Matayo 26 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kialo kya kumuulaga ũYesu

¹ ũYesu pĩna numala inkaani izi zensi, nuaĩĩla ĩamanigua aakue,

² “Mumanile kĩna zikikĩla ntondo zibĩlĩ ikitũla Pasaka nuMuana-muntu ukipũnigua wakononteelue mumusalaba.”

³ Paapo ĩapolia naakulu nĩalangi nĩanampala a antu naĩilingĩĩla mukĩanda kya mupolia namukulu nukuĩtaguaa Kayafa;

⁴ naakomia ĩkialo, itĩ amuguĩle ũYesu kuupembeelia nukukumuulaga.

⁵ Naaũga, “Sika palutondo nalukulu, koona ilekitũla muzũgo muantu.”

ũYesu wipakua ĩmakũta kuBetania

⁶ ũYesu pĩna alĩ wĩĩlĩ kuBetania munumba ya kĩSimoni munamatana,

⁷ musungu numuagaana naalutĩĩte kasali ka makũta ma ngele nkakũ, numupĩnduĩla mwityũe liakue pĩna alĩ wikyalansile pandia.

⁸ iAmanigua pĩna naaona, naataka naaũga, “Waakĩ uulimĩĩlia uu?

⁹ Kuitĩ ĩmakũta aya aza ishũũmĩkile kwiguligua kuuguli naukulu, nukwipeegua ĩatũka.”

¹⁰ ũYesu pĩna nulĩnga, nuaĩĩla, “Nĩkĩ mukumuagia umusungu. Kuitĩ untendĩĩle utendi nauuza dũũ.

¹¹ Kuitĩ ĩatũka kuuzaa mwĩensi itondo zensĩ, ĩpa ĩne sika kwĩensi niniinie intondo zensĩ.

¹² Itĩ luulo, wampĩnduĩla umuĩlĩ waane ĩmakũta aya, azuntendĩĩle itĩ kwinjĩpĩĩlia kuuĩĩkua waane.

¹³ Tai namuĩĩla, Kuensi kĩna zikitanantigua iMpola naNziiza muna unkũmbigyulu tũlũ, naazuntendĩĩle uzu ukiganulua kuwijukĩlo waakue.”

Usongeelani wa kĩYuda

¹⁴ Paapo umuĩ wa aasio naikyumi naabĩlĩ, nukuĩtaguaa Yuda Isikaliote, nulongola kuapolia naakulu,

¹⁵ nuũga, “Musiiile kwimpeela yaani, pĩna nĩkakumuĩĩka munikono yaani? Naalagaana kukumupeela mpiia makumi matatu

¹⁶ Kwipũna paapo nũidũũma ĩlioma lya kumusakia.”

Ndia ya kĩShekulu

¹⁷ Palutondo lwa muandio lwa ugalĩ naugila igaaĩ ĩamanigua naamuagaana ũYesu, naaũga, “Usiiile kukuzĩpĩlĩlie mpĩĩ ĩPasaka?”

¹⁸ Nuaĩĩla, “Lendĩ mukaa kumuntu umuĩ,” mumuĩĩle, “uMumania uũgile, tyũngo liane lyasũgamĩĩla; kumuako nikilĩĩla ĩPasaka palumuĩ nĩamanigua aane.”

¹⁹ iAmanigua naatenda kĩna ũYesu alĩ waalagĩlĩĩlie, naamĩzĩpia ĩPasaka.

²⁰ Pĩna niĩ mpĩndĩ nwikyalansa pandia palumuĩ nĩamanigua naikyumi naabĩlĩ.

²¹ Pĩna alĩ ilĩa, nuũga, “Tai namuĩĩla, umuĩ waani ukinshakia.”

²² Naaonekia usungu, naandia kukumuĩĩla umuĩ, “Neenene Shekulu?”

²³ Nushookeelia, nuũga, “Uyo nutualile umukono kũlĩĩlania palumuĩ nineene mukiungu, uuzo ukinshakia.

²⁴ uMuana-muntu walongolaa kĩna alĩ muandĩkĩle, ĩpa ukĩa waakue gua, umuntu nuasio nukakumusakia uMuana-muntu! Taazu umuntu nuasio alĩ walekilelua.”

²⁵ Paapo ũYuda naalumusakilie nushookeelia, nuũga, “Neenene, Shekulu?” Numuĩĩla, “Uue uũgile.”

²⁶ Pĩna alĩ ilĩa, ũYesu nuusola uugalĩ nuukembeta, nuuega, nuapeela ĩamanigua aakue, nuũga, “Koĩ, mulĩe; uu wau muĩlĩ waane.”

²⁷ Nusola nĩkĩĩko, nusongelia, nuapeela, nuũga, “Kopelĩ tũlũ ensi muumo.

²⁸ Uu wau mugali waane wilyago nĩPia, nawiitĩkile kunsooko yaiingĩ kuuleegeligua wa mĩlandu.

