Ukũnukulua 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uYohana ukumĩona ĩnimu

¹ Namona nimu nĩpũna munanza nĩtĩĩte matũe mupũngatĩ nimpembe kyumi, numumpembe zaakue ngala kyumi, numumatũe maakue miina ma utukĩli.

² Nĩnimu naalĩ nĩmĩoonie alĩ yĩmpiani nĩnsuĩ, nĩmĩgulu yaakue alĩ zĩ ya ngaa, numulomo waakue alĩ zĩ wa nsimba. iJoka nalyĩmĩpeela ingũlũ zaakue nityengu liakue lya kĩtemi nuusũũmi wingĩ.

³ Lĩmuĩ lya matũe maakue alĩ zĩ yaalaaligue luguma lwa nkia; ĩpa ikyuo liakue lya nkia nalĩkamigua, nĩnsĩĩ yensi nĩkulĩlua kunsooko ya nimu niasio.

⁴ Naalĩtekela ijoka kunsooko nalĩmĩpeela ĩnimu uusũũni waakue, naamĩtekela ĩnimu, naaũga; “Waani nwilika nĩnimu, kangĩ waani nusũũmile kukĩlaasa nĩndĩzo?”

⁵ Nĩpeegua mulomo kwitambula makaani namakulu ma utukĩli. Nĩpeegua usũũmi kukĩtuma umulĩmo waakue mieeli makumi manĩĩ nĩbĩlĩ,

⁶ nĩmũmuula umulomo waakue yĩmutukĩle uNzua, nukwitukĩla ĩliina liakue, nuwikyalo waakue, nĩndĩo naakikyalaa mwigyulu.

⁷ Nĩpeegua kukĩlaasa nĩeelu, nukukuadula. Nĩpeegua uusũũmi mutũlũ ensi, uluuli, nĩantu, nintambo, nindugu.

⁸ Tũlũ naakikyalaa muna nsĩĩ ĩkakumĩtekela, muntu wensi kanga ĩliina liakue ĩsika liandĩkue mukĩtabũ ĩkya upanga kya Muana-nkolo naalĩ muulague pĩna alĩ ikĩĩlĩ kwiĩĩkua umukulĩla wa nsĩĩ.

⁹ Wensi nutĩĩte ukutuĩ wa kũigĩlia nũigie.

¹⁰ Uyo kanga wasole ĩmatepo, ukisholua matepo. Wensi kanga waulage kuyũmba, yumũjĩpĩĩle kwiulagua kuyũmba. Ĩpa papa ugigimĩlia nuusuĩĩli wa eelu.

¹¹ Namona nimu nĩnzĩa ninankĩla kwipũna munsĩĩ, ndĩo alĩ ĩtĩĩte mpembe zibĩlĩ mpiani ya muanankolo, nĩtambula zĩ ijoka.

¹² Yukutumĩlaa usũũmi tũlũ wa nimu nya muandio ntongela yaakue, nukukumĩtenda ĩnsĩĩ sunga tũlũ naikikyalaa muasio amĩtekele ĩnimu nya muandio, niasio uluguma luakue lwa nkia naalĩ lukamigue.

¹³ Ndĩo itenda ilĩngasĩĩlio ikulu, sunga yatende umooto kwiiika kwipuna kwigyulu munsĩĩ ntongela ya antu.

¹⁴ Ndĩo yukualĩmĩĩlagiaa naakikyalaa muna nsĩĩ, kuilĩngasĩĩlio yaasio naalĩ mpeegue kukuitenda ntongela ya nimu; nĩkuaĩĩla naakikyalaa muna nsĩĩ kukumĩzĩpĩlia nzegamĩla ĩnimu niasio naalĩtĩĩte uluguma lwiyũmba, ĩpa niĩ mpanga.

¹⁵ Nĩpeegua kwiĩĩkĩla umusũũpo munzegamĩla wa nimu, sunga unzegamĩla wa nimu watambule, nukwitenda aasio nasika ĩtekĩĩle unzegamĩla wa nimu aulague.

¹⁶ Ndĩo ĩkutenda tũlũ ensi, aniino nĩakulu, agolĩ nĩatũka, akolelua nĩasese aĩĩkĩlue ugomola mumĩkono yaao nya kĩgoosia kamuĩ muusiu waao,

¹⁷ koona tũlũ wensi walekigula kamuĩ kwigulia, isiititũla utĩĩte uugomola, nduo ingĩ ĩliina lya nimu, kamuĩ iyalo lya liina liakue.

¹⁸ Ĩpa paapo makoolĩ masala, unuasio nutĩĩte uulĩngi nwaalie iyalo lya nimu; ingĩ yalo lya kĩuntu. niyalo liakue ingĩ magana mutandatu nĩmakumi mutandatu namutandatu.