Utendi 20 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Paulo kuMakedonia, Ugiliki nĩTiloa

¹ ĩKĩlanga pĩna nakĩkĩla, uPaulo nuĩĩta ĩamanigua, nuakamia nkolo, naĩlaga nĩndĩo, nulega wende kuMakedonia.

² Pĩna alukĩlĩĩle inandĩ zaasio nukukuakamia inkolo nukukuaĩĩla inkaani ningĩ, nupika kuUgiliki.

³ Kuasio nũkyala mieli ĩtatu. Nuloma wende kũShamũ kunzĩla ya munanza, ĩpa pĩna ĩAyahũdi naakomia ĩkialo kya kĩmpisĩ-mpisĩ kumuakue, nuloma washooke pakatĩ ya Makedonia.

⁴ ĩAntu ĩa naĩtiata palumuĩ ninduyo, uSopatilo sha Pilo nwa kuBeloya, uAlisitaliko nuSekundo naalĩ Atesaloniki, nuGayo nwa kuDelibe, nũTimoteo; nuTikiko nuTilofimo a kuAsia.

⁵ ĩAsio naatongela naakulindĩla kuTiloa.

⁶ pĩna nazikĩla intondo za ugalĩ naugila igaaĩ, nakupuuta ĩnanza kwipũna kuPilipi, nakuaagaana kuTiloa, musĩnzo wa ntondo zitaano, nakudĩĩla kuasio ntondo mupũngatĩ.

Eutiko

⁷ Palutondo lwa muandio lwijũma pĩna alĩ kwĩilingĩlĩĩle koona kuuege ugalĩ, uPaulo naĩtambuĩla nĩndĩo, nwiloma kwilega mudaau yaakue, nuulĩĩpia uutambuli waakue sunga kuutiku wa katĩ.

⁸ Alĩ zikolĩ intala ningĩ kwityembe lya kukiania muasio muna alĩ kwĩlundĩlĩĩle.

⁹ Musumba umuĩ, ĩliina liakue Eutiko alĩ wikyalansile pidilishia, nusũũmua nindoolo doo, sunga pĩna uPaulo alulongolekile kwitambula, nusũũmĩkigua nindoolo nugua kwipũna kwityembe lya kukiania lya katatu, nuuukigua wakiaa.

¹⁰ Ĩpa uPaulo nũika, nutũna, numukũmbasĩla, nuũga, “Lekĩ ĩkĩlanga, kuitĩ uupanga waakue kĩlĩ ukoolĩ mumuakue.”

¹¹ uPaulo nunankĩla kukiania kangĩ, nuuega ugalĩ, nulĩa, naĩtambuĩla nĩndĩo sunga naweela, paapo nulega.

¹² Naamuleeta umusumba mupanga, naapumbuligua dũũ.

Musĩnzo wa kuMileto

¹³ ĩpa ishie nakutongela kwienda kwipyango, nakupũũta ĩnanza kwienda kuAsia, nakusĩĩgile kukumusola uPaulo kuasio, kuitĩ iio alulagĩlĩĩlie, uzo umuene alulomile wende namĩgulu.

¹⁴ Pĩna nakuagaana kuAso, nakumũingĩlia mwipyango nakupika kuMitilene.

¹⁵ Nakugendia ipyango kwipũna kuasio, lutondo lwa kabĩlĩ nakupika kwitungĩnkana kuKio. Lutondo lwa katatu nakupika kuSamo, nakuĩma kuTilogilio; lutondo lwa kanĩĩ nakupika kuMileto.

¹⁶ Kuitĩ uPaulo nuloma wakĩlĩle kuEpeso nipyango, walekitinia muAsia, kunsooko alĩ wĩkangasĩlĩĩlie wapike kũYelusalemũ kulutondo lwa Pentekoste, anga ishũũmĩkile.

Paulo ukualaga ĩanampala a kuEpeso paMileto

¹⁷ Kwipũna kuMileto nuatuma antu ende kuEfeso, nuĩĩta ĩanampala ikyanisa.

¹⁸ Pĩna naapika kumuakue, nuaĩĩla, “Inie uniinie mumanile kĩna alĩ nĩĩlĩ mumiani intondo zensi kwipũna ulutondo lwa muandio pĩna alĩ nijile ĩpa pĩna Asia,

¹⁹ nanukumutumĩla uNzua kuwĩniinupia wensi nukumisholi, nĩmagemua naalĩ ndigilie ĩne kukialo kya kĩmpisĩ-mpisĩ kya Ayahũdi.

