Utendi 8 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ uSauli nugombile kwiulagua kumuakue. Palutondo luasio, ikyanisa naliĩlĩ mũYelusalemũ naligyeleelua nimpatĩ nkulu; tũlũ ensi naapalansana munsĩĩ ya Uyahũdi nĩSamalia, isiititũla ĩatumua.

Kwiaagigua nukwishapatĩla kuAKilisito

² ĩAntu naakulia-Nzua, namuĩĩka uSitepano naamulĩĩla kĩlĩlo kĩkulu.

³ uSauli nulionoona ikyanisa, nũingĩla numba kunumba nukukuakuesa ĩagoosia nĩasungu, nuagumĩla mukĩtũngo.

uPilipo kuSamalia

⁴ Ĩpa ĩaasio naaalĩ apalansanaa naenda uko ninduuko naitanantia uLukaani.

⁵ uPilipo nuenda kukaa ya Samalia nuatanantĩlia uKilisito.

⁶ Nukunkolo ĩmui ĩmaũmbĩ namawiigia kĩĩsa uutanantia wa kĩFilipo pĩna namaũgyũlia nukwiona iilĩngasĩĩlio naalukuitenda.

⁷ Kuitĩ ĩmasĩĩmuĩ namaapũna iingĩ naalĩ amatĩĩte, namikuuta kululi lukulu; nĩnaiingĩ akii-gyandi nĩanakĩtele naakamigua.

⁸ Nawĩĩ ulumbi ukulu mukaa niasio.

Simoni namulaguli

⁹ Numuntu umuĩ, ĩliina liakue Simoni, pamuandio naalukulagulaa mukaa niasio, nuakũmia ĩantu tũlũ a Samalia, nukĩĩla kĩna muene muntu mukulu.

¹⁰ Tutu ensi aniino nĩnaakulu naikamantana nduyo, naaũga, “Uyu ingĩ ngũlũ ya kĩNzua na nkulu.”

¹¹ Naakamantana nduyo kunsooko waakũmilie ntondo kuulaguli waakue.

¹² Ĩpa pĩna alĩ amusuĩlĩĩle uPilipo, nwitanantia iMpola naNziiza za utemi wa kĩNzua nĩliina lya kĩYesu Kilisito, naabadĩĩzigua, ĩagoosia nĩasungu.

¹³ Sunga uSimoni umuene nusuĩĩla; pĩna nubadĩĩzigua naikamantana nuPilipo. Pĩna nuiona iilĩngasĩĩlio nĩmakula namitendeka, nukũmia.

uPetelo nuYohana kuSamalia

¹⁴ Pĩna ĩatumua naalĩ ĩĩlĩ mũYelusalemũ naiigia kĩna ĩAsamalia alĩ aanũnkuĩle ulukaani lwa kĩNzua, naamutuma uPetelo nuYohana ende kunsiao.

¹⁵ Nĩndĩo naatima, naaalompeela amuanũnkule uMuau Muelu,

¹⁶ kuiti uMuau Mwelu alĩ wikĩĩlĩ kalamutimĩĩla sunga kaumuĩ mumiao, ĩpa alĩ abadĩĩzigue muliina lya kĩShekulu Yesu udũũ.

¹⁷ Paapo naaĩkĩla ĩmĩkono yaao mumiao, ndĩo naamuanũnkula uMuau Muelu.

¹⁸ Pĩna uSimoni nuona kĩna ĩantu ipeegua uMuau Muelu kunzĩla ya kuĩĩkĩlua ĩmĩkono ya atumua, nualeetela mpiia, nuũga,

¹⁹ “Mpeelĩ nineene uusũũmi uu, koona muntu wensi nanumuĩĩkĩĩle ĩmĩkono waanũnkule uMuau Muelu.”

²⁰ Ĩpa uPetelo numuĩĩla, “iMpeesa zaako nazilimĩlĩle kuuko palumuĩ nunduue kunsooko usĩĩgile kĩna usũũmile kwiligia uupeegua wa kĩNzua kumpiia.

²¹ Umugila kaukamantani katia tyũmpĩ muna lukaani ulu, kuiti ĩnkolo yaako sika ngolokũ ntongela ya kĩNzua.

