Utendi 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Anania nuSapila

¹ Ĩpa umuntu umuĩ ĩliina liakue Anania palumuĩ numusungu waakue uSapila alĩ agulilie nsao,

² naalĩpisia ityũmpĩ lya ngele, umusungu nduyo alumanile, nuleeta ityũmpĩ lĩmuĩ nulĩĩĩka pamĩgulu ya atumua.

³ uPetelo nuũga, “Anania, nĩkĩ ũShetani ukũjuilie ĩnkolo yaako, umuĩĩle ulongo uMuau Muelu nukwipisia ityũmpĩ lya ngele ya mugunda?

⁴ Pĩna alĩ ukoolĩ kumuako sika alĩ nsao yaakone? Nĩpĩna nauguligua sika alĩ wĩĩlĩ muusũũmi waakone? Yatũla mbii nuĩĩka ulukaani ulu munkolo yaako? Sikuaĩĩlĩĩle kaantu ulongo, ĩpa uNzua umuene.”

⁵ uAnania pĩna nwigyũlia inkaani izi, nugua, nutiĩka ĩnkolo. Tũlũ naalĩ igyũlie izi naingĩĩlua nuooa wingĩ.

⁶ ĩasumba naĩĩmĩka, naamutũnga ntiila, naamutuala kunzi, naamuĩĩka mukĩbĩĩla.

⁷ Pĩna nazikĩla zĩ nsaa zitatu, umusungu waakue nũingĩla nduzo alĩ mugila kampola izi naalĩ zigyelĩĩle.

⁸ uPetelo numukollia, “Mbuĩla, alĩ mugulilie umugunda kuuguli wauune? Nuũga, Eeze, kuuguli wau-waauu.”

⁹ uPetelo numuĩĩla, “Yatũla mbii, sunga namukamantana kukumugema uMuau wa kĩShekulu. Laaa, ĩmĩgulu yaao naaza amuĩĩkile ũsheenie ĩkoolĩ panzi pamulango, nĩndĩo ĩkakukutuala kunzi ninduue.”

¹⁰ Ĩkamuĩ nugua pamĩgulu yaakue, nutiĩka ĩnkolo. ĩasumba aasio pĩna naingĩla naamuagaana wakiaa, naamutuala kunzi, naamuĩĩka palumuĩ nũsheeo.

¹¹ iKyanisa liensi sunga tũlũ naalĩ aziigilie izi naingĩĩlua nuoona wingĩ.

Ilĩngasĩĩlio nuukamania naalĩ utendue nĩatumua

¹² Kumĩkono ya atumua ilĩngasĩĩlio iingĩ nĩmakula mingĩ namatendua paantu. Nĩndĩo alĩ akamantĩĩne kunkolo ĩmuĩ mukĩanda kya kĩSolomoni.

¹³ Muĩĩa naĩngĩ, ukutilĩ nunumuĩ naalugimilie kwikamantana nĩndĩo, ĩpa ĩantu alĩ aakulilie.

¹⁴ Naalĩ asuĩlĩĩle naĩongeela mwa kĩShekulu, iingĩ, agoosia nĩasungu;

¹⁵ sunga munzĩla nankulu naĩĩ kuapũnia ĩaluĩle kunzi, naaaĩĩka muulĩlĩ numuipapa, koona uPetelo pĩna wikĩla, umulimĩlĩmĩ waakue udũũ uatambĩĩla ĩĩa.

¹⁶ Nĩantu naalĩ ĩĩlĩ muĩshaalĩ naipilimĩlĩĩlie iYelusalemũ naĩlundĩĩla, naakualeeta ĩaluĩle nĩndĩo naakuagagiguaa nĩmasĩĩmuĩ, naakamigua tũlũ ensi.

uPetelo nuYohana ntongela ilindĩ kangĩ

¹⁷ Nuuuka umpolia namukulu nĩndĩo naalĩ ĩensi ninduyo, ingĩ ityũmpi lya Asadukayo, naijuile uwĩĩlũ,

¹⁸ naaaguĩla ĩatumua naaaĩĩka mukĩtũngo.

¹⁹ Ĩpa uMalaĩka wa kĩShekulu nwigyula ĩmĩlango ya kĩtũngo muutiku nuapũnia, nuũga,

²⁰ “Longolĩ muĩmĩke munumba ya kĩNzua muaĩĩle ĩantu inkaani zensi za Upanga uu.”

²¹ Pĩna naiigia izi, naiingĩla munumba ya kĩNzua kĩlĩ daau naiimania. Nuuza umupolia namukulu nĩndĩo naalĩ ĩensi ninduyo, naaailingĩĩla ĩanilindĩ nĩanampala ensi aĨsilaeli, naatuma ĩantu kukĩtũngo koona aaleete.

