Ukũnukulua 19 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Uduli mwigyulu nuwĩnga wa Muana-nkolo

¹ Pĩna nazikĩla izi nanigyũlia, zĩĩ luli lukulu lwa mulundo mukulu mwigyulu naluũga, “Aleluya! Uugũnua nuukulu nuusũũmi ingĩ mwa kĩNzua wĩĩtu,

² kuitĩ uulamuli wakue ingĩ wa tai, kangĩ wa kulukuuluu; kuitĩ wamulamuĩle umugololia namukulu naalumionoonile ĩnsĩĩ kuugololia waakue, nukukumukaasia kunsooko ya mĩgali ya ĩĩtumi aakue.”

³ Naaũga nkua ya akabĩlĩ, “Aleluya! Nĩliuki liakue lyukunankĩla kukiania sunga ĩkalĩ nakalĩ.”

⁴ Nĩanampala namakumi mabĩlĩ naanĩĩ, niiumbe naipanga inĩĩ naatũngama nukukumutekela uNzua nwikyalansile mwityengu lya kĩtemi, naiũga, Amini, aleluya!

⁵ Luli nalupũnĩĩla muumo mwityengu lya kĩtemi naluũga, “Mukuliĩ uNzua wĩĩtu inie ĩĩtumi aakue tũlũ, niniinie namukumoopoka, aniino nĩakulu.”

⁶ Naniigia luli zĩ luli lwa mulundo mukulu, zĩ luli lwa maazĩ mingĩ, zĩ luli lwa mugũgũmo mukulu, lwiũga, “Aleuya! Kuitĩ ũShekulu Nzua wĩĩtu, Mukola ngũlũ zensi utemile.

⁷ Kulumbe nukwikua ingiligili, kumupeele uukulu, waakue, kuitĩ uwĩnga wa Muana-nkolo waazaa, numutoolua waakue wĩzĩpiĩlagiaa,

⁸ nduyo wapeegaguaa kwijiala ntiila nankamũ nanziiza nimĩlĩmĩnta, nanzelu pee,” kuitĩ intiila nanziiza ingĩ uutendi wa kulukuuluu wa eelu.

⁹ Numalaĩka numbuĩla, “Andĩka, ‘Alĩuku naaanue kundia za wĩnga wa Muana-nkolo.’ Numbuĩla, ‘Izi ingĩ nkaani za tai za kĩNzua.’

¹⁰ Nineene nangua ntongela ya mĩgulu yaakue koona numutekele; numbuĩla, ‘Lekitenda yaasio; Ĩne nĩnwĩtumi mĩaako, kangĩ wa anũna aako naatĩĩte uukuĩli wa kĩYesu. Mutekele uNzua.’ Kuitĩ uukuĩli wa kĩYesu ingĩ nkolo ya unakĩdagu.”

Kilisito muduli

¹¹ Namona igyulu nalĩkũnukuka; laaa, mpalasi nzelu! Ninduyo naalumĩdaamĩlĩĩle ukuĩtagua Musuĩĩli, kangĩ Wa tai, nukukulukuuluu ukulamulaa nukukĩlasaa ulugu.

¹² Nĩmiiso maakue alĩ zĩ waakĩlo wa mooto, numwityũe liakue ngala ningĩ, nutĩĩte ĩliina naliandĩkue, nasika wĩĩzĩ kaumuĩ, ĩpa umuene namukola.

¹³ Nduyo namujialue ĩjialo naalĩ tyoeligue mumĩgali, nĩliina liakue ukuĩtaguaa Lukaani lwa kĩNzua.

¹⁴ Nĩmaũmbĩ ma ĩlaasi a kwigyulu namamutiata mumpalasi nanzelu, nukwijialua intiila nankamũ nanziiza, nanzelu, nanzelu pee.

¹⁵ Niyũmba nalyugĩ yukupunĩĩlaa mumulomo waakue koona wazikue indugu kuniasio. Ninduyo ukakuadĩĩma kunkome ya kiuma, ninduyo witilangĩla ityulĩ lya kusuuzĩla mubinio wikyũo lya utaki wa kĩNzua Mukola ngũlũ zensi.

¹⁶ Mujialo liakue numukĩĩga kiakue nutĩĩte liina naliandĩkue, mutemi wa atemi nũShekulu waashekulu.

Anaulugu a kĩKilisito itaagua mumooto

¹⁷ Namona malaĩka umuĩ wĩĩmĩkile kumpasu, nulĩla kululi lukulu, nuziĩĩla inoni tũlũ zensi nazukupũpũtaa pakatĩ igyulu, “Nzuĩ mwĩlundĩĩle palumuĩ kuludia nalukulu lwa kĩNzua,

¹⁸ muzilĩe inama za atemi, ninama za atongeeli a ulugu, ninama za akola ngũlũ, ninama za mpalasi nĩza akola kuzidaamĩĩla, ninama za antu tũlũ ensi, akolelua nĩasese, aniino nĩnaakulu.”

¹⁹ Nanĩmĩona ĩnimu, nĩatemi a nsĩĩ, nĩmaũmbĩ ma ĩlaasi aao, ĩlundĩlĩĩle ĩkue ulugu nunduyo nudaamĩlĩĩle ĩmpalasi sunga nĩmaũmbĩ ma ĩlaasi aakue.

²⁰ ĩNimu nĩguĩlua, numunakĩdagu wa ulongo palumuĩ nĩnduyo uyo naalutendile ilĩngasĩĩliio ntongela yaakue, kuitĩ kũyaasio alualimĩlĩĩlie ĩaasio naalĩ aligilie uugomola wa nimu, nĩndĩo naalĩ akumutekela unzegamĩla waakue; ĩaasio naabĩlĩ naataagua kĩlĩ apanga munanza ya mooto nĩakĩĩle kukĩbiliti-biliti.

²¹ Naalĩ asaagile naaulagua kuyũmba nalĩpũnile mumulomo waakue uyo nudaamĩlĩĩle ĩmpalasi; ninoni nazikyutĩkia kunama zaao.