Matayo 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Utanantia wa munkonko

¹ Pĩna numaona ĩmaũmbĩ, nunankĩla munkonko; nwikyalansa, ĩamaningua aakue naamuagaana.

² Numũmuula umulomo waakue, nuamania, nuũga;

Antu naaliukũ

³ “akembetue ĩatũka a nkolo; kuitĩ uutemi wa kwigyulu ingĩ waao.

⁴ Akembetue naakola usungu; kuitĩ ĩaasio ikipumbuligua.

⁵ Akembetue naapolo; kuitĩ ĩaasio ĩkakumĩsaala ĩnsĩĩ.

⁶ Akembetue naakola nzala nĩnoota kukulukuulu; kuitĩ ĩaasio ĩkakikyuta.

⁷ Akembetue naakola kĩnishungu; kuitĩ ĩaasio ikionelua kĩnishungu.

⁸ Akembetue naeelu munkolo; kuitĩ ĩaasio ĩkakumuona uNzua.

⁹ Akembetue naakuleetaa ĩmatiliga; kuitĩ ĩaasio ikiĩĩtua aana a kĩNzua.

¹⁰ Akembetue naakuagagiguaa kunsooko ya kulukuuluu; kuitĩ uutemi wa kwigyulu ingĩ waao.”

¹¹ Muakembetue pĩna ĩkakumutukĩla nukukumuagia nukukumutambula uubĩ wensi kuulongo, kunsooko yaane.

¹² Lumbĩ nukwilumbĩĩlia; kuitĩ ĩkĩpeegua kiani ĩngĩ kĩkulu kwigyulu; kuitĩ iio aliaaagilie ĩanakĩdagu naalĩ amutongelĩĩle.

Umania kwipũna mumpiani ya mulenge nĩntala

¹³ “Inie mwĩmulenge wa muna nsĩĩ; kanga umulenge usuuke ukilungĩlua yaani? Sika wijĩpĩĩle kakĩntu, isiititũla kwiiitũa kunzi nukũtilangĩlua nĩantu.

¹⁴ Inie mwĩweelu wa unkũmbigyulu. Kaa niĩĩlĩ munkonko sika ĩsũũmile kwipisigua.

¹⁵ ĩAntu sika akusonsagiaa ĩntala nukwiĩĩkĩla munsĩ ityooto, ĩpa pauĩĩko wa ntala; yukuamĩlĩkĩlaa tũlũ ensi naakoolĩ munumba.

¹⁶ Iio-iioo uweelu waani weelie ntongela ya antu, aone uutendi waani nauuza, amukulie uTata waani nwa kwigyulu.”

Ulagĩĩlio wa kalĩ nuulagĩĩlio wa kĩYesu

¹⁷ “Mulekishĩĩga kĩna alĩ nijile kukuwoonoona uUlagĩĩlio ninkaani za Anakĩdagu; Sika alĩ nijile kwioonoona, ĩpa kwikamĩnkĩĩlia.

¹⁸ Tai namuĩĩla; ‘Sunga igyulu nĩnsĩĩ pĩna zijililega, koolua kamuĩ katia kalutonua kamuĩ sika kikileegigua muUlagĩĩlio sunga tũlũ zensi zikondeeligue.

¹⁹ Wensi gua, kanga wakoonoone kalagĩĩlio kamuĩ muipi napiniino, nukukuamania ĩantu iio, ukiĩĩtua muniino kwikĩla tũlũ muutemi wa kwigyulu; ĩpa wensi nukupitenda nukukupimania, nuasio ukiĩĩtua mukulu muutemi wa kwigyulu.

²⁰ Namuĩĩla; Kanga ĩkulukuuluu yaani ĩlekikĩlĩkĩĩla ĩkulukuuluu ya alangi nĩApalisayo, sika mukiingĩla kainiino muutemi wa kwigyulu.’”

Wĩsukĩlua nuulagi

²¹ “Mũigilie ĩanakalĩ naalĩ aĩĩlue; ‘Ulekiulaga; wensi nukiulaga, yumũjipĩĩle ulamulua.’

²² Ĩne gua, namuĩĩla. Wensi nukumutakĩĩlaa umunũna waakue yumũjĩpĩĩle ulamulua. Nukumushoonelagia umunũna waakwe yumũjĩpĩĩle watualue kwilindi; numuntu wensi kanga wamumele, yumũjĩpĩĩle ĩGehena, ya mooto.

²³ Iio gua, kanga ĩwipũnia imasongelio maako paupolelio, nukunu wijuke kĩna umunũna waako, utĩĩte gyũndo kumuako,

²⁴ leka paapo imasongelio maako pawitekelo, lenda ukamantane tangua numunũna waako, paapo ushooke upũnie imasongelio maako.

