Tito 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia

¹ Paulo, Mwĩtumi wa kĩNzua, kangĩ mutumua wa kĩYesu Kilisito, koona ĩasaagulua a kĩNzua amĩsuĩĩle nukukumĩlĩnga ĩtai nyukumanagiaa kukumukulia uNzua.

² Nukukuulaaĩĩla upanga wa kalĩ nakalĩ, ĩlĩ lyoli lyago, uNzua, nasikukutambulaa ulongo naalukuĩkĩlĩe kwipũna ĩkalĩ,

³ ĩpa pĩna itungo liakue nalipika, nwigyelelia uLukaani luakue muutanantia naalĩ numupeegue ine kwilika lilyagĩĩlio lya Mugũni wĩĩtu, uNzua.

⁴ Nakuandĩkĩla ue Tito, muanuane muusuĩĩli nakukamantĩĩne, uUkende wĩĩ kumuako nĩmatiliga namapũnile kwa kĩNzua Tata nukwa kĩShekulu Yesu Kilisito, Mugũni wĩĩtu.

Kukuasaagula ĩanampala ikyanisa

⁵ Yoĩ nsooko nanukuleka kuKilete, koona uzijĩpĩĩlie naalĩ zishagile nukwiĩĩka ĩanampala mukaa yensi, kĩna alĩ nukulagĩlĩĩlie,

⁶ muntu namugila kishokio, nduyo wĩĩ mugoosia wa musungu umuĩ, nwa aana naasuĩĩli nasika akusokakiguaa ya kĩna asambo katia akakũ.

⁷ Kuiti yumũjĩpĩĩle umulĩnguli wĩĩ muuntu namugila kishokio; kuitĩ mukendegeeli wa mulĩmo wa kĩNzua; waleke kĩkentula, walekitũla mukaaũ wa kutaka, walekitũla nukugaalaa, walekitũla mugaali, walekiawa inshao za nsoni,

⁸ ĩpa wĩĩ musũgamĩĩlia agenda, muloogua wa uuza, nusũũmile kukĩtema, munakulukuuluu, muelu, mukola kĩsiitĩlia namabĩĩ;

⁹ nulũtyapile ulukaani lwa usuĩĩli kĩna iio naalĩ mumanigue wasũũme kukuakamĩnkĩĩlia ĩantu kuumanigua nawa kapanga, nukukuakunguma naĩkĩkunguma nduo.

Amania a ulongo

¹⁰ Kuitĩ akoolĩ iingĩ naakakũ, naakutambulaa inkaani nangila kandogolelio, apembeelia, nangũlũ ĩaasio a waalami; ĩa ijipĩĩle amũmigue ĩmĩlomo yaao.

¹¹ Ĩa naakugomolaa ĩantu a numba zensi naimania nasika zijĩpĩĩle kwimania koona aligie nsao, ziizo nsao za nsoni.

¹² uMuĩ wa kunsiao, munakĩdagu waao eene, uũgile, ĩAkilete ingĩ aloongo intondo tũlũ, nimu nambĩĩ, alakũ, akata.

¹³ Ukuĩli uu ingĩ wa tai. Kunsooko yoĩ uasokie kuutaki atũle a kapanga muusuĩĩli;

¹⁴ alekitegeela inshimu za kĩYahũdi, sunga ĩmalagĩĩlio maantu naasiitile ĩtai.

¹⁵ Intu tũlũ ingĩ yeelu kuantu naeelu; ĩpa kutilĩ nakielu kuaasio naadobũ nasika asuĩlĩĩle, ĩpa ishala liao sunga ĩmioo yaao yadobiligue.

¹⁶ Akukũmuulaa ya kina amuĩzĩ uNzua, ĩpa kuutendi waao akumukaanaa; ingĩ akola usuukua, aleki, sika ijĩpĩĩle kwitenda luensi naluuza.