Utendi 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwikamigua kumuakue umunakĩtele naalukulompa

¹ uPetelo nuYohana alĩ inankĩla kwienda ensi kuNumba ya kĩNzua pityũngo lya ulompi nsaa ikyenda.

² Numuntu umuĩ naalĩ munakĩtele kwipũna mundaa ya kĩnina alukukenkaguaa nĩantu, numuĩĩka pamulango wa Numba ya kĩNzua naukuĩtagũaa Muuza, walompe iipeegua kuantu naiingĩla muNumba ya kĩNzua.

³ Uzo pĩna numuona uPetelo nuYohana iingĩla muNumba ya kĩNzua, nulompa wapeegue kĩpeelo.

⁴ uPetelo numutuupĩĩla palumuĩ nuYohana nuũga, “Kulaae ishie.”

⁵ Nualaaĩkia, nusĩĩgile ukipeegua kĩntu ndĩo.

⁶ Ĩpa uPetelo nuũga, “iMpiia nĩzahabũ numugila, ĩpa nanikĩtĩĩte, kĩĩkio nukukupeela. Kuliina lya kĩYesu Kilisito Munazaleti, ĩĩmĩka ugende.”

⁷ Numũtyapa kumukono waakue wa kĩgoosia, numunansula; ĩkamuĩ ĩmĩgulu yaakue niing'ueng'ue yaakue nailigia ngũlũ.

⁸ Nupũũta, nuĩmĩka, nugenda; nũingĩla muNumba ya kĩNzua palumuĩ ndĩo, nwigenda, nwipũũta pũũta nukukumukũmazukia uNzua.

⁹ Antu tũlũ naamuona wigenda nukukumukũmazukia uNzua.

¹⁰ Naamumana ya kĩna muene alukuuzaa nwikyalansile nukwilompa iipeegua pamulango Muuza wa Numba ya kĩNzua. Naijulua numuntũmbĩ nuukũmia mumpola izi naalĩ zigyelĩĩle kumuakue.

Utanantia wa kĩPetelo muNumba ya kĩNzua

¹¹ Paapo pĩna aluityapile uPetelo nuYohana, antu tũlũ naĩlundĩkĩĩla kuukaaũ kumuao mukĩanda nakyukuĩtaguaa kĩanda kya kĩSolomoni, naakulĩlua dũũ.

¹² uPetelo pĩna nuona izi nuaĩĩla ĩantu, “Agoosia a Ĩsilaeli, nĩkĩ mũkulĩlua izi, sunga nukukukutuupĩĩla ishie zĩ kĩna ndiishie kumutendile uzo wagende kungũlũ zĩĩtu undiishie, katia kunsooko ya ukulia-Nzua wĩĩtu.”

¹³ uNzua wa kĩĨbũlahimu nuĨsakĩ nuYakobo, uNzua wa atata ĩĩtu wamukulagiaa uMwĩtumi waakue ũYesu, uuyo inie naalĩ mumusakilie nukukumukaana ntongela ya kĩPilatu pĩna alupũnilie ulamuli umuasio watũnguĩlue.

¹⁴ Inie gua namumukaana uyo naMuelu na Munakulukuuluu, namulooa mupeegue umuulagi,

¹⁵ namumuulaga uyo uMuandio wa upanga, uyo uNzua naalumũiukilie kwipũna muakiu, nindiishie kuakuĩlli aakue.

¹⁶ ĩLiina liakue, nukuusuĩĩli muliina liakue, lyumupĩĩle ingũlũ umuntu uyu namumuoonie nukukumumana; nuusuĩĩli mwa kĩYesu wamupeelaa uyu uumuĩ wa kapanga ntongela yaani inie tũlũ.

¹⁷ Ĩpaino anũna aane, manile ya kĩna alĩ mutendile izi kuusiitimana, kĩna iio ĩakulu aani naalĩ atendile.

¹⁸ Ĩpa impola izo naalutanantilie uNzua kwipũna ĩkalĩ kumĩlomo ya anakĩdagu tũlũ, ya kĩna uKilisito waakue ukiaagigua; ziizo watimĩlĩĩlie itĩ.

¹⁹ Pelĩ gua, mupĩluke, ĩmĩlandu yaani ĩlimansĩĩligue, koona maaze ĩmatũngo ma usepeeleki namapũnile kwa kĩShekulu;

²⁰ koona wamutume uKilisito naalĩ muaĩĩkĩligue kwipũna ĩkalĩ, muene ũYesu,

²¹ naalĩ yumũjĩpĩĩle kwiaanũnkulua kwigyulu, sunga maaze ĩmatũngo ma kutendua upia intu tũlũ, naalĩ matambulue nuNzua kumĩlomo ya anakĩdagu aakue naeelu kwipũna iyuukĩ ĩkalĩ.

²² Kuitĩ uMusa nuũga, “ũShekulu Nzua ukakumunansulĩlia inie munakĩdagu nukipũna muanũna aani zĩ uneene; mukakumũigia mumpola tũlũ nukakumuĩĩla.

²³ Kangĩ ikitũla ya kĩna muntu wensi nasikukamũigia umunakĩdagu uyo ukioononeka nukwileegigua pakatĩ ya antu aakue.”

²⁴ Kangĩ nĩanakĩdagu tũlũ kwipũna uSamueli nĩndio naalĩ amutiatile, tũlũ naalĩ atambuĩle alĩ atanantilie impola za ntondo izi.

²⁵ Inie mwĩaana a anakĩdagu nilyago uNzua naalĩ ilagaanile nĩatata aani pĩna numuĩĩla uIbũlahimu, “Muwĩleli wako indugu tũlũ za unkũmbigyulu zikikembetua.”

²⁶ Nzua pĩna numũiukia kwupũna muakiu uMwĩtumi waakue Yesu, numutuma kumiani tangua, wa mukembete wamuleegie wensi mumuani kwipũna muubĩĩ waakue.