²⁹ Ĩpa gua namuĩĩla. Kwipũna nantende sika nikikopa kangĩ uupĩi uu wa muzabiibu, sunga ulutondo luulo pĩna nĩkakuukopa naupia palumuĩ niniinie muutemi wa kĩTata waane.”

³⁰ Pĩna naakondia kwiĩmba, naapũna naenda kuNkonko ya Mĩzeituni.

ũYesu wipũnia uunakĩdagu kĩna ĩamanigua ĩkakumuleka

³¹ ũYesu nuaĩĩla, “Muutiku uu inie tũlũ mukishuukua kunsooko yaane nukũshooka kunũma. Kuitĩ yandĩkue, ‘Nĩkakumukua umudĩĩmi, ninkolo zikishapatĩla.’

³² Ĩpa pĩna nikiiiukigua, nĩkakumutongeela kũGalilaya.”

³³ uPetelo nushookeelia, numuĩĩla, “Kanga tũlũ ensi ashooke kunũma kunsooko yaako, ĩne sika nikitenda yaasio kainiino.”

³⁴ ũYesu numuĩĩla, “Tai nakuĩĩla, uutiku uu, umumbĩ ukaa wikaalĩkalakunkula, ukinkaana nkua zitatu.”

³⁵ uPetelo numuĩĩla, “Kanga injĩpĩle nakĩ kwikia palumuĩ ninduue sika nĩkakukukaana kainiino. ĩAmanigua tũlũ naaũga iio-iioo.”

ũYesu muGetisemane

³⁶ Paapo ũYesu nulongola palumuĩ ndĩo sunga pakĩtanga nakyukuĩtaguaa Getisemane, nuaĩĩla ĩamanigua aakue, Kyalansĩ papa, sunga nende uko nompe.

³⁷ Numusola uPetelo nĩaana abĩlĩ a kĩZebedayo, nuandia kwiona usungu, nukukĩsũsũma.

³⁸ Paapo nuaĩĩla, “ĩNkolo yaane ĩtĩĩte usungu piipĩ kwikia. Ĩĩmĩ papa mukengeale palumuĩ nineene.”

³⁹ Nutela iiniino, nugua pansĩ, nulompa, nuũga, “Tata, malĩĩ ĩishũũmĩkile, ĩkĩĩko ĩkĩ kĩnkĩle; ĩpa sika kĩna numuloelue ĩne, ĩpa kĩna umuloelue uue.”

⁴⁰ Nuaagaana ĩamanigua agonaa indoolo, numuĩĩla uPetelo, “Sika musũũmilene kwikengeala palumuĩ nineene sunga ĩnsaa nĩnĩmuĩ.”

⁴¹ Kyalĩ nuukenge nukwilompa, mulekiingĩla muugemua. ĩNkolo ndoogue, ĩpa umuĩlĩ muneketũ.

⁴² Nuenda kangĩ kaubĩlĩ, nulompa, nuũga, “Tata, malĩĩ ĩsika ishũũmĩkile ĩkĩĩko kĩnkĩle ndeke kukĩkopela, iio gua, uulooa waako utendue.”

⁴³ Nuenda, nuagaana agonile indoolo kangĩ, kuitĩ ĩmiiso maao alĩ maazaa malũto.

⁴⁴ Nualeka kangĩ nuenda nulompa kautatu, nuũga kangĩ nkaani zizo-ziizoo.

⁴⁵ Paapo nuaagaana ĩamanigua aakue, nuaĩĩla, “Gonĩ gua ĩpaino, musũũpie; ityũngo lyasũgamĩĩlaa, uMuana-muntu waĩĩkue mumĩkono ya anamĩlandu.”

⁴⁶ Uukĩ, kulongole; laaĩ nwinshakia wasũgamĩĩlaa.

Kwiguĩlua kwa kĩYesu

⁴⁷ Alĩ kĩlĩ witambula, laaa ũYuda, umuĩ wikyumi naabĩlĩ nupika; palumuĩ nduyo yũmbĩ kyulu, naatĩĩte ĩmaũmba nĩmasukulĩ, apũnile kuapolia naakulu nĩanampala a antu.

⁴⁸ Nduzo umusakania alĩ waapĩĩle kĩlĩngasĩĩlio, nuũga, “Nanĩkakumusuna, ingĩ uuzo; muguĩlĩ!”

⁴⁹ Ĩkamuĩ numuendeela ũYesu, nuũga, “Wiila Shekulu! numusunĩkia.”

⁵⁰ ũYesu numuĩĩla, “Musuamuua, wijilĩĩle yaani? Paapo naamuendeela, naamuguĩla ũYesu.”

⁵¹ Umuĩ waao naalĩ ĩensi nũYesu nusopoola iyũmba liakue, numudumula umusese wa mupolia namukulu, numutema ukutuĩ

⁵² Paapo ũYesu numuĩĩla, “Shookelia iyũmba liako mukĩnina kiakue, kuitĩ ensi naikityapaa iyũmba ikiulagua kwiyũmba.”