²⁰ Sika nandeka kukumutanantĩlia ulukaani nalusũũmile kukumupeela ĩnsaĩlo, ĩpa alĩ numumanilie kualiĩ, kangĩ numba kunumba.

²¹ Nanĩakuĩlĩkia ĩAyahũdi nĩAgiliki apele ntongela ya kĩNzua, nukwishuĩĩla mwa kĩShekulu wĩĩtu Yesu Kilisito.

²² Laaĩ, ĩpaino nalongola kũYelusalemũ numutũngue nuMuau; sika manile impola nazikinjagaana ĩne kuasio,

²³ isiititũla uMuau Muelu kuuzaa unkuĩlĩĩle mukaa zensi kĩna uutũngua nimpatĩ zinindĩĩle.

²⁴ ĩpa sika nsĩĩgile kĩna uumĩ waane ingĩ kĩntu kya nsaĩlo kumuane; lukoolĩ lukaani lumuĩ udũũ, malĩĩlie ulugendo luane, nuwĩtumi naalĩ nuwaanũnkuĩle kwa kĩShekulu Yesu, kukuzikuĩla iMpola na Nziiza za ukende wa kĩNzua.

²⁵ “Laaĩ, ĩpaino ĩne manile kĩna inie tũlũ ensi, pakatĩ yaani naalĩ numutanantĩĩlie impola za utendi wa kĩNzua, sika mukiona uusiu waane kangĩ.

²⁶ Luulo, gua numukuĩlĩĩle inie tũlũ ensi nantende ya kĩna ĩne numugila kautimu kumĩgali yaani tũlũ ensi,

²⁷ Kuitĩ sika alĩ ndekile kukumutanantĩlia uulooa tũlũ wensi wa kĩNzua.

²⁸ ĩkendegeelĩ uniinie akola, nidyale liensi paasio pĩna uMuau Muelu umuĩĩkile inie muĩ akendegeeli, mulĩdĩĩme ikyanisa lya kĩNzua naalĩ wĩligĩĩlie kumugali waakue umuene.

²⁹ Ĩne manile kĩna pĩna nikilega, iyĩngi naataki ikiingĩla pakatĩ yaani nasika ĩkakulĩkolelua idyale.

³⁰ Sunga pakatĩ yaani antu ĩkakigyela iitambula ĩza ulimĩĩli, aalũte ĩamanigua akamantane nĩndĩo.

³¹ Luulo gua, kengealĩ mũjuke kĩna miaka ĩtatu utiku nĩmunsĩ sika alĩ ndekile kukumusugula wensi kumisholi.

³² “Ĩpaino namuĩĩkaa mumĩkono ya kĩNzua numulukaani lwa ukende waakue nalusũũmile kukumuzenga nukukumupeela uusaali palumuĩ nĩndĩo ensi naeeligue.

³³ Sikaaalĩ numuawe kampiia katia zahabũ katia majialo mamuntu wensi.

³⁴ Inie uniinie mumanile ya kĩna ĩmĩkono yaane ĩĩ yĩtumile kuusilĩlua waane sunga kuaasio naalĩ kwĩpalumuĩ nineene.

³⁵ Munkaani tũlũ numulagĩlĩĩlie ya kĩna kukuuamba umulĩmo itĩ, yumũjĩpĩĩle muĩalĩĩlie ĩaneketũ nukukuzijuka inkaani za kĩShekulu Yesu kĩna alutambuĩle umuene, ‘Yukuleetaa ulumbi kwipeelana kwikĩla kwipeegua.’”

³⁶ Pĩna alutambuĩle itĩ, nutũngama, nulompa palumuĩ nĩndĩo tũlũ ensi.

³⁷ Ensi naalĩla dũũ, naamukũmbasĩla uPaulo munkingo, naamusunĩkia.

³⁸ Naatũla nuusungu nangũlũ kunsooko ya lukaani luasio naalulutambuĩle, ya kĩna sika ĩkakumuona kangĩ uusiu waakue. Naamutindĩkĩĩlia sunga kwipyango.