Matayo 28 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwiiiuka kwa kĩYesu

¹ Pĩna nalukĩla ulutondo lwa wikyali, ulutondo lwa muandio lwijũma pĩna naiiyeeleela, naenda uMalia nwa kuMagidala nuMalia muua kukukĩlaaa ĩkĩbĩĩla.

² Laaa, naukana mumanga mukulu, kunsooko malaĩka wa kĩShekulu nutima kwipũna kwigyulu, nuuza nulĩpingilitia igyũe, nulikyalansĩla.

³ Nikyelu liakue alĩ zĩ lupĩĩto, nintiila zaakue alĩ nzelu zĩ gyũe la mbũla.

⁴ Nukunsooko ya kumoopooka, ĩalindĩĩli naaikĩkĩma, naatũla zĩ akiu.

⁵ uMalaĩka nuashookeelia, nuaĩĩla ĩasungu, “Lekioopokĩ inie, kuitĩ manile kĩna mukumudũũma ũYesu naalĩ mukononteelue mumusalaba.

⁶ Ukutilĩ munu, kuitĩ wiiukaa kĩna aluũgile. Nzuĩ muone pĩna azugonile ũShekulu.

⁷ Ambukangĩ muaĩĩle ĩamanigue aakue, ‘Wiiukaa kwipũna muakiu. Laaa, wamutongeela inie kũGalilaya; kuuko mukakumuona.’ Laaĩ gua, namuĩĩlaa.”

⁸ Naaleganga pakĩbĩĩla kuooa nukuulumbi wingĩ; naamanka kukuaĩĩla ĩaamanigua aakue.

⁹ Laaa, ũYesu naataagana ndĩo, nuũga, “Weela!” Naamusũgamĩĩla naamuguĩla ĩmĩgulu, naamukulia.

¹⁰ Paapo ũYesu nuaĩĩla, “Lekioopokĩ; lendĩ muaĩĩle ĩanũna aane ende kũGalilaya; kuuko ikimona.”

¹¹ Pĩna alĩ alonguĩle, laaa, tyũmpĩ lya ĩlaasi naalindĩĩli naingĩla mukaa, naaaĩĩla ĩapolia naakulu tũlũ naalĩ zitendekile.

¹² Naĩlundĩĩla palumuĩ nĩanampala, naakomia ĩkialo, naapeela ĩĩlaasi mpiia ningĩ,

¹³ naaũga, “ũgĩ, ĩamanigua muutiku amũia, ishie pĩna aza kugonile.

¹⁴ Kanga ziigigue numutemi, kukakumupeepeelia mulekiligia uukunkunali.”

¹⁵ Naazishola impiia, naatenda kĩna alĩ amanigue. Nulukaani ulu nalusapatĩla muAyahũdi sunga nantende.

ũYesu kuigyeleela ĩatumua kũGalilaya

¹⁶ Nĩamanigua naikyumi numuĩ naenda kũGalilaya sunga kunkonko ĩĩzo ũYesu naalĩ waalagĩlĩĩlie.

¹⁷ Pĩna naamuona, naamutekela, ĩpa naĩngĩ naatũla ninkankani.

¹⁸ ũYesu nuaagaana, nuĩ kuatambuĩla, nuũga, “Napeegaguaa uusũũmi tũlũ wensi kwigyulu numuna nsĩĩ.

¹⁹ Luulo gua, lendĩ muzitende indugu tũlũ zensi zitũle amanigua, ĩmukuabadĩĩzia muliina lya kĩTata, nĩlya Muana, nĩlya Muau Muelu;

²⁰ ĩmukuamania aziambe tũlũ zensi naalĩ numulagĩlĩĩlie inie. Laaa ĩne nkoolĩ palumuĩ niniinie intondo tũlũ zensi, sunga kumpelo ya unkũmbigyulu.”