Yohana 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kukualĩĩsia antu 5000

¹ Pembele ũYesu nuenda kwityumbi lya nanza ya Galĩlaya, ĩĩo nanza ya Tibelia.

² iYũmbi kyulu nalĩmutiatĩĩla, kunsooko alĩ aionaa iilĩngasĩĩlio naalĩ waatendĩĩle ĩaluĩle.

³ ũYesu nunankĩla munkonko, kuasio nwikyalansa palumuĩ nĩamanigua aakue.

⁴ ĩPasaka, ulutondo nalukulu lwa Ayahũdi, alĩ lwĩpiipĩ.

⁵ Paapo ũYesu nunansula ĩmiiso maakue, nuoona yũmbĩ kyulu lĩpolokile kumuakue, numuĩĩla uPilipo, “Kugule mpĩĩ ĩmapũli ĩa alĩe.”

⁶ Alutambuĩle itĩ wamugeme, kuitĩ umuene alumanile kĩna ukitenda.

⁷ uPilipo numushookeelia, “ĩMapũli ma shilinge magana mabĩlĩ sika makuenda muumo tũlũ wensi waligie kaniino udũũ.”

⁸ Umuĩ wa amanigua aakue, uAndelea umunũna wa kĩSimoni Petelo, numuĩĩla,

⁹ “Kakoolĩ kalĩĩsia papa nakatĩĩte mapũli mataano ma uwele nipishiĩ, pibĩlĩ ĩpa aya makuagela mpĩĩ naiingĩ itĩ?”

¹⁰ ũYesu nuũga, “Ikyalansiĩ ĩantu.” Paasio alĩ maakoolĩ masanzĩ mingĩ. Iio gua, naikyalansa ĩagoosia magana ma nzogũ mataano.

¹¹ ũYesu numasola ĩmapũli, nusongelia, nuoomolania naalĩ ikyalansile, iio-iioo nipishiĩ gaa, muna alĩ aloelue.

¹² Pĩna naikyuta, nuaĩĩla amanigua aakue, “Soleelĩ ipiminangulua napishaagile, kĩlekilimĩĩla kakĩntu.”

¹³ Iio gua naapishooleela, naijulia itooto kyumi naibĩlĩ ipiminangulua pya mapũli na mataano ma uwele naalĩ pishaagigue nĩnaalĩ alĩĩle.

¹⁴ Luulo gua, ĩantu pĩna naakĩona ĩkĩlĩngasĩĩliio naaũga, “Uyu wayu tai taaii umunakĩdagu nũjile muna unkũmbigyulu.”

ũYesu ukĩũna wing'ene, nukwigenda mumaazĩ

¹⁵ Iio gua, ũYesu pĩna nulĩnga kĩna alĩ asĩĩgaa kukumuguĩla koona amutende wĩĩ mutemi, nwĩũna kangĩ kunkonko wing'ene dũũ.

¹⁶ Pĩna niĩ mpĩndĩ, ĩamanigua aakue naatima sunga kunanza,

¹⁷ naingĩla mwipyango naĩĩ kumĩpũũta ĩnanza kwienda kuKapelinaũmũ. Alĩ yaazaa kiiti, nduyo ũYesu alũkĩĩlĩ waapikĩĩle.

¹⁸ Nĩnanza niiĩndiuka kunsooko nzega nankulu alĩ ikũnka.

¹⁹ Pĩna alĩ igendia ipyango zĩ maili zitatu katia zinĩĩ, naamuona ũYesu wigenda mukiania ya nanza, nuĩ kulĩsũgamĩĩla ipyango, naoopooka.

²⁰ Nuaĩĩla, “Ingĩ neene, lekioopokĩ.”

²¹ Paapo naasiia kukumuanũnkula mwipyango; ĩkamuĩ ipyango nalĩpikĩĩla kunsĩĩ naalĩ alunziĩ.

Antu ishiia kĩlĩngasĩĩlio

²² Mudaau yaakue iyũmbĩ naalĩ liĩmĩkile pityumbĩ lya nanza nalĩona kĩna lyukutilĩ pyango naliĩngĩ paasio, isiiititũla lĩĩlo naalĩ lĩmuĩ, kangĩ kĩna ũYesu sika alĩ wingĩĩle mwipyango liasio palumuĩ nĩamanigua aakue, ĩpa ĩamanigua aakue alĩ endile ing'ene.

²³ Ĩpa ĩmapango mĩĩa kwipũna kuTibelia namapika piipĩ nĩpaasio pĩna alĩ alĩĩlĩĩle ĩmapũli pĩna ũShekulu alumasongĩĩlie.

²⁴ Paapo gua, iyũmbĩ pĩna nalĩona kĩna ũYesu ukutilĩ kuasio sunga ĩamanigua aakue gaa, naingĩla mwipyango ĩeene, naalongola kuKapelinaũmũ naĩĩ kumudũũma ũYesu.

