Ukũnukulua 14 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uYohana ukumuona uMuana-nkolo nĩnaalĩ akomolue

¹ Namona, laaa, uMuana-nkolo wĩĩmĩkile mukiania ya nkonko ya Sayuni, nĩantu magana ma nzogũ gyana lĩmuĩ nĩmakumi manĩĩ namanĩĩ alĩ ĩensi ninduyo, akola liina liakue nĩlya kĩTata waakue liandĩkue muusiu waao.

² Naniigia luli kwipũna kwigyulu zĩ luli lwa maazĩ mingĩ, zĩluli lwa mugũgũmo mukulu, nululi naalĩ niigilie alĩ luli lwa akua-nsumbĩ, naakuzikuaa insumbĩ zaao,

³ nĩndĩo iĩĩmba liĩmbo nĩpia ntongela ityengu lya kĩtemi, kangĩ ntongela ya iyumbe nainĩĩ naipanga, nĩntongela ya anamapala. Kutilĩ naalusuumile kukĩmania ĩliĩmbo liasio isiititũla aao naĩmagana ma nzogu gyana lĩmuĩ nimakumi manĩĩ na manĩĩ naalĩ agulue kwipũna muna nsĩĩ.

⁴ Ĩa awa sika aĩĩkĩlue udobũ wensi palumuĩ nĩakĩĩma kunsooko alĩ eeligue; ĩa awa akumutiatĩĩlaa uMuana-nkolo tũlũ kwensi kĩna ulunjie, ĩa alĩ agulue kwipũna muantu, nduĩ-nduĩ kwa kĩNzua nukwa kĩMuana-nkolo,

⁵ numumilomo yaao kutilĩ kaulongo, kunsooko agila kibyado.

uYohana ukuaona ĩamalaĩka naatatu

⁶ Namona malaĩka muua nwipũpũta pakatĩ igyulu, mukola mpola na nziiza za kalĩ nakalĩ, waatanantĩlie naakikyalaa muna nsĩĩ, nĩndugu yensi, nuluuli luensi, nĩntambo yensi, nĩantu ensi,

⁷ nwiũga kululi lukulu, “Moopooke uNzua nukukumukulia, kunsooko ityũngo lya ulamuli waakue liazaa; mutekelĩ uyo naaluzĩpilie igyulu nĩnsĩĩ nĩnanza ninjiĩlio za maazĩ.”

⁸ Numalaĩka muua nwa kabĩlĩ numutiata, nwiũga, “Yagua, yagua, ĩBabeli ĩkaa nankulu, ndĩo alĩ ĩkopilie indugu tũlũ umubinio wa utaki wa ugololia waakue.”

⁹ Numalaĩka muua, nwa katatu, nuatiata, nwiũga kululi lukulu, “Wensi kanga wamĩtekele ĩnimu nunzegamĩla waakue, nukukuwaanũnkula uugomola muusiu waakue katia mumukono waakue.

¹⁰ ninduyo ukikopa umubinio wa utaki wa kĩNzua naalĩ muzĩpigue sika namusogole kamaazĩ, mukĩĩko kya utaki waakue; ukiaagigua kumooto nĩkĩbiliti-biliti ntongela ya amalaĩka naeelu nĩntongela ya Muana-nkolo.

¹¹ Nĩliuki lya uwai waao lyukunankĩlaa kukiania sunga ĩkalĩ nakalĩ, agila kausũũpia munsĩ nuutiku, aao naakumĩtekela ĩnimu nunzegamĩla waakue, kangĩ nuwensi nukuanũnkulaa uugomola wa liina liakue.”

¹² Ĩpa papa ugigimĩlia wa eelu, naakumakendegeela ĩmalagĩĩlio ma kĩNzua, nuusuĩĩli wa kĩYesu.

¹³ Naniigia luli kwipũna kwigyulu nalũiũga, “Andĩka, ‘Alĩuku ĩakiu naakiile mwa kĩShekulu kwipũna nunzuauu.’ Eeze, uũgile uMuau, koona asũũpie kwipũna munzago zaao, kuitĩ uutendi waao wĩtiatile nĩndĩo!”

Uogoli nuukali wa zabiibu za nsĩĩ

¹⁴ Namona, laaa, lyũnde lielu numukiania ilyũnde wikyalansile umuĩ, mpiani ya Muana-muntu, mukola ngala ya zahabũ mwityũe liakue, numumukono waakue utĩĩte nsiime nzugĩ.

¹⁵ Numalaĩka muua nupũna muNumba ya kĩNzua; numulĩĩla kululi lukulu uyo nwikyalansile mwilyũnde, “Sopoola ĩnsiime yaako, uogole, kuitĩ ityũngo lya kuogola liazaa; kuitĩ ĩmaogola ma nsĩĩ makondaa.”

¹⁶ Ninduyo nwikyalansile mwilyũnde numĩgumĩla ĩnsiime yaakue munsĩĩ, ĩnsĩĩ nĩogolua.

¹⁷ Numalaĩka muua nupũna muNumba ya kĩNzua ya mwigyulu, ninduyo utĩĩte nsiime nzugĩ.

¹⁸ Numalaĩka muua nupũna pawitekelo, mukola usũũmi wa mooto; numulĩĩla kululi lukulu nuasio nwa nsiime nanzugĩ, nuũga, “Sopoola ĩnsiime yaako nanzugĩ, uikale inshampi ya muzabiibu wa nsĩĩ, kunsooko izabiibu zaakue zaĩlaa dũũ.”

¹⁹ Numalaĩka numĩgumĩla ĩnsiime yaakue munsĩĩ nuzikala izabiibu za nsĩĩ, nuzigumĩla mwityulĩ nikyulu lya utaki wa kĩNzua;

²⁰ nityulĩ nalĩsokolelua kĩnzinzi ya kaa; ĩmĩgali nĩpũna mwityulĩ sunga kumaguatio ma mpalasi, zĩ lugendo lwa maili magana mabĩlĩ.