Ukũnukulua 21 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Gyulu nĩpia nĩnsĩĩ nampia

¹ Namona gyulu pĩa nĩnsĩĩ mpia; kunsooko igyulu lya muandio nĩnsĩĩ nya muandio alĩ zakĩlile, sunga kutilĩ kananza kangĩ.

² Namona ĩkaa nanzelu, Yelusalemũ mpia, iiika kwipũna kwigyulu kwa kĩNzua yakonda kwijĩpĩĩligua, kĩna mutĩĩzĩla moogeeligue kumugoosia waakue;

³ Naniigia luli lukulu kwipũna mwityengu lya kĩtemi naluũga, “Laaa, wikyaalĩ wa kĩNzua wĩpalumuĩ nĩantu, nduyo ukakikyala palumuĩ ndĩo, nĩndĩo ikitũla antu aakue, uNzua umuene ukitũla palumuĩ ndĩo.

⁴ Ukipiagula ulũsholi luensi mumiiso maao, nĩnkia ikitũla yukutilĩ kangĩ; sunga ukiu nĩkĩlĩlo nuuwai ukitũla ukutilĩ kangĩ, kunsooko ĩza muandio zakondile kwikĩla.”

⁵ Nduyo nwikyalansile mwityengu lya kĩtemi nuũga, “Laaa, mensi nukumatenda mĩĩ mapia.” kangĩ, “Andĩka, kuitĩ inkaani izi ingĩ za usuĩĩli nĩza tai.”

⁶ Numbuĩla, “Yakondaa kwitũla! Ine neene Alipa nĩOmega, Muandio nĩMpelo. Namukolue ĩnoota, nĩkakumupeela nakanda ĩmaazĩ namapũnile munjiĩlio ya maazĩ ma upanga.

⁷ Nudulile ukakumasaala aya, nineene nikitũla Nzua waakue, ninduyo ukitũla muana waane.

⁸ Ĩpa ĩooa, nĩasiitishuĩĩla nĩasuukĩlia, nĩaulagi, nĩagololia, nĩalaguli, nĩnaakĩtekelaa ĩanzegamĩla, nĩalongo ensi, ityũmpĩ liao liĩlĩ munanza ĩyoo nyukuakĩlaa umooto nĩkĩbiliti-biliti. Ĩĩ yoĩ nkia ya kabĩlĩ.”

Yelusalemũ nya kwigyulu

⁹ Nuuza umuĩ wa amalaĩka naa mupũngatĩ naalĩ atĩĩte iisheme namupũngatĩ naijuile ĩmakuo mupũngatĩ ma mpelo, nwĩtambuĩla nineene, nuũga, “Nzuu kunu, nĩkakukulagĩĩla umutĩĩzĩla, umusungu wa Muana-nkolo.”

¹⁰ Nunsola mwa kĩMuau sunga kunkonko nankulu nandĩĩpũ, nundagĩĩla ĩkaa nanzelu Yelusalemũ, iiika kwipũna kwigyulu kwa kĩNzua,

¹¹ nĩtĩĩte uukulu wa kĩNzua, nuweelu waakue alĩ mpiani ya kagũe ka ngele nkakũ, zĩ kagũe ka yasipi, zĩ kĩlolelo nakielu.

¹² Alĩ ĩtĩĩte gyelele kyulu, kangĩ lyĩĩpũ, nĩtĩĩte mamĩlango kyumi namabĩlĩ, numumamĩlango amalaĩka kyumi naabĩlĩ, nĩmiina mandĩkue ma nduuli kyumi nazibĩlĩ za aana a Ĩsilaeli;

¹³ paluandĩ lwa kĩĩlĩma mamĩlango matatu, paluandĩ lwa sũkũma mamĩlango matatu, paluandĩ lwa takama mamĩlango matatu, paluandĩ lwa mueli mamĩlango matatu.

¹⁴ iGyelele lya kaa alĩ lĩtĩĩte mĩkũlĩla kyumi nĩbĩlĩ, numumĩkũlĩla ĩmiina kyumi namabĩlĩ ma atumua naikyumi naabĩlĩ a Muana-nkolo.

¹⁵ Nduyo naalukĩtambuĩla nineene alutĩĩte lukito lwa zahabũ, koona wamĩlĩganĩĩlie ĩkaa, nĩmamĩlango maakue, nigyelele liakue.

¹⁶ Nĩkaa niĩmĩka mulĩgaano, uulĩĩpũ waakue ilika nuugalĩ waakue. Numĩlĩganĩĩlia ĩkaa kulukito alĩ zĩ maili gyana lya nzogũ nĩmagana mataano, uulĩĩpũ waakue nuugalĩ waakue nukwienda kukiania kumuakue alĩ ilika lĩmuĩ.

¹⁷ Nulĩganĩĩlia igyelele liakue, mĩkono gyana lĩmuĩ nĩmakumi manĩĩ kwiyalo lya kĩuntu, ndogolelio yaakue, lya malaĩka.

¹⁸ Nuuzengua wigyelele alĩ wiyasipi, nĩkaa alĩ ya zahabũ nzelu pee, zĩ kĩlolelo nakielu pee.

¹⁹ nĩmĩkũlĩla ya magelele ma kaa alĩ miogeeligue kupigũe tũlũ pya ngele nkakũ. uMukũlĩla wa muandio alĩ yasipi; wa kabĩlĩ sapilo; wa katatu kalekedoni; wa kanĩĩ zumalidi;

²⁰ wa kataano salidoniki; wa mutandatu salidio; wa mupũngatĩ kilisolito; wa munaana belilo; wikyenda topazi; wikyumi kilisopulasi; wikyumi nakamuĩ yasinto; wikyumi nakabĩlĩ ametisito.

²¹ Nĩmamĩlango nikyumi namabĩlĩ ingĩ lũũlũ kyumi nazibĩlĩ, nilyĩmulango lĩmuĩ lĩmuĩ ingĩ lũũlũ ĩmuĩ. Nĩnzĩla ya kaa ingĩ zahabũ nzelu pee, zĩ kĩlolelo nakielu.

²² Sika namona kaNumba ya kĩNzua munsĩ yaakue, kunsooko ũShekulu Nzua mukola ngũlũ zensi nuMuana-nkolo eene ĩNumba ya kĩNzua yaakue,

²³ nĩkaa sika ĩsiile ĩmpasu katia mueli kukumielia, kuitĩ uukulu wa kĩNzua ingĩ uweelu waakue, nĩntala yaakue ingĩ uMuana-nkolo.

²⁴ Nindugu zikigendela muweelu waakue; nĩatemi a nsĩĩ akuleetaa uukulu waao mumuakue,

²⁵ nĩmamĩlango maakue sika mĩkakigyalĩlua kainiino mumunsĩ; kuitĩ umuasio ukutilĩ kautiku;

²⁶ nĩndĩo akuleetaa uukulu nikyulio lya ndugu mumuakue.

²⁷ Sika ukiingĩla muasio kainiino ubĩĩ wensi; katia naitenda ĩmausuukĩlo nuulongo, ĩpa aao dũũ naandĩkue mukĩtabũ kya upanga, ĩkya Muana-nkolo.