Yohana 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu ĩkĩtambuĩla nuNikodemo

¹ Alukoolĩ muntu wa APalisayo, ĩliina liakue Nikodemo, mukulu wa Ayahũdi.

² Uzo alũjile kwa kĩYesu utiku numuĩĩla, “Mumania numukulu, kumanile kĩna ue uue uMumania nupũnile kwa kĩNzua, kunsooko kutilĩ nusũũmile kwitenda iilĩngasĩĩlio ii nukuitendaa ue pĩna uNzua sika yĩensi nduyo.”

³ ũYesu nushookeelia numuĩĩla, “Tai taaii nakuĩĩla, tũlũ wensi kanga wasiitilelua kaubĩlĩ sika wishũũma kukuuona uutemi wa kĩNzua.”

⁴ uNikodemo numuĩĩla, “Wishũũma mbii umuntu kwilelua ĩwaalĩĩ munampala? Wishũũmane kwiingĩla mundaa ya kĩnina kaubĩlĩ nukwilelua?”

⁵ ũYesu nushookeelia, “Tai-taaii nakuĩĩla, muntu kanga wasitilelua kumaazĩ nukwa kĩMuau, sika wishũũma kwiingĩla muutemi wa kĩNzua

⁶ uMuĩlĩ ukulelaa umuĩlĩ; ĩnkolo yukulelaa ĩnkolo.

⁷ Ulekikulĩlua nanukukuĩĩla yumũjĩpĩĩle kwilelua kaubĩlĩ.

⁸ ĩNzega yukukũnkaa pĩna ĩsiiile numulũgũzo waakue ukũigagiaa, ĩpa sika umanile kĩna ipũna katia kĩna ĩlunziĩ. Iio gua tũlũ wensi wĩĩlĩ namulelue kwa kĩMuau.”

⁹ uNikodemo nushookeelia numuĩĩla, “Zishũũmĩka mbii izi?”

¹⁰ ũYesu nushookeelia numuĩĩla, “Ue umumania wa Ĩsilaeli, nindizi sikulĩngilene?

¹¹ Tai-taaii nakuĩĩla, nakulumanile kukulutambulaa; nakuluoonie kukulukuĩlaa, nuukuĩlĩ wĩĩtu sika mugombile.

¹² Kanga numuĩĩle za muna nsĩĩ niniinie sika mwishuĩĩla, mukishuĩĩla mbii kanga numuĩĩle ĩza kwigyulu.”

¹³ Kutilĩ naalunankĩĩle kwigyulu ĩpa uuzo uMuana-muntu naalĩ wiikile kwipũna kwigyulu.

¹⁴ Kĩna uMusa naalumĩnansuĩle ĩnzoka mumbugi-melemele, iio iioo yumũjĩpĩĩle uMuana-muntu wanansulue.

¹⁵ Koona tũlũ wensi nusuĩlĩĩle mumuakue wĩĩ nuupanga wakalĩ nakalĩ.

¹⁶ Iti yoi uNzua aluulogilue uunkũmbigyulu, sunga numupũnia uMuana waakue wing'ene, koona tũlũ wensi nusuĩlĩĩle mumuakue walekilimĩĩla, ĩpa wĩĩ nuupanga wa kalĩ nakalĩ.

¹⁷ Kuitĩ uNzua sikumutumile uMuana muna unkũmbigyulu waulamule uunkũmbigyulu, ĩpa uunkũmbigyulu ugũnue ninduyo.

¹⁸ Nusuĩlĩĩle mumuakue sika mulamulue; nasikusuĩlĩĩle wakondile kwilamulua, kunsooko sikusuĩlĩĩle; muliina lya Muana nwing'ene nwa kĩNzua.

¹⁹ Uu wau ulamuli, ya kĩna uweelu waazile muna unkũmbigyulu nĩantu naakĩloogua ĩkiiti kwikĩla uweelu, kunsooko uutendi waao alĩ ubĩĩ.

²⁰ Tũlũ wensi gua nukumatendaa namabĩĩ ukuusuukĩlaguaa uweelu. Sikukuuzaa kuweelu, uutendi waakue ulekitakĩlua.

²¹ Uyo gua nukumĩtendaa ĩtai ukuuzaa kuwelu, itĩ uutendi waakue wigyelele kĩna utendue mwa kĩNzua.

Ukuĩli wa kĩYohana Mubadĩĩzia mumpola za kĩYesu

²² Pembele ũYesu nĩamanigua akue naenda kunsĩĩ ya Uyahũdi, nukyala pii kuuko palumuĩ nĩndĩo, nubadĩĩzia.

²³ Nduyo uYohana alĩ wibadĩĩzia pa Enoni piipĩ nĩSalimu kunsooko alĩ maazĩ mingĩ kuasio; antu naamuagaana nukwibadĩĩzigua.

²⁴ Kuitĩ uYohana sika alĩ walagumĩlua mukĩtũngo.

²⁵ Luulo gua, nautũla wĩkungumi wa amanigua a kĩYohana nuMuyahũdi umuĩ kumpola za wĩeelia.

²⁶ Naamuagaana uYohana naamuĩĩla, “Mumania numukulu, unuasio naalĩ mwĩensi ninduue kwityũmbĩ liYolidani naalumukuĩlĩle ue, laaa nduzo wibadĩĩzia, nĩ tũlũ ensi akumuagaana.”

²⁷ uYohana nushookeelia nuũga, “uMuntu sika wishũũma kwiaanũnkula kakĩntu ĩsika mupeegue kwipũna kwigyulu.

²⁸ uNiinie munkuĩlĩĩle kĩna alĩ mbũgile, ĩne sika nĩKilisito, ĩpa numutumue ntongela yaakue.

²⁹ Nutĩĩte umutoolua ingĩ mutooli, ĩpa umusuamuua wa mutooli nuĩmĩkile nukukumũigia ukulumbĩkagiaa kunsooko ya luli lwa mutooli.

³⁰ Luulo gua, uulumbi waane uu witimĩĩligua. Uzo ijĩpĩĩle wakule, ĩpa ĩne niinupe.”

³¹ Uzo nujĩle kwipũna kukiania, uuyo ukĩlile tũlũ. Nwa muna nsĩĩ, uuyo wa muna nsĩĩ; ukutambulaa za muna nsĩĩ. Nũjile kwipũna kwigyulu ukĩlile tũlũ-tũũlũũ.

³² Nuzioonie nukukuziigia, ziizo ukuzikuĩlaa; ĩpa kutilĩ nukugombaa uukuĩli waakue.

³³ Uzo nuugombile uukuĩli waakue waĩĩkĩĩle lumenko ya kĩna uNzua ingĩ wa tai.

³⁴ Kuitĩ uzo, kunsooko sika ukumupũnagiaa uMuau kunzĩla ya kugelelana.

³⁵ uTata umuloilue uMuana, nduyo umupĩĩle tũlũ mumukono waakue.

³⁶ Nusuĩlĩĩle mwa kĩMuana utĩĩte uupanga wa kalĩ nakalĩ; nasikumusuĩlĩĩle uMuana sikukiona uupanga, ĩpa uutaki wa kĩNzua ukuĩmaa mumuakue.