²⁵ Pĩna naamuona pityumbĩ lya nanza naamuĩĩla, “Mumania numukulu, aza waazaa nzalĩ kunu.”

Ndia ya upanga

²⁶ ũYesu nushookeelia nuũga, “Tai-taaii namuĩĩla mwindũũma, sika kunsooko alĩ muoonie ilĩngasĩĩlio, ĩpa kunsooko alĩ mulĩĩle ĩmapũli namwikyuta.

²⁷ Muleke kĩtuma umulĩmo kunsooko ya ndia nyukoononekaa, tazu kunsooko ya ndia nyĩkikyalaa sunga upanga wa kalĩ nakalĩ, uMuana-muntu nukakumupeela; kuitĩ uyu wayu namuĩĩkĩlue ulumenko nuTata Nzua.”

²⁸ Paapo naamuĩĩla, “Kutendeeii kuĩtume ĩmĩlĩmo ya kĩNzua.”

²⁹ ũYesu nushookeelia nuaĩĩla, “Uu wau mulĩmo wa kĩNzua, musuĩĩle mumuakue naalĩ mutumue nduyo.”

³⁰ Naamuĩĩla, “Uwe witenda kĩlĩngasĩĩlio kĩ gua, kuone kukusuĩĩle? Ukĩtuma mulĩmo kĩ?

³¹ ĩAtata ĩĩtu naalĩa ĩmana munbugi-melemele, kĩna yandĩkue, Alĩ waapĩĩle india kwipũna kwigyulu alĩe.”

³² ũYesu nuaĩĩla, “Tai-taaii namuĩĩla, sika Musa naalumupĩĩle ĩndia nya tai kwipũna kwigyulu, ĩpa uTata waane ukumupeelaa ĩndia nya tai kwipũna kwigyulu.

³³ Kuitĩ ĩndia ya kĩNzua, ĩĩoo nyĩtimile kwipũna kwigyulu nukukuupeela uunkũmbigyulu upanga.”

³⁴ Paapo naamuĩĩla, “Shekulu, intondo tũlũ kupeele ĩndia niasio.”

³⁵ ũYesu nuaĩĩla, “Ĩne neene nĩndia ya upanga. Nuasio nũjile kumuane sika ukikolua kanzala; nduyo nusuĩlĩĩle mumuane sikukikolua ĩnoota kainiino.

³⁶ Ĩpa itĩ aza namuĩĩlaa ya kĩna mumoonie, ĩpa sika mwasuĩĩla.

³⁷ Ensi uTata nukumpeelaa ikiiiza kumuane; nduyo nũjile kumuane sika nĩkakumutaaga kunzi kainiino.

³⁸ Kuitĩ sika alĩ ntimile kwipũna kwigyulu koona nĩtume uulooa waane, ĩpa uulooa waakue naaluntumile.

³⁹ Nuuloa waakue naaluntumile ingĩ ntuu, wensi naalumpĩĩle ndekilimĩĩlia kaumuĩ, ĩpa numũiukie palutondo lwa mpelo.

⁴⁰ Kuitĩ uu wau uulooa wa kĩtata waane, tũlũ wensi nukumulaaa uMuana nukwishuĩĩla mumuakue, wĩĩ nuupanga wa kalĩ nakalĩ; nineene nĩkakumũiukia palutondo lwa mpelo.”

⁴¹ Paapo ĩAyahũdi naĩĩ kĩũlũnga kunsooko yaakue, kuitĩ alĩ waũgaa, “Ĩne neene nĩndia naalĩ ĩtimile kwipũna kwigyulu.”

⁴² Naaũga, “Sika wayune Yesu muana wa kĩYosepũ? Sika kuĩĩzĩne ũshee nunina? Ĩpaino wiũgaaii, Ntimile kwipũna kwigyulu?”

⁴³ ũYesu nushookeelia nuaĩĩla, “Muleke kĩũlũnga niinie kuniinie.

⁴⁴ Kutilĩ nusũũmile kwiiiza kumuane kaanga ĩsika mulũtue nuTata naaluntumile; nineene nĩkakumũiukia palutondo lwa mpelo.

⁴⁵ Yandĩkue muunakĩdagu, Tũlũ ensi ikitũlimanigua nuNzua. Tũlũ wensi nũigilie nukukĩmania kwa kĩTata ukuuzaa kumuane.

⁴⁶ Ukutilĩ naalumuoomie uTata isiititũla umuene nupũnile kwa kĩNzua, wayu alumuoonie uTata.

⁴⁷ Tai-taaii namuĩĩla, nusuĩlĩĩle utĩĩte uupanga wa kalĩ nakalĩ.

