Ukũnukulua 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Mbalua kũkyanisa lya Epeso

¹ “Kwa kĩmalaĩka nwikyanisa naliĩli muEpeso andĩka; ‘Izi zozi uũgile uyo nuziambile inshonda mupũngatĩ mumukono waakue nwa kĩgoosia, nwigendela pakatĩ ya ntala mupũngatĩ za zahabũ.

² Manile uutendi waako numulĩmo waako namukakũ nuugigimĩlia waako, kĩna sikudũũmile kwikamantana nĩantu nabĩĩ, uagemile ĩaasio naĩkĩĩĩtaa atumua ndĩo sika eene, nuona kĩna alongo;

³ kangĩ nugigimĩlia, nukunsooko ya liina liane ukuagagiguaa, sika nukatala.

⁴ Ĩpa ntĩĩte lukaani kumuako, kunsooko walekile uuloogua waako wa muandio.

⁵ Juka gua kĩna aluguile, upele, uutende uutendi wa muandio. Ĩpa kanga usiititenda yaasio, nijile kumuako, nĩkakumĩleegia ĩntala yaako paluandĩ luakue kanga usiitipela

⁶ Ĩpa utĩĩte ulukaani ulu kĩna uusuukĩĩlue uutendi wa Anikolaiti nanuusuukĩĩlue nineene gaa.

⁷ Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa. Uyo nudulile nĩkakumupeela walĩe inkali zikyota lya upanga naliĩlĩ muPaladiso ya kĩNzua.’”

Mbalua kũkyanisa lya Similina

⁸ “Nukwa kĩmalaĩka nwikyanisa naliĩlĩ muSimilina andĩka, ‘Izi zozi uũgile uyo nwa muandio nunwa mpelo, naalĩwakiile, kangĩ nuĩ mupanga.’

⁹ Manile injago zaako nuutũka waako, (ĩpa umugolĩ) manile niituki yaao naĩkĩtambula kĩna ingĩ Ayahũdi, ndĩo sika eene, ĩpa ingĩ shũnagogi lya kĩShetani.

¹⁰ Ulekioopooka inkaani nazĩkakukuagaana. Laaa ũShetani ukitũla kumugumĩla namuĩngĩ mumiani mukĩtũngo koona mugemue, niniinie mukitũla ninjago intondo kyumi. Wĩĩ musuĩĩli sunga ĩnkia, nineene nĩkakukupeela ĩngala ya upanga.”

¹¹ Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa. Uyo nudulile sikukiligia uualaalĩki wa nkia ya kabĩlĩ.

Mbalua kũkyanisa lya Peligamo

¹² “Nukwa kĩmalaĩka nwikyanisa naliĩlĩ muPeligamo andĩka, ‘Izi zozi uũgile uyo nutĩĩte iyũmba nalyugĩ lyugĩ kwensi-kwensi.’

¹³ Manile pĩna wikyalile, paasio pityengu lya kĩShetani; nunduue uambile dũũ ĩliina liane, kangĩ sika nukaana uusuĩĩli, waane, sunga muntondo za kĩAntipa, mukuĩli waane namusuĩĩli, naalĩ muulague pakatĩ yaani, paasio pĩna ukikyalaa ũShetani.

¹⁴ Ĩpa ntĩĩte nkaani nkeei kumuako, kuitĩ utĩĩte kuasio antu naaambile ĩmamanio ma kĩBalamũ, uyo naalumumanilie uBalaki waĩĩke ĩkĩnkũmpa ntongela ya aana a Ĩsilaeli, ailĩe iintu naalĩ ipũnigue kuanzegamĩla, nukwigololia.

¹⁵ Iio-iioo ninduue utĩĩte antu naaambile ĩmamanio ma Anikolaiti.

¹⁶ Pela gua. Kanga usiitipela, nijile kumuako kuukaaũ, nikitenda ulugu kumuao kuyũmba lya mulomo waane.

¹⁷ Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa. Nudulile nĩkakumupeela kwilĩa ityũmpĩ lya mana naalĩ mpisue, nineene nĩkakumupeela igyũe nalielu, numwigyũe liandĩkue liina nĩpia nasika wĩliĩzĩ kamuntu, isiititũla nukulianũnkulaa.”

Mbalua kũKyanisa lya Tiatila

¹⁸ “Nukwa kĩmalaĩka nwikyanisa naliĩlĩ muTiatila andĩka, ‘Izi zozi uũgile uMuana wa kĩNzua, uyo nwa miiso zĩ muakĩlo wa mooto, nĩmĩgulu zĩ kiuma nakĩkasũkũ nakĩkulusue zigi-zigi.’

¹⁹ Manile uutendi waako nuuloogua waako nuusuĩĩli waako nuwĩtumi waako nuugigimĩlia waako; kangĩ kĩna utendi waako wa mpelo wĩongeelaa kwikĩla ũwa muandio.

²⁰ Ĩpa ntĩĩte lukaani kumuako, kĩna wamulekile umusungu Yezebeli, uyo nukĩĩta munakĩdagu, nduyo ukuamania ĩĩtumi aane nukukualimĩĩlia, koona agololie nukwilĩa iintu naalĩ ipũnigue kuanzegamĩla.

²¹ Nineene numupĩĩle tyũngo, koona wapele ũũgololia waakue, nduyo sika muloe kwipela.

²² Laaa, nĩkakumutaaga muulĩlĩ, nĩaasio naakugolagiaa palumuĩ ninduyo, munzago nkulu, kanga asiitipela utendi waakue;

²³ nineene nĩkakuaulaga ĩaana aakue kuukiu. Nĩmakanisa tũlũ mikilĩĩnga kĩna neene nukukeesagiaa moo nĩnkolo. Nineene nĩkakumupeela muntu wensi kumiani kwilika lya utendi waakue.

²⁴ Ĩpa namuĩĩla inie namuĩngĩ muTiatila, ensi nasika aambile ĩmamanio aza, nasika ĩĩzĩ impisi-mpisĩ ya kĩShetani kĩna naakuũgaa, namuĩĩla inie, sika nĩkakumuĩĩkĩla umuligo nuĩngĩ;

²⁵ Ĩpa namukĩtĩĩte, kĩambĩ, sunga pĩna nikiiza.

²⁶ Ninduyo nudulile nukukuukendegeela uutendi waane sunga ĩmpelo, nĩkakumupeela usũũmi kundugu,

²⁷ nduyo ukakuadĩĩma kunkome ya kiuma, zĩ isheme ya muumba nayukuminangulaguaa, kĩna iio uneene naalĩ naanũnkuĩle uusũũmi kwa kĩTata waane;

²⁸ nineene nĩkakumupeela uyu ĩnsonda nya daau.

²⁹ Uyo nutĩĩte ukutuĩ nũigie ulukaani ulu kĩna uMuau ukumaĩĩla ĩmakanisa.”