Maliko 9 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Kwikaĩlĩka ikyelu

¹ Nuaĩĩla, tai namuĩĩla, akoolĩ naĩĩmĩkile ĩpa, sika ikilũla kankia sunga auone uutemi wa kĩNzua wijile kungũlũ.

² Pĩna nazikĩla ntondo mutandatu, ũYesu nuasola palumuĩ nduyo uPetelo nuYakobo nuYohana, nuatuala munkonko nandĩĩpũ ing'ene dũũ. Nukaĩlĩka ikyelu liakue ntongela yaao,

³ nintiila zaakue naziimĩlĩmĩnta, nazeela pee, kutilĩ kamuzĩpĩa-ntiila muna nsĩĩ nwishũũma kukuzeelia pee kĩna yaasio.

⁴ Naigyeleelua nuElia palumuĩ nuMusa, alĩ akĩtambuĩla nũYesu.

⁵ uPetelo nushookeelia numuĩĩla ũYesu, “Shekulu, iiza ishie nakwĩĩpa; kuzenge pigyũnda pitatu, kamuĩ kaako, kamuĩ ka kĩMusa, kamuĩ ka kĩElia.”

⁶ Kunsooko sika alumanile lwa kutambula, kunsooko alĩ oopookaa pũũ.

⁷ Lyũnde naliĩza nalĩakũnikĩla; luli nalupũna mwilyũnde, “Uyu wayu Muana waane muloogua, mũigiĩ umuene.”

⁸ Kaaaziilaaa kunu nukunu, sika naona kamuntu kangĩ, ĩpa ũYesu wing'ene dũũ palumuĩ ndĩo.

⁹ Pĩna alĩ iiika munkonko, nualagĩĩlia aleke kumuĩĩla nunumuĩ naalĩ azioonie, sunga uMuana-muntu pĩna ukiiiuka kwipũna muakiu.

¹⁰ Naaluamba ulukaani, naĩĩ kĩkolia eene kueene, kwiiiuka kwipũna muakiu, ĩndogolelio yaakue yaani?

¹¹ Naamukolia naaũga, “Nĩkĩ ĩalangi akuũgaa, Yumũjĩpĩĩle uElia waaze tangua?”

¹² Nuaĩĩla, “Tai, uElia wijile tangua wazĩpĩĩlie yensi; ĩpa palumuĩ niyaasio, nuandĩkĩlua mbii uMuana-muntu kĩna ukiaagĩkigua mingĩ nukwimelekigua.

¹³ Ĩpa namuĩĩla, uElia waazile, naamutendela tũlũ naalĩ aziloilue, kĩna alĩ muandikĩlue.”

Musumbatĩ munalĩsĩĩmuĩ wikamigua

¹⁴ Pĩna naapika kuamanigua, naaona yũmbĩ kyulu naalĩ lĩapilimĩkĩlĩĩlie, nĩalangi ĩkĩkunguma nindĩo.

¹⁵ Ĩkamuĩ iyũmbĩ pĩna nalĩmuona nalĩtunduala, nalĩmumankĩĩla, nalyumulamukia.

¹⁶ Nuakolia ĩaasio, “Mukikunguma yaani nĩndĩo?”

¹⁷ Umuĩ wiyũmbĩ numushookeelia, “Mumania aza numuleetile umuanaa kumuako, utĩĩte lĩsĩĩmuĩ lyĩkĩmũũmĩ;

¹⁸ Nĩpĩna lyukumũtyapaa lyukumutaagaa pansĩ, nduyo ukupũũtagiaa ipyombolũ nukwikelia nĩmiino, nuumagala buu. Naaĩĩla ĩamanigua aako kukulĩĩnga ĩlĩsĩĩmuĩ, alemua.”

¹⁹ Nuashookeelia nuũga, “Kaaa, wĩleli nasika ukusuĩĩlaa! Sunga nzalĩ nĩĩ kumiani? Sunga nzalĩ nĩkakĩuumĩĩlia niniinie? Muleetĩ kumuane.”

²⁰ Naamuleeta kumuakue. Pĩna numuona, ĩkamuĩ ĩlĩsĩĩmuĩ nalĩmuzũganga, nugua pansĩ, nũipingilita, nũipũũtia ipyombolũ.

²¹ Numukolia ũshee, kwipũna nzalĩ nualĩĩ itĩ? Nuũga, kwipũna uug'inia waakue.

²² Nkua ningĩ lyukumugumĩlaa mumooto numumaazĩ, koona lyĩmuulage. Malĩĩ usũũmile, ukualĩĩlie, ukuonele kĩsusu.

²³ ũYesu numuĩĩla, kanga ĩusũũmile! Tũlũ yensi ishũũmĩkile kumuakue nusuĩlĩĩle.

²⁴ Ĩkamuĩ ũshee wa mulĩĩsia nukuuta nuũga, nasuĩĩlaa; aalĩĩlia usiitishuĩĩla waane!