²² Ĩpa ĩĩtumi pĩna naapika, sika naaaona mukĩtũngo, naashooka, naapikia impola,

²³ naaũga, “ĩKĩtũngo kukiagaanile kigyalĩlue kĩĩsa, nĩalindĩĩli ĩĩmĩkile pamulango, ĩpa pĩna kwaũgyũla, sika kwamuona kamuntu muasio.”

²⁴ Pĩna naiigia inkaani izi, umukulu wa alindĩĩli a numba ya kĩNzua nĩapolia naakulu naingĩĩlua ninkankani mumpola zaao, naasiitimana ulukaani ulu lukitũla mbii.

²⁵ Nuuza umuntu, nuaĩĩla nuũga, “Laaa, ĩantu aasio naaza muaĩĩkile mukĩtũngo akoolĩ munumba ya kĩNzua, ĩĩmĩkile akuamania ĩantu.”

²⁶ Paapo umukulu wa alindĩĩli nulongola palumuĩ nĩantu aakue naaaleeta, ĩpa sika kungũlũ, kuitĩ alĩ aoopookile ĩantu aleke kuakua ĩmagũe.

²⁷ Pĩna naaaleeta, naaĩĩmĩkia pakatĩ ilindĩ. uMupolia namukulu nuakolekeelia.

²⁸ nuũga, “Sika alĩ kumukonontelĩĩliene mulekimanĩlia muliina ĩlĩ; laaĩ, niniinie mwalijulagiaa iYelusalemũ ĩmamania maani, kangĩ musiiile mukuleetele ishie umugali wa muntu nuasio.”

²⁹ Ĩpa uPetelo nĩatumua naaashookeelia naaũga, “Yukũjĩpĩĩle kukumugombia uNzua kwikĩla ĩantu.

³⁰ uNzua wa atata ĩĩtu alumũiukilie ũYesu naalĩ mumuulagile inie namumusũntia mwikyota.

³¹ uNzua wamukulilie kumukono waakue wa kĩgoosia, wĩĩ Mutongeeli nuMugũni, wamĩpeele ĩĨsilaeli uupeli nuuleegeligua wa mĩlandu.

³² Ishie kuakuĩli ampola izi, nuMuau Muelu gaa, uNzua nukuapeelaa ĩaasio naakumugombagiaa.”

³³ Ĩo pĩna naiigia izi, naatakĩkia, naasiia kukuaulaga.

³⁴ Ĩpa umuntu umuĩ, Mupalisayo, ĩliina liakue Gamalieli munilindĩ, mulangi wa Ulagĩĩlio naalĩ mukuligue nĩantu tũlũ nuĩmĩka pilindĩ, nulagĩĩlia ĩantu aasio apũnigue kunzi kwityũngo niino.

³⁵ Paapo nuaĩĩla, “Agoosia a Ĩsilaeli, mwĩkendegeele kĩna mukakuatendela ĩantu ĩa.

³⁶ Kuitĩ pĩna alĩ zikĩĩlĩ intondo izi, nwigyelela uTeuda nwĩtenda kĩna uzo muntu mukulu, ĩantu zĩ magana manĩĩ naakamantana ninduyo; uyo nuulagua, nĩndĩo ensi naalĩ amutiatile naapalansana naitũla sika kĩntu.

³⁷ Pembele nwigyelela ũYuda Mugalĩlaya, pantondo za kuandĩka ĩmiina, nualũta antu ĩĩa naamulondeela, ninduyo nulimĩĩla, nĩndĩo ensi naalĩ amutiatile naapalansana.

³⁸ Ĩpa ino nukumuĩĩla, ĩsuga-nsugĩ nĩantu ĩa, alekĩ; ĩpa anga ĩmasĩĩgo aya numulĩmo uu ĩupũnile kuantu, ukioononeka,

³⁹ ĩpa anga ĩupũnile kwa kĩNzua sika musũũmile kukuwoonoona, koona muleke kigyelela kĩna mukĩkua nuNzua.”

⁴⁰ Naamũigia, nĩndĩo pĩna naaĩĩta ĩatumua, naaakua, naaalagĩĩlia alekitambula kuliina lya kĩYesu, naalekela.

⁴¹ Iio gua, ndĩo naapũna mũlindĩ liasio, nailumba kunsooko alĩ aalĩĩligue kĩna alĩ ijĩpĩĩle kwimelua kunsooko ya liinaa liakue.

⁴² Mumeelele, nuMunumba ya kĩNzua numunumba zaao sika alĩ akulekaa kwimania nukwitanantia iMpola naNziiza za kĩYesu kĩna ingĩ Kilisito.