Ukũnukulua 7 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kuyĩkĩlua Mintoozo naigyana nĩ makumi manĩĩ namanĩĩ manzogu

¹ Pĩna naikĩla yaasio, namona amalaĩka anĩĩ ĩĩmĩkile kunandĩ zinĩĩ za nsĩĩ, naakuzigilia injega nazinĩĩ za nsĩĩ, ĩnzega ĩlekikũnka munsĩĩ, sunga munanza sunga mũkyota tũlũ liensi

² Namona malaĩka wĩngĩ, nwinankĩla kwipũna kĩna ĩmpasu yukutuĩlaa, utĩĩte umuntoozo wa kĩNzua namupanga, nuatuntĩĩla kululi lukulu ĩamalaĩka aasio naanĩĩ naalĩ apegue kwioonoona ĩnsĩĩ nĩnanza,

³ nuũga, “Muleke kumioonoona ĩnsĩĩ sunga ĩnanza sunga ĩmakota sunga kuaĩĩkĩle mĩntoozo ĩĩtumi a kiNzua wĩĩtu muusiu waao.”

⁴ Naniigia iyalo liao naalĩ aĩĩkĩlue ĩmĩntoozo muluuli luensi lwa aana a Ĩsilaeli, antu magana ma nzogũ gyana lĩmuĩ nĩmakumi manĩĩ namanĩĩ.

⁵ A luuli lwa kĩYuda magana ma nzogũ kyumi namabĩlĩ naalĩ aĩĩkilue ũmuntoozo. A luuli lwa kĩLubeni magana ma nzogũ kyumi namabĩlĩ, A luuli lwa kĩGadi magana ma nzogũ kyumi namabĩlĩ,

⁶ A luuli kwa kĩAsheli magana manzogũ kyumi namabĩlĩ, A luuli lwa kĩNapũtali magana ma nzogũ kyumi namabĩlĩ, A luuli lwa kĩManase magana ma nzogũ kyumi namabĩlĩ.

⁷ A luuli lwa kĩSimoni magana ma nzogũ kyumi namabĩlĩ, A luuli lwa kĩLawi magana ma nzogũ kyumi namabĩlĩ, A luuli lwa kĩIsakalĩ magana ma nzogũ kyumi namabĩlĩ,

⁸ A luuli lwa kĩZabũloni magana ma nzogũ kyumi namabĩlĩ, A luuli lwa kĩYusupũ magana ma nzogũ kyumi namabĩlĩ, A luuli lwa kĩBenjamini magana ma nzogũ kyumi namabĩlĩ naalĩ aiikĩlue ũmuntoozo.

uYohana ukuaona naakomolue kwigyulu

⁹ Pĩna naikĩla yaasio namona, laaa katĩ, mulundo mukulu nangũlũ kutilĩ nusũũmile kukuualia, antu a ndugu yensi ninduuli zensi nĩantu ensi nintambo zensi, ĩĩmĩlike ntongela ityengu lya kĩtemi, nĩntongela ya Muana-nkolo, ajialue majialo meelu, atĩĩte ntambĩ za mĩpaama mumĩkono yaao,

¹⁰ naĩtunta kululi lukulu, naaũga, “Ugũnua ingĩ mwa kĩNzua wĩĩtu nwikyalansile mwityengu lya kĩtemi, numuMuana-nkolo!”

¹¹ Nĩamalaĩka tũlũ ĩĩmĩkile nandĩ zensi zityengu lya kĩtemi, nĩza anampala, nĩza iyumbe naipanga inĩĩ; naagua uũndaala ntongela ityengu lya kĩtemi, naamwĩtekela uNzua,

¹² naaũga, “Amini! Ukũmazukia nuukulu nĩmasala nishoongelio nikyulio ningũlũ nuusũũmi wĩĩ kwa kĩNzua wĩĩtu ĩkalĩ nakalĩ! Amini.”

¹³ Nushookeelia umuĩ wa anampala numbuĩla, “ĩAntu ĩa naajialue ĩmajialo meelu, aani gua, ndĩo apũnile mpĩĩ?”

¹⁴ Nanumuĩĩla; “Shekulu waane, umanile uuue.” Numbuĩla, “ĩAasio aao naapũnile muluago nalukulu, ndĩo akanzile ĩmajialo maao naameelia mumugali wa Muana-nkolo.

¹⁵ Luulo gua akoolĩ ntongela ityengu lya kĩtemi lya kĩNzua, ndĩo akumutumĩlaa munsĩ nuutiku munumba yakue; ninduyo nwikyalansile mwityengu lya kĩtemi ukakikyala palumui nindĩo.

¹⁶ Sika ikikolua kanzala kangĩ, sunga sika ikikolua kanoota kangĩ; sunga ĩmpasu sika ĩkakuasonsa, katia upiu wensi.

¹⁷ Kuitĩ uMuana-nkolo nuĩlĩ pakatĩ ityengu lya kĩtemi kakuadĩĩma. nduyo ukakuatongeela kunjiĩlio za maazĩ ma upanga, uNzua ukipiagula ulũsholi luensi mumiiso maao.”