⁴⁸ Ĩne neene nindia ya upanga.

⁴⁹ ĩAtata aani alĩ alĩĩle ĩMana mumbugimelemele, naakia.

⁵⁰ Ĩĩ yoĩ ndia nĩtimile kwipũna kwigyulu koona tũlũ wensi wamĩlĩe walekikia.

⁵¹ Ĩne neene nĩndia ya upanga naalĩ ĩtimile kwipũna kwigyulu; tũlu wensi kanga wamĩlĩe ĩndia ĩĩ, ukitũla nuupanga wa kalĩ nakalĩ. Nĩndia nanikipũnia ĩne kunsooko ya upanga wa unkũmbigyulu ingĩ umuĩlĩ waane.”

⁵² Paapo ĩAyahũdi naĩĩ kĩkunguma eene kueene, naaũga, “Wishũũma mbii uyu kukukupeela umuĩlĩ waakue kuulĩe?”

⁵³ Paapo ũYesu nuaĩĩla, “Tai-taaii namuĩĩla, kanga musiite kuulĩa umuĩlĩ wa Muana-muntu nukwikopa umugali waakue, muagila kaupanga munsĩ yaani.

⁵⁴ Nulĩĩle umuĩlĩ waane nukwikopa umugali waane utĩĩte upanga wa kalĩ nakalĩ; nineene nĩkakumũiukia palutondo lwa mpelo.

⁵⁵ Kuitĩ umuĩlĩ waane ingĩ ndia ya tai, numugali waane ingĩ ukopi wa tai.

⁵⁶ Nulĩĩle umuĩlĩ waane nukwikopa umugali waane ukikyalaa munsĩ yaane nineene munsĩ yaakue.

⁵⁷ Kĩna uTata namupanga naaluntumile, nineene numupanga kunsooko ya kĩTata, iio-iioo nunuasio nukundĩaa ĩne ukitũla mupanga kunsooko yaane.

⁵⁸ Ĩĩ yoi ndia naalĩ ĩtimile kwipũna kwigyulu, sika kĩna atata aani naalĩ alĩĩle naakia.” nukumĩlĩa ĩndia ĩĩ ukitũla mupanga ĩkalĩ nakalĩ.

⁵⁹ iNkaani izi alĩ witambula mũshũnagogi pĩna alĩ wimania muKapelinaũmũ.

Amanigua nasika asuĩlĩĩle

⁶⁰ Kunsooko ĩĩ, iingĩ muamanigua aakue pĩna alĩ iigilie izi, naaũga, “uLukaani ulu lukakũ! Waani nusũũmile kukulutegeela.”

⁶¹ ũYesu pĩna numana munkolo yaakue ya kĩna ĩamanigua aakue ĩkĩũlũnga kunsooko ya lukaani ulu, nuaĩĩla, “Lwalu lwamukũmpiane?

⁶² Ikitũla mbii gua kanga mumuone uMuana-muntu winankĩla kĩna alĩ wĩĩlĩĩ umuandio?

⁶³ ĩNkolo, ĩĩo yukupangatagiaa, umuĩlĩ sika ũjĩpĩĩle kakĩntu, iNkaani nalĩ nukumuĩĩla ingĩ nkolo, kangĩ upanga.

⁶⁴ Ĩpa akoolĩ mumiani nasika asuĩlĩĩle.” Kuitĩ ũYesu alumanile kwipũna umuandio aani nasika asuĩlĩĩle, kangĩ waani nukakumusakia.

⁶⁵ Nuũga, “Kunsooko ĩĩ aza mumuĩĩlĩĩle kĩna ukutilĩ nusũũmile kwiiiza kumuane kanga ĩsika mupeegue nuTata.”

uPetelo ukumukũmuula ũYesu kĩna Kilisito

⁶⁶ Kwipũna paapo iingĩ muamanigua aakue naashooka kĩnũũma, sika naĩtiata nduyo.

⁶⁷ Paapo ũYesu nuaĩĩla naikyumi naabĩlĩ, “Niniinie gaa mwasiiane kwilega?”

⁶⁸ uSimoni Petelo numushookeelia, “Shekulu, kwende kwa kuani? Ue utĩĩte inkaani za upanga wa kalĩ nakalĩ,

⁶⁹ nindiishie kwasuĩlĩĩle nukwilĩnga kĩna ue ingĩ uMuelu wa kĩNzua.”

⁷⁰ ũYesu nuashookeelia, “Sika alĩ numusaaguĩlene inie namwikyumi naabĩlĩ. Nuumuĩ waani ingĩ shetani?”

⁷¹ Alumugambile ũYuda ũsha Simoni nwa kuIsakaliote; uuyo numuĩ mwikyumi naabĩlĩ, nũjile kumusakia.