⁵³ Mbaa, usĩĩgile kĩna sika nsũũmile kukumuĩĩla uTata waane ninduyo ukindeetela ino-iinoo ĩamalaĩka kwikĩla magana manzogũ kyumi namabĩlĩ?

⁵⁴ Ukitimĩĩligua mbii uwandĩkua, kĩna itĩ yoi alĩ ijĩpĩĩle kwitũla?

⁵⁵ Kukatũngo kaasio ũYesu numaĩĩla ĩmaũmbĩ, “Mbii kamupũnile nĩmaũmba nĩmasukulĩ, munguĩle ĩne zĩ muleegelania? Lutondo kulutondo alĩ kuuzaa nikyalansile palumuĩ niniinie muNumba ya kĩNzua nanimania; sika namunguĩla.

⁵⁶ Ĩpa izi zensi zitũlile itĩ koona uwandĩkua wa anakĩdagu utimĩĩligue.” Paapo ĩamanigua naamuleka, naamanka tũlũ ensi.

ũYesu ntongela ya mupolia namukulu

⁵⁷ Ndĩo naalĩ amuguĩlile ũYesu naamutuala kwa kĩKayapa, umupolia namukulu, pĩna ĩalangi nĩanampala alĩ ĩilingĩlĩĩle.

⁵⁸ NuPetelo numutiatĩĩla kulĩ sunga kukĩanda kya mupolia namukulu; nũingĩla muumo, nwikyalansa palumuĩ nĩĩtumi, wamĩone ĩmpelo.

⁵⁹ iApolia naakulu nilindĩ liensi naaidũũma uukuĩli wa ulongo kwa kĩYesu, itĩ amuulage.

⁶⁰ Sika naaligia, kanga ĩakuĩli iingĩ a ulongo naalĩ igyĩĩle nakĩ.

⁶¹ Pembele abĩlĩ naigyelela naaũga, “Uyu aluũgile, ‘Nsũũmile kukumitaula iNumba ya kĩNzua, nukukumĩzengaa kangĩ kuntondo zitatu.’”

⁶² uMupolia namukulu nuĩmĩka, numuĩĩla, “Sika wishookeeliane kalukaani? Ĩa ikuĩla yaani kumuako.”

⁶³ Ĩpa ũYesu nutuulia. uMupolia namukulu numuĩĩla, “Nakulapia kwa kĩNzua namupanga, ukuĩĩle malĩ ue uue wĩKilisito, Muana wa kĩNzua.”

⁶⁴ ũYesu numuĩĩla, “Uue uũgile. Kangĩ numuĩĩlĩĩle, kwipũna nantende mukakumuona uMuana-muntu wikyalansile pamukono wa kĩgoosia nwa ngũlũ, upolokile mumalũnde ma kwigyulu.”

⁶⁵ Paapo umupolia namukulu nutandula intiila zaakue, nuũga, “Watukaa uNzua! Yaa kĩ gua, kwidũũma ĩakuĩli. Laaĩ mũigagiaa ĩpaino uutuki waakue!

⁶⁶ Musĩĩgileeii?” Naashookeelia, naaũga, “Yumũjĩpĩĩle kwikia.”

⁶⁷ Paapo naamutiĩla ĩmatĩ muusiu waakue, naamukua nkũndi, naĩngĩ naamukua mpĩĩ,

⁶⁸ naaũga, “Kilisito, ukupũnĩlie unakĩdagu, waani naazukukuile?”

Kwikaana kwa kĩPetelo

⁶⁹ nuPetelo alĩ wikyalansile panzi ya kĩanda; katũgua kamuĩ nakamuagaana, nakaũga, “Ue ninduue aza mwĩpalumuĩ nũYesu Mugalĩlaya.”

⁷⁰ Nukaana ntongela ya ĩa tũlũ, nuũga, “Sika nuluĩzĩ nukulutambula.”

⁷¹ Pĩna nupũna kunzi sunga kukĩtũli, munanso numuua numuona, nuaĩĩla naalĩ ĩĩlĩ paasio, “Uzu aza ĩpalumuĩ nũYesu Munazaleti.”

⁷² Nukaana kangĩ nukwilapa, “Sika numuĩzĩ umuntu nuasio!”

⁷³ Nakĩĩ katũngo, naalĩ ĩĩmĩkile paasio naamugaana uPetelo, naamuĩĩla, “Tai, ninduue mwĩpalumuĩ ndĩo, kunsooko ĩntambo yaako yakulagĩĩlaa.”

⁷⁴ Paapo nuandia kwijũma nukwilapa, “Sika numuĩzĩ umuntu nuasio.” Ĩkamuĩ umumbĩ nukunkula.

⁷⁵ Paapo uPetelo nulũjuka ulukaani lwa kĩYesu naalumuĩĩlĩĩle, “uMumbĩ yũkĩĩlĩ kalakunkula, ukinkaana nkua zitatu.” Nupũna kunzi nulĩla kuusungu dũũ.