a Lesa.

²⁵ Mambo bumbulwa maana bwa Lesa bwakila maana a bantu, ne kunekena kwa Lesa kwakila bulume bwa bantu.

²⁶ Balongo bami akilangulukai lwito lwenu, kechi bavula baitwa bamaana mwayila buntunshi ne, nangwa bavula ba binemanga ne.

²⁷ Pakuba Lesa wasalulwile abya byamwekana pano pantanda amba, byabulwa maana, amba ebalengeshe bumvu abo bamaana, kabiji Lesa wasalulwile byanekena bya pano pantanda amba, ebilengeshe bumvu byakosa.

²⁸ Kabiji Lesa wasalulwile byabulwa buneme ne byasulwa pano pantanda kabiji ne bintu byabulwapo amba, ebivulang'anye bijipo.

²⁹ Kino kyayila mukuuba amba, kafwako muntu nangwa umo wakonsha kwitoota ku meso a Lesa ne.

³⁰ Mambo aye ye wimwikazha monka mwi Kilishitu Yesu, ye aalwile Lesa amba ekale ke maana etu, ne bololoke bwetu, ne kuzhijikwa kwetu, ne bukuuzhi bwetu.

³¹ Amba monka mo kyanembelwa amba, “Aye witota, etotele mwi Nkambo.”