Ukũnukulua 11 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Akuĩli abĩlĩ

¹ Nampeegua lukito zĩ nkome, nambuĩlua, “Uuka, umĩlĩganĩĩlie ĩnumba ya kĩNzua, nuwitekelo, nĩndĩo naakĩtekelaa muasio,

² nĩkĩanda nakiĩlĩ kĩnzinzi ya numba ukĩleke kĩnzinzi, uleke kikĩlĩganĩĩlia, kunsooko indugu zapeegaguaa kiasio, ndĩo ĩkakumĩtilangĩla ĩkaa nanzelu mieli makumi manĩĩ nĩbĩlĩ.

³ Nineene nĩkakuapeela usũũmi ĩakuĩli aane naabĩlĩ, ndĩo ikipũnia uunakĩdagu ntondo gyana lya nzogũ lĩmuĩ nĩmagana mabĩlĩ nimakumi mutandatu, ĩajialile ĩmajialo ma mbuela.”

⁴ ĩAasio ingĩ mĩzeituni ĩbĩlĩ nuuĩĩkĩlo wa ntala zibĩlĩ nakuuzaa zĩĩmĩkile ntongela ya kĩShekulu wa nsĩĩ.

⁵ Numuntu kanga wasiie kukuaalaalia, mooto ukupũnaa mumĩlomo yaao nukukualĩa sue ĩalugu aao; numuntu kanga wasiie kukuaalaalia, iio-iioo yukumũjĩpĩlaa kwiulagua.

⁶ Ĩa atĩĩte usũũmi kukuligyalĩla igyulu koona ĩmbũla ĩlekikua muntondo za unakĩdagu waao, atĩĩte usũũmi nukumaazĩ kukumapĩlula matũle mĩgali, nukukumĩkua ĩnsĩĩ kwikyuo liensi, pensi pĩna asiiile.

⁷ Nĩpĩna ijilimalĩĩla uukuĩli waao, ĩnkialu nĩpũnile mululungu nalusimu lwa kuulungu ĩkakĩkua ulugu nĩndĩo, ndĩzo ikidula nukukuaulaga,

⁸ nĩmĩimba yaao ukaa ĩkoolĩ munzĩla nya kaa nankulu nyukuĩtaguaa kumpiani Sodomũ nĩMĩsili, nĩpaasio ũShekulu waao pĩna alĩ mukononteelue mumusalaba.

⁹ Nĩaasio a antu ninduuli, nintambo nindugu ĩkakuĩlaa ĩmĩimba yaao ntondo zitatu nĩnusu, sunga naasiita ĩmĩimba yaao kwiyĩĩkua mukĩbĩĩla,

¹⁰ ndĩo naikyalile muna nsĩĩ ikilumba ningiligili kunsooko yaao ĩkakĩpeela ipeegua, kunsooko ĩanakĩdagu aasio naabĩlĩ alĩ akuaagagiaa ĩo naikyalile muna nsĩĩ.

¹¹ Pĩna nazikĩla ntondo zitatu nĩnusu, muau wa upanga naupũnile kwa kĩNzua nuingĩĩla, naĩĩmĩka kumĩgulu yaao, ooa ukulu nuingĩĩla ĩantu naalĩ akuulaaa.

¹² Naiigia luli lukulu kwipũna mwigyulu nalukuaĩĩla, “Nankĩlĩ kunu!” Naanankĩla kwigyulu mwilyũnde, ĩalugu aao naakualaa.

¹³ Numwityũngo liasio alĩ mumanga mukulu, nityũmpĩ likyumi lya kaa nalĩgua; ĩantu magana ma nzogũ mupũngatĩ naaulagua numumanga waasio, nĩnaalĩ asaagile naiingĩĩlua nuooa ukulu, naamukulia uNzua nwa mwigyulu.

¹⁴ uUkĩa wa kabĩlĩ wakĩlaa; laaa gua, uukĩa wa katatu upolokile kuukaaũ.

Dyede lya mupũngatĩ

¹⁵ uMalaĩka nwa mupũngatĩ nulĩlĩlia idyede liakue, naitũla nduli nkulu mwigyulu, naziũga, “uUtemi wa unkũmbigyulu watũlaa utemi wa kĩShekulu nuwa kĩKilisito waakue, nduyo ukitema sunga ĩkalĩ nakalĩ.”

¹⁶ Nĩanampala naa makumi mabĩlĩ naanĩĩ naakuuzaa ikyalansile ntongela ya kĩNzua mumatengu maao ma kĩtemi naagua uũndala naamutekela uNzua,

¹⁷ naiũga, “Kwakusongelia ue Shekulu Nzua, Mukola ngũlũ zensi, nukoolĩ nĩnaalukoolĩ, kunsooko wausolile uusũũmi waako naukulu nukwitema.

¹⁸ Nindugu nazitaka, nuutaki waako nawĩĩza nityũngo lya kulamulua naalĩ akiile, nukukuapeela uupeegua waao ĩĩtumi aako ĩanakĩdagu nĩeelu, nĩndĩo naaliopokile ĩliina liako, aniino nĩnaakulu, nukukuonona ĩo naakumionoona ĩnsĩĩ.”

¹⁹ Ĩnumba ya kĩNzua nĩkoolĩ mwigyulu nigyulua, nĩkĩgange kilyago nakigyelela munumba yaakue; naitũla mpĩĩto ninduli, nĩmĩgũgũmo, numumanga, nĩmbũla ya magũe ningĩ dũũ.