Ukũnukulua 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uYohana ukumuona uMuana-nkolo wa kĩNzua

¹ Namona mumukono, nwa kĩgoosia waakue, uyo nwikyalansile mwityengu lya kĩtemi,, mbũgũlũ naalĩ nandĩkue munsĩ nukunũma, mbĩĩkĩlue mĩntoozo mupũngatĩ.

² Namona malaĩka nwa usũũmi witanantia kululi lukulu, “Waani nwijĩpĩĩle kukumĩkũnukula ĩmbũgũlũ, nukwiũnanga ĩmintoozo yaakue?”

³ Nayĩĩ kutilĩ kaumuĩ mwigyulu sunga muna nsĩĩ, sunga munsĩ ya nsĩĩ naalũsũũmile kukumĩkũnukula ĩmbũgũlũ sunga kukumĩlaa.

⁴ Nandĩla dũũ kunsooko sika nugyela kaumuĩ nwijĩpĩĩle kukumĩkũnukula ĩmbũgũlũ katia kukumilaa.

⁵ Umuĩ wa anaampala numbuĩla, “Lekilĩla; laaa ĩNsimba nya muluuli lwa kĩYuda, lina lya kĩDaudi, wadulile koona wamĩkũnukule ĩmbũgũlũ nĩmĩntoozo yaakue namupũngatĩ.”

⁶ Namona pakatĩ ityengu lya kĩtemi, niiumbe naipanga inĩĩ, nĩpakatĩ ya anampala, Muana-nkolo wĩĩmĩkile zĩ muulague, nutĩĩte mpembe mupũngatĩ nĩmiiso mupũngatĩ, ziizo nkolo mupũngatĩ za kĩNzua naalĩ ntumue muna nsĩĩ tũlũ pensi.

⁷ Nuuza numĩsola ĩmbũgũlũ mumukono nwa kĩgoosia unuakue uyo nwikyalansile mwityengu lya kĩtemi.

⁸ Pĩna numĩsola ĩmbũgũlũ, iiumbe naipanga inĩĩ nĩanampala namakumi mabĩlĩ naanĩĩ naagua ntongela ya Muana nkolo, wensi waao utĩĩte lusumbĩ, niisheme ya zahabũ naalĩ ijuile ulũmba, nduo ingĩ ulompi wa eelu.

⁹ Ndĩo Iĩmba liĩmbo pia, naiũga, “Wijĩpĩĩle ue kukumĩsola ĩmbũgũlũ nukukuĩunanga ĩmĩntoozo yaakue; kunsooko umuulague, nukumugali waako numugulĩlia uNzua ĩantu kwipũna muluuli luensi, nĩntambo, nĩantu, nĩndugu,

¹⁰ nuatenda ĩĩ utemi kangĩ apolia kwa kĩNzua wĩĩtu; ndĩo ikitema muna nsĩĩ.”

¹¹ Namona, kangĩ naniigia nduli za amalaika iingĩ inandĩ zensi zityengu lya kĩtemi nĩza iyumbe naipanga, nĩza anampala, luli lwa amalaĩka iingĩ, niyalo liao alĩ magana manzogũ kyumi nkua magana manzogũ kyumi, kangĩ magana manzogũ nkua magana manzogũ;

¹² ndĩo naaũga kululi lukulu, “Wijĩpĩĩle uMuana-nkolo naalĩ muulague, kwiaanũnkula ingũlũ, nuugolĩ, nĩmasala, nuusũũmi nikyulio nuukulu nuukũmazukia!”

¹³ Nĩkĩumbe kiensi nakiĩlĩ mwigyulu numuna nsĩĩ numunsĩ ya nsĩĩ numunanza, niintu tũlũ yensi naikoolĩ mumuakue, naniigia naiũga, “Ukũmazukia nikyulio nuukulu nuusũũmi wĩĩ kumuakue uyo nwikyalansile mwityengu lya kĩtemi, nukuMuana-nkolo sunga ĩkalĩ nakalĩ!”

¹⁴ Niiumbe naipanga inĩĩ naiũga, “Amini!” Nĩanampala naagua nukukĩtekela.