²⁵ ũYesu pĩna nulĩona iyũmbĩ lĩkĩlundĩkĩĩlanga, nulĩtakĩla ĩlĩsĩĩmuĩ, nulĩĩĩla, ue lĩsĩĩmuĩ munakĩmũũmĩ numunakĩlĩmba, ĩne nakulagĩĩlia, pũna mumuakue; uleke kumũingĩla kangĩ.

²⁶ Nalĩkuuta, nalyĩ kumuzũganga, nalyĩmupũna; nuĩ zĩmukiu, sunga iingĩ naaũga, “Wakiaa.”

²⁷ ũYesu numuamba umukono waakue, numuukia nuĩmĩka.

²⁸ Pĩna nũingĩla munumba, ĩamanigua aakue naamukolia ing'ene dũũ, “Nĩkĩ ishie sika nakusũũma kukulĩĩnga?”

²⁹ Nuaĩĩla, nalyĩkĩna itĩ sika lĩsũ umĩkile kwipũna isiititũla kuulompi udũũ.

Ukũnukuli wa kabĩlĩ wa nkia yaakue

³⁰ Naalega kuasio, naakĩlĩla muGalĩlaya; sika alĩ muloe kaumuĩ wamuone,

³¹ Kunsooko alukuamania ĩamanigua aakue, nukukuaĩĩla itĩ, uMuana-muntu walongolaa kwiĩĩkĩlua mumĩkono ya antu, ndĩo ĩkakumuulaga; nĩpĩna waulagua zikikĩla ntondo zitatu ukiiiuka.

³² Ĩpa sika naalĩnga ulukani luasio, naoopooka kukumukolia.

Umania mumpola za wĩniinupia

³³ Naapika kuKapelinaũmũ. Pĩna alĩ wĩĩlĩ munumba, nuakolia, aza mukĩkunguma yaani munzila.

³⁴ Naatuulia, kuitĩ alĩ ĩkĩtambuĩla eene kueene munzĩla, Waani namukulu.

³⁵ Nwikyalansa, nuĩĩta naikyumi nabĩlĩ nuaĩĩla, muntu nusiiile kwitũla wa muandio ukitũla wa mumalĩĩlio kwikĩla tũlũ, kangĩ mwĩtumi wa tũlũ

³⁶ Nukasola ĩkang'inia, nukaĩĩka pakatĩ yaao, nukakoleela, nuaĩĩla,

³⁷ uMuntu nukakukaanũnkula ĩkang'inia kamuĩ nakĩkĩna ĩka kuliina liane, winanũnkulaa uneene, numuntu kanga wananũnkule ĩne sikunanũnkuĩle uneene, ĩpa umuene naaluntumile.

Mpola za kusiitĩligua kugilania

³⁸ uYohana numuĩĩla, “Mumania alĩ kumuoonie muntu umuĩ alukumaĩnga ĩmasĩĩmuĩ kuliina liako nasika kukĩtiataa nindiishie, nakumugilia kunsooko sikukĩtiataa nindiishie.”

³⁹ ũYesu nuũga, lekĩ kukumugilia, kuitĩ kutilĩ nukutendaa ikyula kuliina liane, paapo kangĩ wasũũme kwitambula naibĩĩ;

⁴⁰ Kunsooko nasikukusiitile, unuasio wĩĩlĩ kuluandĩ luĩtu.

⁴¹ Wensi nukakumukopia inie ĩkĩĩko kya maazĩ kunsooko inie mwĩantu a kĩKilisito, tai namuĩĩla sika ukiulia ĩkĩpeegua kiakue.

Usuguli mumpola za kuakũmpia naingĩ

⁴² Wensi nukakumutimulia umuĩ wa aasio naaniino naansuĩlĩĩle, taazu watũngĩĩligue lĩluala munkingo yaakue wagumĩlue munanza.

⁴³ Numukono waako kanga ukutimulie, uudumule; taazu kwiingĩla muupanga umulema kwikĩla kwitũla nĩmĩkono ĩbĩlĩ nukwienda muGehena mumooto nasika ukudibaa.

⁴⁴ Numuasio ing'ũnuĩ sika zukukiaa numooto sika ukudibaa.

⁴⁵ Numugulu waako kanga ukutimulie, uudumule; taazu kwiingĩla muupanga ĩwĩmunakĩtele kwikĩla kwitũla nĩmĩgulu ĩbĩlĩ, nukwigumĩlua muGehena.

⁴⁶ Numuasio ing'unuĩ sika zukukiaa numooto sika ukudibaa.

⁴⁷ Nĩlĩĩso liako kanga lyukutimulie, lĩkuule ulĩtaage; tazu kwiingĩla muutemi wa kĩNzua utĩĩte, kyopo kwikĩla kwitũla nĩmiiso mabĩlĩ, nukwigumĩlua muGehena.

⁴⁸ Muasio ingũnuĩ sika zukukiaa numooto sika ukudibaa.

⁴⁹ Kunsooko muntu wensi ukilungĩlua mulenge kumooto.

⁵⁰ uMulenge ingĩ muuza, ĩpa umulenge kanga usuuke, mukiĩĩkĩla yaani ukolele. Muĩ numulenge munsĩ yaani, mwikyale nĩmatiliga niinie kuniinie.