Ukũnukulua 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Ukũnukulua wa kĩYesu Kilisito, naalĩ mupeegue nuNzua waalagĩĩle ĩĩtumi aakue impola nazikitũla kuukaaũ kutilĩ kawĩnegelo; nduyo nutuma kumukono wa kĩmalaĩka numulagĩĩla umwĩtumi waakue uYohana;

² naalulukuĩlĩle uLukaani lwa kĩNzua, nuukuĩli wa kĩYesu Kilisito, sunga impola tũlũ naaluzioonie.

³ Mulyukũ nukusomaa, nĩndĩo naakwigagiaa inkaani za unakĩdagu uu, nukukuzikendegeela naalĩ nandĩkue muasio; kuitĩ ityũngo lyĩpiipĩ.

⁴ Ĩne Yohana, namandĩkĩla ĩmakanisa namamupũngatĩ namĩĩlĩ muAsia, uUkende wĩĩ kumiani nĩmatiliga namapũnile kumuakue uyo nukoolĩ, nĩnaalukoolĩ nĩnukiiiza; nĩnazipũnile kunkolo mupũngatĩ nazĩĩlĩ ntongela ityegu liakue lya kĩtemi,

⁵ kangĩ nukũpũna kwa kĩYesu Kilisito, mukuĩili namusuĩĩli, mulelua wa muandio wa aasio naalĩ akiile, kangĩ mukulu wa atemi a nsĩĩ. Kumuakue muene nukuloilue nukukukoogia ĩmĩlandu yĩĩtu kumugali waakue

⁶ nukukuzĩpĩlĩlia uutemi, apolia kwa kĩNzua nuTata, kumuakue wĩĩ ukulu nuusũũmi sunga ĩkalĩ nakalĩ. Amini.

⁷ Laaa, wijile nĩmalũnde, nĩliiso liensi lĩkakumuona, nĩndĩo naalĩ amusomile; ninduuli tũlũ za muna nsĩĩ zijililĩla ĩkĩlĩlo kunsooko yaakue. Eeze, Amini.

⁸ “Ĩne neene Alipa nuOmega,” muandio nĩmpelo, uugile ũShekulu uNzua, nukoolĩ, nĩnaalukoolĩ, nĩnukiiiza, Mukolangũlũ zensi.

uYohana ukumuona uKilisito

⁹ Neene Yohana, umunũna waani, mukamantani palumuĩ niniinie munzago numuutemi numuugigimĩlia wa kĩYesu, alĩ nĩĩlĩ mukĩsiwa nakyukuĩtagua Paatimo kunsooko ya Lukaani lwa kĩNzua, nukunsooko ya ukuĩli wa kĩYesu.

¹⁰ Alĩ nĩĩlĩ mwa kĩMuau palutondo lwa kĩShekulu; naniigia luli lukulu kunũma yaane, zĩ luli lwidyede

¹¹ naluũga; “Aya nukumaona umandĩke mukĩtabũ, umatuale kumakanisa nama mupũngatĩ, Epeso nĩSimilina, nĩPaligamo, nĩTiatila, nĩSalidi, nĩPiladelipia, nĩLaodikia.”

¹² Nampĩluka mone ululi naalĩ lũlikitia. Nĩpĩna nampĩluka, namona uĩĩkĩlo wa ntala mupũngatĩ ĩza zahabũ;

¹³ nĩpakatĩ ya uĩĩkĩlo wa ntala namona muntu kumpiani ya muana-muntu, ujialile jialo nalĩpikile kumĩgulu, nukwitũngua umusipi wa zahabũ mukikua;

¹⁴ ityũe liakue nĩmatũmbĩ maakue alĩ meelu zĩ maũli nameelu, zĩ seluji katia ulua, nĩmiiso maakue zĩ kĩmulĩ kya mooto,

¹⁵ nĩmĩgulu yaakue zĩ kyuuma nakĩkasũkũ nakĩkũlũsue zigizigi, zĩmbũge shonselue mwilyungu; nululi luakue zĩ mulũgũũzo wa maazĩ mingĩ;

¹⁶ nduyo alutĩĩte inshonda mupũngatĩ mumukono waakue nwa kĩgoosia; niyũmba lyugĩ, kwensi-kwensi, lĩpũnile mumulomo waakue; nuusiu waakue zĩ mpasu nĩlĩlile kungũlũ zaakue.

¹⁷ Pĩna nanumuona, nangua pamĩgulu yaakue zĩ muntu nukiile mukanka. Nuĩĩka umukono waakue nwa kĩgoosia mumuane, numbuĩla; “Lekioopooka, ĩne neene namuandio kangĩ nampelo,

¹⁸ nanumupanga; Nineene alĩ nakiile, ĩpa laaa numupanga sunga ĩkalĩ nakalĩ. Nineene ntĩĩte ĩmiguĩlo ma Ukiu nĩma Kuulungu.

¹⁹ Andĩka gua impola naazuzioonie, nazikoolĩ nindizo nazikitũla pembele ya zaasio.

²⁰ uUnkũnkũ wa nsonda mupũngatĩ naazuzioonie mumukono waane nwa kĩgoosia, nuuĩĩkĩlo wa ntala mupũngatĩ wa zahabũ, iNshonda mupũngatĩ ingĩ amalaĩka a makanisa mupũngatĩ; nuuĩĩkĩlo mupũngatĩ wa ntala ingĩ makanisa mupũngati.