²² Luulo gua pela, upũne muubĩĩ waako uu; mulompe ũShekulu, malĩĩ ishũũmĩkile uleegeligue ishĩĩgo lya nkolo yaako.

²³ Kuitĩ nakuonaa wĩĩlĩ muukalĩ zĩ ntundu, kangĩ mukĩtũngo kya oonooni.”

²⁴ uSimoni nushookeelia nuũga, “Nompeelĩ kwa kĩShekulu, zilekinjagaana inkaani izi naaza mutambuĩle.”

²⁵ Pĩna naapũnia ukuĩli nukukulutambula ulukaani lwa kĩShekulu, naashooka kũYelusalemũ naazitanantia impola na nziiza muishaalĩ iingĩ ya Asamalia.

uPilipo numuntu wa kuEtiopia

²⁶ Malaĩka wa kĩShekulu naĩtambuĩla nuPilipo numuĩĩla, “Lega wende kuluandĩ lwa kutakama sunga kunzĩla ĩo nĩtinintĩkĩĩle kwipũna kũYelusalemũ nĩlunziĩ kuGaza. Yaĩ ĩnzĩla ya mbugi-melemele.”

²⁷ Nĩnduyo nuuuka nulongola. Alukoolĩ muntu wa kuEtiopia naalĩ mulindĩĩla nsao mukulu nsĩlĩlĩ ya kĩKandake umutemi namukĩĩma nwa kuEtiopia, naalĩ muĩĩkue kukuzikendegeela imbĩĩka zaakue tũlũ; ninduyo alĩ wendile kũYelusalemũ kukĩtekela.

²⁸ Pĩna alushookile kunsĩĩ yaakue, nwikyalansile mwigyalĩ liakue, nwishoma ĩkĩtabũ kya munakĩdagu Yesaya.

²⁹ uMuau numuĩĩla uPilipo, “sũgamĩĩla piipĩ nigyalĩ liasio muendanie ndĩlo.”

³⁰ uPilipo numanka, numũigia wishoma uunakĩdagu wa kĩYesaya, numukolia, “Uzilĩngilene izi nwishoma?”

³¹ Numushookeelia, “Nishũũma mbii, isiititũla muntu wanĩngie.” Numupeepia uPilipo wanankĩle ĩĩ ĩensi nduyo.

³² Nityũmpĩ lya wandĩkua naalĩ wishoma, ntĩĩlĩ, “Zĩ nkolo nanongoligue kwiulagua, Katia kĩna iio umuana-nkolo nakuuzaa utuulilie Ntongela ya unuasio nukumudumula ĩmaũli, Iio-iioo ninduyo ukumũmagiaa umulomo waakue.

³³ Alĩ musiitĩligue ĩkulukuuluu muwĩniinupia waakue. Waani ukiganula impola za wĩleli waakue. Kunsooko uumĩ waakue waleegagiguaa muna nsĩĩ.”

³⁴ uMulindĩĩla-nsao nuasio numushookeelia uPilipo, numuĩĩla, “Nakulompa umbuĩle, umunakĩdagu witambula nkaani za kuani; mumpola zaakuene anga za muntu wĩngĩ?”

³⁵ uPilipo nuandia kwitambula, nusola ziizo nkaani, nuĩkumutanantĩlia iMpola na Nziiza za kĩYesu.

³⁶ Pĩna alĩ alonguĩle naapika pamaazĩ, numulindĩĩla-nsao nuũga, “Laa ntaaya ĩmaazĩ; yaani naingilia ndekibadĩĩzigua.”

³⁷ uPilipo nuũga, “Anga usuĩĩle kunkolo yaako yensi, ishũũmĩka udũũ.” Nushookeelia nuũga, “Nasuĩĩla ya kĩna ũYesu Kilisito muene muana wa kĩNzua.”

³⁸ Nulagĩĩlia ĩĩmie igyalĩ, naiika uubĩlĩ waao uPilipo numulindĩĩla-nsao mumaazĩ numubadĩĩzia.

³⁹ Pĩna naalega mumaazĩ, uMuau wa kĩShekulu numupũla uPilipo; umulindĩĩla-nsao sika numuona kangĩ; nulongola nuulumbi.

⁴⁰ Ĩpa uPilipo nwigyelela kuAzoto; pĩna alulonguĩle nutanantia impola na nziiza mukaa zensi, sunga nupika kuKaisalia.