Ukũnukulua 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mbalua kũkyanisa lya Salidi

¹ “Nukwa kĩmalaĩka nwikyanisa naliĩlĩ muSalidi andĩka, ‘Izi zozi uũgile uyo nutĩĩte inkolo mupũngatĩ za kĩNzua, ninshonda nazĩ mupũngatĩ. Manile uutendi waako, kĩna utĩĩte ĩliina lya kutũla mupanga, ninduue wakiile.

² Wĩĩ mukengeali, uzikamĩnkĩĩlie nazishaagile, nazaakiikia kunsooko sika moonie uutendi waako kĩna ukondeelekile ntongela ya kĩNzua waane.

³ Juka gua, kĩna aluanũnkuĩle, nĩkĩna alũigilie; ziambe ziizo nukwipela. Ĩpa gua, kanga usiitikengeala, nikiiza kumuako zĩ mũii, ninduue sikukakulĩmana ityũngo nanĩkakukuuzĩĩla.

⁴ Ĩpa kĩlĩ utĩĩte miina makeei muSalidi, ĩantu nasika amadobilie ĩmajialo maao. Nĩndĩo ikienda palumuĩ nineene mumajialo nameelu, kuitĩ ijĩpĩĩle.

⁵ Uyo nudulile ukijialua majialo nameelu, kangĩ sika nikilimansĩĩlia ĩliina liakue mukĩtabũ kya upanga. Nineene nĩkakulĩkũmuula ĩliina liakue ntongela ya kĩTata waane, kangĩ ntongela ya amalaĩka aakue.

⁶ Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa.’”

Mbalua kũkyanisa lya Piladelipia

⁷ “Nukwa kĩmalaĩka nwikyanisa naliĩlĩ muPiladelipia andĩka, ‘Izi zozi uũgile uyo namuelu, nwa tai, nutĩĩte ũlugyũilo lwa kĩDaudi; nduyo mukola kigyula sunga kutilĩ nwakigyalila; nduyo ukigyalĩlaa sunga kutilĩ nwakigyula.’

⁸ Manile uutendi waako. Laaa nakupeela umulango namũgyulue ntongela yaako, kaangĩ kutilĩ nusũũmile kukuũgyalĩla. Manile kĩna utĩĩte ingũlũ nkeei, ĩpa ulukendegelĩĩle ulukaani luane, kangĩ sika nulĩkaana ĩliina liane.

⁹ Laaa, nakupeela naa mũshũnagogi lya kĩShetani, naakutambulaa kĩna ĩo ingĩ Ayahũdi, ndĩo sika eene, ĩpa itambula ulongo. Laaa, nĩkakualeeta atũngame pamĩgulu yaako nukwimana kĩna ĩine nukuloilue.

¹⁰ Kuitĩ alulukendegelĩĩle ulukaani lwa ugigimĩlia waane, nineene nĩkakukulindĩĩla mwityũngo lya kugemua nalĩpiipĩ kukuwaagaana uunkũmbigyulu tũlũ kukuagema naakikyalaa muna nsĩĩ.

¹¹ Laaa nijile kuukaaũ; tyapĩkia nukĩtĩĩte walekiiiza umuntu wakuleegelie ĩngala yaako.

¹² Uyo nudulile nĩkakumutenda wĩĩ kĩsĩmbĩlĩ munumba ya kĩNzua waane; sikukipũna kangĩ muasio. Nineene nikiandĩka mumuakue ĩliina lya kĩNzua waane, nĩliina lya kaa ya kĩNzua, Yelusalemũ nampia, niikile kwipũna kwigyulu kwa kĩNzua waane, nĩliina liane ling'ene nĩpia.

¹³ Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa.”

Mbalua kũKyanisa lya Laodikia

¹⁴ “Nukwa kĩmalaĩka nwikyanisa naliĩlĩ muLaodikia andĩka, ‘Izi zozi uũgile uyo naAmini, Mukuĩli namusuĩĩli, kangĩ nwa tai, iyuukĩ lya iyumbe ya kĩNzua.’

¹⁵ Manile uutendi waako, ya kĩna sika umupolo sunga sika umupiu; aza ijilitũla iiza kanga ĩutulile wĩmupolo katia umupiu!

¹⁶ Iio gua, kunsooko wĩmuũmbukũ, kangĩ sika umupolo sunga sika umupiu, nĩkakukuluka kwipũna mumulomo waane.

¹⁷ Kuitĩ utambuĩle; Ĩne numugolĩ, nĩgolĩpagiaa, kutilĩ nanumusilĩlue; ninduue sikumanile kĩna ue umukĩa, wakukolelua kĩnishungu, umutũka, umupokũ, kangĩ ukĩpuĩ.

¹⁸ Nakupeela ĩkialo, ugule kumuane ĩzahabũ naalĩ nkulusue kumooto, koona wĩĩmugolĩ; nĩmajialo nameelu, koona umajiale, inshooni za kĩpuĩ kiako zileke kigyelela; numukota wa kĩpaka ĩmiiso maako koona uone.

¹⁹ Ĩpa nukuanaganĩlaa tũlũ nanĩaloilue, nukukualanga; luulo gua, utũle nukamatĩkũ, upele.

²⁰ Laaa, nĩĩmĩkile pamulango nikinintia; umuntu kanga wiigie ululi luane nukukigyula uluĩgĩ, nikiingĩla kumuakue, nikilĩa palumuĩ ninduyo, ninduyo palumuĩ nineene.

²¹ Uyo nudulile, nĩkakumupeela kukikyalansa palumuĩ nineene mwityengu liane lya kĩtemi, zĩ uneene naalĩ ndulĩle nanikyalansa palumuĩ nuTata waane mwityengu liakue lya kĩtemi.

²² Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmaKanisa.”