²⁵ Kamantananga numulugu waako pĩna mwĩensi munzĩla, umulugu waleke kukuĩĩka mumĩkono ya mulamuli, numulamuli wakuĩĩke mumĩkono ya mulindĩĩla-kĩtũngo ugumĩlue mukĩtũngo.

²⁶ Tai nakuĩĩla, Sikukipũna muasio sunga ukalĩpe ĩkasenti ĩka mumalĩĩlio.”

Udobũ

²⁷ “Mũigilie kĩna alĩ itambulue; ‘Mulekigololia.’

²⁸ Ĩne gua, namuĩĩla. Wensi nukumulaaa umukĩĩma kuuawa, paapo wagololagia ninduyo munkolo yaakue.

²⁹ Kanga ĩliiso liako Iya kĩgoosia lĩkutimulie, ulĩkuule, ulĩtaage kulĩ ninduue; iiza nangũlũ ulimĩĩlie ĩkatũmpĩ kaako kamuĩ, kwikĩla umuĩlĩ waako wensi utaague muGehena.

³⁰ Kanga umukono waako wa kĩgoosia ukutimulie uudumule, uutaage kulĩ ninduue; iiza nangũlũ ulimĩĩlie ĩkatũmpĩ kaako kamuĩ, kwikĩla umuĩlĩ waako wensi utaague muGehena.

³¹ Kangĩ alĩ itambulue. Nukakumuleka umusungu waakue, wamupeele ĩkieti kya wĩleki.

³² Ĩne gua, namuĩĩla. Wensi kanga wamuleke umusungu waakue, isiititũla kunsooko ya usambo, ukumutendaa mugololia; numuntu wensi kanga wamutoole umusungu namulekue, wagololagiaa.”

Malapo nĩkulukuuluu

³³ “Kangĩ mũigilie kĩna ĩanakalĩ alĩ aĩĩlue. Ulekilapa kuulongo, ĩpa upikĩĩlie kwa kĩShekulu uulapi waako.

³⁴ Ĩne gua, namuĩĩla. Ulekiiila ityunu kainiino; sunga kwilapĩla igyulu, kuitĩ lĩĩlo tyengu lya kĩtemi lya kĩNzua;

³⁵ katia kwilapĩla ĩnsĩĩ, kuitĩ muumo uĩĩko wa mĩgulu yaakue; katia kũYelusalemũ, kuitĩ ĩĩo kaa ya mutemi namukulu.

³⁶ Katia ulekiiilĩla ityunu ityũe liako, kuitĩ sikusũũmile kwitenda tyũmbĩ lĩmuĩ lĩtũle lielu katia liilu.

³⁷ Utambuli waani utũle eeze yĩĩ eeze, zũi yĩĩ zũi; nazĩkĩongeela kuizi zukupũnaa kumubĩĩ.”

Umalia

³⁸ “Mũigilie kĩna alĩ itambulue. Liiso kuliiso, liino kuliino

³⁹ Ĩne gua, namuĩĩla. Muleke kĩkunguma numuntu namubĩĩ; ĩpa nuasio kanga wakukue lupĩĩ kuluakasa lwa kĩgoosia, umupĩlulĩlie nuluua.

⁴⁰ Nusiiile kukukusokia nukwishola ĩntiila yaako, umulekele numunkũmbĩ.

⁴¹ Nuasio nukakukukankanĩka wende maili ĩmuĩ, lenda ninduyo zibĩlĩ.

⁴² Nukukulompa umupeele. nusiiile kwilĩa mpaa kumuako, uleke kumũima.”

Uloogua nuukamĩnkĩĩlũ

⁴³ “Mũigilie kĩna alĩ itambulue, ‘Ukakuumuloogua umunakaa waako, nukukumusuukĩlua umulugu waako.’

⁴⁴ Ĩne gua, namuĩĩla; Alooguĩ ĩalugu aani, alompeelĩ naakumuagagiaa,

⁴⁵ koona mutũle aana a kĩTata waani nwa kwigyulu; kuitĩ ukuatuĩlagiaa ĩmpasu yaakue ĩabĩĩ nĩnaaaza, nukukuakuĩlia ĩmbũla ĩanakulukuuluu nĩnasika akulukuuluu.

⁴⁶ Kanga ĩmualogilue naamuloogilue, mutĩĩte kĩpeegua kĩ? Sunga ĩasangulia-koodi sika iio akutendaane?

⁴⁷ Kanga ĩmukuaũgia ĩanũna aani udũũ, mutendile yaani namuakĩlĩkĩlĩĩle? Sunga ĩandugu nazĩngĩ sika iio akutendaane?

⁴⁸ Iio gua muĩ akamĩnkĩĩlũ niniinie zĩ uTata waani nwa kwigyulu namukamĩnkĩĩlũ.”