Matayo 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Yohana Mubadĩĩzia nuutanantia waakue

¹ Pantondo zaasio nũgyelela uYohana Mubadĩĩzia nwitanantia mumbuga ya Uyahũdi, nuũga,

² “Pelĩ, kunsooko uutemi wa kwigyulu wasũgamĩlaa.”

³ Uyu wayu alimutambulue numunakĩdagu Yesaya, nuũga, “Luli lwa muntu lukĩtunta mumbuga, mĩzĩpĩĩliĩ ĩnzĩla ya kĩShekulu, Gololĩ pijĩla piakue.”

⁴ Nduyo uYohana alutĩĩte ntiila za maũli ma ngamĩa numusipi wa ndĩlĩ mukĩĩno kiakue; nindia zaakue alĩ inkumbĩ nuuukĩ wa muuwĩĩ.

⁵ Paapo naĩ kumuagana iYelusalemũ nu Uyahũdi wensi, nĩmatumbĩ miYolidani mensi,

⁶ Naabadĩĩzigua mumongo wiYolidani ninduyo, kunu naikũmuula ĩmĩlandu yaao.

⁷ Pĩna nuaona ĩApalisayo nĩAsadukayo iingĩ auuzĩlĩĩĩle ubadĩĩzo, nuaĩĩla, “Inie wĩleli wa nzoka, waani umusuguĩle muutalame uutaki naukiiiza?

⁸ Pĩĩ gua ĩnkali nizĩjĩpĩĩle uupeli!

⁹ Mulekishĩĩga nukwitambula munkolo zaani, ‘Kutĩĩte utata wĩĩtu, uIbũlahimu;’ luulo gua, namuĩĩla kĩna uNzua usũũmile mumagũe aya kukumũgyelelia uIbũlahimu ĩaana.

¹⁰ ĩMpoopo yaĩĩkaguaa pamatina mamakota. Luulo gua, ikyota liensi nasika Iyukupĩaa inkali nanziiza Iyukudumulaguaa nukwitaagua mumooto.”

¹¹ “Ĩne nukumubadĩĩzagiaa kumaazĩ kunsooko ya upeli; ĩpa uzo nũjile kunũma yaane, utĩĩte uusũũmi kwinkĩla ĩne, sika nijĩpĩĩle sunga kwikenka iilaatu yaakue; uzo ukakumubadĩĩzia kuMuau Muelu nukumooto.

¹² ĩKĩpeetelo kiakue kiĩlĩ mumukono waakue; ukakukĩpiagula sue ĩkĩuga kiakue; ukiĩĩka uupemba waakue mũshagĩ, ĩpa ĩmapuulĩlo ukakumasonsa mumooto nasika ukudibaa.”

Kwibadĩĩzigua kwa kĩYesu

¹³ Paapo ũYesu nupũna kũGalilaya, nuuza kũYolodani kwa kĩYohana, wabadĩĩzigue nduyo.

¹⁴ Nuĩ kumugilia, nuũga, “Ĩne injĩpĩĩle mbadĩĩzigue nunduue, nunduue wanzagaana ĩne.”

¹⁵ ũYesu numushookeelia, numuĩĩla. Ĩpaino naitũle iio! Kuitĩ yukũjĩpĩĩle kwitimĩĩlia ĩkulukuuluu tũlũ.

¹⁶ Pĩna ũYesu nubadĩĩzigua, Ĩkamuĩ nupũna mumaazĩ; laaa, igyulu nalĩkũnukuka, numuona uMuau wa kĩNzua witima zĩ nkunda mumuakue;

¹⁷ Luli kwipũna kwigyulu naluũga, “Uyu wayu Muana waane muloogua, nanumuloeeligue ninduyo.”