Yohana 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muandio

¹ Kumuandio alĩ uLukaani, nuLukaani alĩ yĩensi nuNzua, nuLukaani alĩ uNzua.

² Uyu ĩmuandio alĩ yĩensi nuNzua.

³ Tũlũ yensĩ alĩ itendue kwa kĩuyu; kanga ĩsika muene sika kitendeka kakĩmuĩ nakyatendekile.

⁴ Mumuakue uupanga alĩ ukoolĩ, nduo upanga alĩ weelu wa antu;

⁵ nduo uweelu weelilie mukiiti, nĩkiiti sika nakĩudula.

⁶ Nwigyelela muntu mutumue kwipũna kwa kĩNzua, ĩliina liakue Yohana.

⁷ Uyu nuuza kuukuĩli koona waukuĩle uweelu, tũlũ asuĩĩle kwa kĩuyo.

⁸ uNuasio sika alĩ weelu, ĩpa alũjile waukuĩle uweelu.

⁹ Alĩ ukoolĩ uweelu nwa tai nukumuelelagiaa umuntu wensi, nũjile muna unkũmbigyulu.

¹⁰ Alĩ wĩĩlĩ muna unkũmbigyulu nuunkũmbigyulu nautũla kwa kĩuyu; nuunkũmbigyulu sika naumulĩnga.

¹¹ Nuuza kumuakue, ndĩo naalĩ aakue sika naamuanũnkula.

¹² Ĩpa tũlũ naalĩ amuanũkuĩle nuapeela usũũmi atũle aana a kĩNzua, naasuĩlĩĩle muliina liakue,

¹³ naalelue sika kumugali, katia sika kuulooa wa muĩlĩ, katia sika kuulooa wa muntu, ĩpa kwa kĩNzua udũũ.

¹⁴ NuLukaani nutũla muĩlĩ, nwikyala kumuĩtu, nakuulaaa uukulu waakue, ukulu zĩ wa Muana wing'ene kwa kĩTata, wijuile uukende nĩtai. (

¹⁵ uYohana numukuila, nwĩtunta nuũga, “Uyu wayu naalĩ ntambuĩle, nũjile kunuma yaane alĩ wa ntongela yaane kunsooko alĩ wa mbele kumuane.”)

¹⁶ Numuwijuli waakue ishie tũlũ nakuanũnkula, ukende muukende.

¹⁷ Kuitĩ uUlagĩĩlio nauleetua kumukono wa kĩMusa; uukende nĩtai alĩ zijile mwa kĩYesu Kilisito.

¹⁸ Kutilĩ numuoonie uNzua ityũngo liensi; uMuana wing'ene nuĩlĩ mukĩkũa kya kĩTata, muene alumukũnukuĩle.

Ukuĩli wa kĩYohana Mubadĩĩzia kwa kĩYesu

¹⁹ Uuwau ukuĩli wa kĩYohana pĩna ĩAyahũdi naatuma kumuakue kwipũna kũYelusalemũ apolia nĩAlawi amukolie, “Ue uue waani?”

²⁰ Nukũmuula, sika nukaana; nukũmuula, “ĩne sika nĩKilisito.”

²¹ Naamukolia, “mbii gua? Ue uue Eliane?” Nuũga, “Sika neene.” “Ue uue munakĩdagu nuasione?” Nushookeelia, “Zũi.”

²² Paapo naamuĩĩla, “Ue uue wani gua? Kuashookeelie naalĩ akutumile. Ukĩĩĩlaaii?”

²³ Nuũga, “Ĩne neene luli nalukĩtunta mumbuga, mĩgololĩ ĩnzĩla ya kĩShekulu, kĩna aluũgile umunakĩdagu Yesaya.”

²⁴ Ndĩo naalĩ atume alĩ Apalisayo.

²⁵ Naamukolia naamuĩĩla, “Nĩkĩ gua wibadĩĩzia kanga ue ĩsika wĩKilisito katia Elia katia munakĩdagu uzo?”

²⁶ uYohana nushookeelia nuũga, “Ĩne nibadĩĩzia kumaazĩ; pakatĩ yaani wĩĩmĩkile nasika mumuĩzĩ inie,

²⁷ nũjile kunũma yaane, uyo nasika nijĩpĩĩle ĩne kukuutũngula umukoa wa kĩlaatu kiakue.”

²⁸ Izi nazitendeka paBetania kwityumbĩ liYolidani, kuuko uYohana alĩ wĩĩlĩ nũbadĩĩzia.

