Utendi 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muandio

¹ Mukĩtabũ kya muandio, Shekulu Teopilo, alĩ nandĩkile impola za nkaani tũlũ naalĩ wandilie ũYesu kwitenda nukwimania,

² sunga kulutondo pĩna alĩ musole kwienda kwigyulu, pĩna nukondia kukualagĩĩlia kunzĩla ya kĩMuau Muelu ĩatumua naaluasaaguĩle.

³ Kuaasio nũigyeleela kĩna mupanga kuukuĩlĩ wingĩ pĩna nukondia kwiaagigua, nuĩ kũigyeleelaa kuntondo makumi manĩĩ nukwitambula impola za utemi wa kĩNzua.

⁴ Pĩna naĩona nĩndĩo nualagĩĩlia; alekipũna mũYelusalemũ, ĩpa lĩlindĩlĩ ilyago lya kĩ Tata, naalĩ muliigilie kumuane,

⁵ ya kĩna uYohana alukubadĩĩzagiaa kumazĩ, ĩpa inie mukibadĩĩzigua kuMuau Muelu muntondo zoziizi.

Kwinankĩla kumuakue ũYesu

⁶ Iio gua, pĩna naĩlundĩĩla naamukolia naaũga, “Shekulu, zozi ntondone pĩna ukakumĩshookelia ĩĨsilaeli uutemi.”

⁷ Nuaĩĩla, “Sika mulĩmo waani kwimana intondo kamuĩ matũngo uTata naalumaĩĩkile kuusũũmi waakue umuene.

⁸ Ĩpa mukiaanũnkula ingũlũ pĩna uMuau Muelu wamuuzĩĩla; niniinie mukitũla akuĩli aane mũYelusalemũ numuUyahũdi wensi numuSamalia, sunga kumpelo ya nsĩĩ.”

⁹ Pĩna nutambula izi, pĩna alĩ kĩlĩ ilaaa, nunansulua, lyũmde nalĩmuanũnkula pamiiso maao.

¹⁰ Pĩna alĩ kĩlĩ alangamĩĩle kwigyulu pĩna alulonguĩle, laaa, antu abĩlĩ naĩĩmĩka piipĩ nĩndĩo naajialile ntiila nzelu,

¹¹ naaũga, “Inie adĩinie antu a Galĩlaya, nĩkĩ muĩmĩkile mwilaaa kwigyulu. ũYesu uyu naaza musolue kwipũna kumiani kwienda kwigyulu, ukiiiza iio-iioo kĩna aza mumuoonie naazulonguĩle kwigyulu.”

Kwishaagula umutumua nwikyumi nakabĩlĩ

¹² Paapo naashooka kwienda kũYelusalumũ kwipũna kunkonko nyukuĩtaguaa Mĩzeituni nĩpiipĩ niYelusalemũ zĩ lugendo lwa lutondo lwa wikyali.

¹³ Pĩna naingĩla, naanankĩla kwityando lya mukiania ityembe pĩna alĩ akikyalaa, uPetelo nuYohana, nuYakobo; nuAndelea, nuPilipo, nuTomaso, nuBalitomayo, nuMatayo, nuYakobo ũshaAlipayo, nuSimoni uZelote, nũYuda sha Yakobo.

¹⁴ Ĩa tũlũ alĩ akamantĩĩne munkolo ĩmuĩ muulompi palumuĩ nĩasungu, nuMalia unina wa kĩYesu, nĩanũna aakue.

¹⁵ Pantondo zaasio nuĩmĩka uPetelo pakatĩ ya anũna (iyalo lya antu alĩ lialĩĩ gyana nĩmakumi mabĩlĩ;) nuũga,

¹⁶ agoosia anũna aane, ijĩpĩĩle uwandĩkua utimĩĩligue naalĩ utambulue nuMuau Muelu pakalĩ kumulomo wa kĩDaudi, mumpola za kĩYuda naalĩ mutongeeli wa aasio naalĩ amuguĩlĩle ũYesu.

¹⁷ Kuitĩ alĩ mukamantanigue palumuĩ nindiishie, nuligia ityũmpĩ lya wĩtumi uu.

¹⁸ Iio gua, uzo, alugulile mugunda kuuguli wa uonelani, nwitaamĩlia nutanduka, ĩmala maakue mensi namapũna.

¹⁹ Nazigyelela kuantu tũlũ naikyalile mũYelusalemũ; sunga umugunda waasio nuĩtua kuntambo yaao, Akelidama, ndogolelio yaakue. Mugunda wa mugali.

²⁰ Kuitĩ yandĩkue mukĩtabũ kya Malumbĩĩlio, “uWikyalo waakue wĩĩ shaamua, ‘Wĩĩ ukutilĩ nwakikyala muasio,’ Kangĩ; ‘uUlindĩĩli waakue wausole wĩngĩ.’

²¹ Iio gua, muantu naalĩ kuuzaa kwĩtiatile nindiishie intondo tũlũ pĩna ũShekulu Yesu alukuuzaa nũingĩla nukwipũna kumuĩtu,

²² kwiandia kwipũna uubadĩĩzo wa kĩYohana sunga palutondo pĩna alĩ musolue kumiĩtu kwienda kwigyulu, ijĩpĩĩle umuĩ waao watũle mukuĩli wa wiiuki waakue palumuĩ nindiishie.”

²³ Naaaĩĩka abĩlĩ, uYosepu naalukuĩtaguaa Balisaba naalutĩĩte liina lĩĩa Yusito, nuMatia.

²⁴ Naatũlilompa, naaũga, “Ue Shekulu numanile inkolo za antu tũlũ, kulagĩĩle waani numusaaguĩle muĩĩa naabĩlĩ,

²⁵ walĩsole ĩlioma lya wĩtumi uu nuutumua uu nwaulekile ũYuda, wende kuluandĩ luakue umuene.”

²⁶ Naakuĩla nsimbi; ĩnsimbi nyĩmuguĩĩla uMatia; nusagulua wĩĩ palumuĩ nĩatumua naikyumi numuĩ.