²⁹ Mudaau yakue numuona ũYesu wijile kumuakue nuũga, “Laaĩ uMuana-nkolo wa kĩNzua nuukenkile umulandu wa unkũmbigyulu!

³⁰ Uyu wayu naalĩ ntambuĩle ĩne, ‘Kunũma yaane wijile muntu naalĩ wa ntongela yaane kunsooko alĩ wa mbele kumuane.’

³¹ Nineene sika alĩ numuĩzĩ, Ĩpa koona wigyeleligue kũIsilaeli, luulo nijile nibadĩĩzia kumaazĩ.”

³² uYohana nukuĩla nuũga, “Nanumuona uMuau nwitima zĩ nzĩa kwipũna kwigyulu, nwikyala mumuakue.

³³ Nineene sika numuĩzĩ, ĩpa uzo naaluntumile kwibadĩĩzia kumaazĩ uuyo numbuĩla, ‘Uyo nukakumuona uMuau witima nukukikyala mumuakue, uuyo ukubadĩĩzagiaa kuMuau Muelu.’

³⁴ Nineene moonie, kangĩ nkuĩlĩĩle kĩna uyu wayu uMuana wa kĩNzua.”

Amanigua a kĩYohana akumutiata ũYesu

³⁵ Mudaau yaakue uYohana alĩ wĩĩmĩkile kangĩ nĩamanigua aakue abĩlĩ.

³⁶ Numulaaa ũYesu wigenda, nuũga, “Laaĩ uMuana-nkolo wa kĩNzua.”

³⁷ ĩAmanigua aakue naabĩlĩ naamũigia witambula, naamutiata ũYesu.

³⁸ ũYesu nupĩluka, nuaona naamutiatile, nuaĩĩla, “Mwidũũma yaani?” Naamuĩĩla, “Labi” (ndogolelio yaakue, Mumania namukulu) “wikyalile mpĩĩ?”

³⁹ Nuaĩĩla, “Nzuĩ muone.” Iio naenda naaona pĩna wikyalile, naikyala ninduyo ulutondo luasio. Alĩ zĩ nsaa ikyumi.

⁴⁰ uAndelea, umunũna wa kĩSimoni Petelo, alĩ umuĩ wa aasio naabĩlĩ naalĩ amũigilie uYohana nukukumutiata ũYesu.

⁴¹ Uyo numuona tangua Usimoni umunũna waakue, numuĩĩla, “Aza kwamuonaa uMesia” (ndogolelio yaakue, Kilisito).

⁴² Numutuala kwa kĩYesu. ũYesu numutuupĩĩla, nuũga, “uUe Simoni muana wa kiYona. Ue ukiĩĩtua Kefa” (ndogolelio yaakue, Petelo).

⁴³ Mudaau yaakue ũYesu nuloma kwienda kũGalilaya. Numuona uPilipo, numuĩĩla, “Ntiata.”

⁴⁴ uPilipo alĩ wa kuBetisaida, kukaa ya kĩAndelia nuPetelo.

⁴⁵ uPilipo numuona uNatanaeli, numuĩĩla, “Aza kwamuonaa uzo naalĩ muandĩkĩlue nuMusa muUlagĩĩlio numuAnakĩdagu, ũYesu wa kuNazaleti, muana wa kĩYosepũ.”

⁴⁶ uNatanaeli numuĩĩla, “Kishuũũmane kĩntu nakĩĩza kwipũna muNazaleti?” uPilipo numuĩĩla, “Nzuu uone.”

⁴⁷ ũYesu numuona uNatanaeli wijile kumuakue, nutambula mumpola zaakue; “Laaĩ muĩSilaeli wa tai-taaii, kutilĩ kaupembeelia mumuakue!”

⁴⁸ uNatanaeli numuĩĩla, “Wasũũma mbii kwinĩnga ĩne?” ũYesu nushookeelia numuĩĩla, “uPilipo aza wĩkaalĩ kukuĩta pĩna aza wĩĩlĩ pamukuu, aza nukuoonie.”

⁴⁹ uNatanaeli nushookeelia numuĩĩla, “Mumania numukulu, ue uue uMuana wa kĩNzua! Ue uue umutemi wa Ĩsilaeli!”

⁵⁰ ũYesu nushookeelia numuĩĩla, “Kunsooko aza nakuĩĩlaa, Aza nukuoonie pamukuu, wasuĩĩlane? Ukiona nankulu kwikĩla izi.”

⁵¹ Numuĩĩla, “Tai-taaii namuĩĩla, mukakulĩona igyulu lyakũnukuka nĩamalaĩka a kĩNzua inankĩla nukwiiika muMuana-muntu.”