Maliko 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wishiitua kuNazaleti

¹ Nulega kuasio, nuenda kunsiao, nĩamanigua aakue naamutiata.

² Pĩna alĩ lutondo lwa wikyali, nuandia kwimania mũshũnagogi. Iingĩ, pĩna naiigia naakũmia, naiũga, upũnilie mpĩĩ izi? Kangĩ masala kĩ naalĩ mupeegue uyu? Nĩmakula kĩna aya ma mĩkono yakue mitendeka mbii?

³ Sika wayune umuseesi, umuana wa kĩMalia, munũna wa kĩYakobo nũYose nũYuda nuSimoni? Nĩagũlĩ aakue akutilĩne pana nsĩĩtu? Naamukilua.

⁴ ũYesu nuaĩĩla, munakĩdagu sikukuulagiaa kikyulio isiitũla munsĩĩ yaakue nukuluuli luakue, numunumba yaakue.

⁵ Kuasio sika nusũũma kwitenda kikyula kalĩmuĩ, ĩpa aluĩĩkĩĩle ĩmĩkono yaakue udũũ mualuĩle akeei nuakamia.

⁶ Nukulĩlua kuusiitishuĩĩla waao. Nũipilima-pilimaa mũishaalĩ nukwimania.

Kwitumua kumuao naikyumi naabĩlĩ

⁷ Nuĩĩta naikyumi naabĩlĩ, nuandia kukuatuma abĩlĩ abĩlĩ, nuapeela usũũmi mumasĩĩmuĩ.

⁸ Nualagĩĩlia alekishola kampamba za munzĩla isiititũla ĩnkome dũũ, si mapũli, si mpĩnda, si mpeesa mumusipi;

⁹ ĩpa ajiale ilaatu, aleke kĩkũmba ĩmĩnkũmbĩ ĩbĩlĩ.

¹⁰ Nuaĩĩla, tũlũ pensi pĩna mũingĩla munumba, ĩĩmĩ muumo sunga mupũne kuasio.

¹¹ Nĩpaasio pĩna sika amusũgamĩĩlia katia kukumũigia, mulege paasio, lukũnũntĩ ulunkundĩ naluĩlĩ mumĩgulu yaani, wĩĩ ukuili kumiao.

¹² Naalongola, naatanantia ĩantu apele.

¹³ Naaĩnga ĩmasĩĩmuĩ mingĩ muantu, naaapaka ĩmakũta ĩaluĩle, naaakamia.

Kwiulagua kwa kĩYohana Mubadĩĩzia

¹⁴ Mutemi Helode nuziigia impola kunsooko ĩliina liakue alĩ lĩkũmuukile; nuũga, uYohana Mubadĩĩzia wiiukaa kwipũna muakiu, kunsooko ĩĩ makula mitenda mulĩmo munsĩ yaakue.

¹⁵ ĩĨĩa naaũga, “Ingĩ Elia. ĩIĩa naaũga, ingĩ munakĩdagu, zĩ umuĩ wa anakĩdagu.”

¹⁶ Ĩpa uHelode pĩna nũigia, nuũga, uyu wayu Yohana naalĩ numudumuĩle ityũe; wiiukile.

¹⁷ Kuitĩ uHelode muene aluatumile antu numuguĩla uYohana, numutũnga kukĩtũngo kunsooko ya kĩHelodia, umusungu wa munũna waakue uPilipo; kunsooko alĩ wamutoolile.

¹⁸ Kuitĩ uYohana alumuĩĩlĩĩle uHelode, mũiko kumuako kwitũla numusungu wa munũna waako.

¹⁹ Ĩpa uHelodia nuĩĩka igyũndo kumuakue, nusiia kukumuulaga, sika nusũũma,

²⁰ kunsooko uHelode alumoopookile uYohana, alumumanile kĩna ingĩ muntu wa kulukuuluu namuelu, numukendegeela. Pĩna numũigia nukunguala dũu nunduyo alukumũigagiaa kuulumbi.

²¹ Ĩpa ĩlioma naligyela pĩna ulutondo lwa kulelua kumuakue uHelode nalupika; nuazĩpĩlĩlia india ningĩ ĩakulu a kaa, ĩakulu a ulugu, nĩnaakũmuukile muGalĩlaya.

²² uMunanso wa kĩHelodia nuina, numuloeelia uHelode nindĩo naalĩ yĩensi pandia. uMutemi numuĩĩla umunanso, nompa tũlũ nusiiile nĩkakukupeela.

²³ Numũilĩla ityunu, “Kiensi nukinompa nĩkakukupeela, sunga uutemi waane nĩkakukutiĩla pakatĩ.”

²⁴ Nupũna numuĩĩla unina, “Nompe yaani. Nuũga, ityue lya kĩYohana Mubadĩĩzia.”

²⁵ Ĩkamuĩ nũingĩla kuukaaũ pamutemi, nulompa nuũga, nasiia umpeele ino-iinoo mukĩsela ityũe lya kĩYohana Mubadĩĩzia.

²⁶ uMutemi, usungu nausululĩla, ĩpa kunsooko ya kũila ityunu, nĩaasio naikyalansile ninduyo, sika nuloogua kukumusiitĩlia.

²⁷ Ĩkamuĩ numutuma umukulu wa kĩtũngo, nulagĩĩlia ityũe liakue lĩleetue. Nulongola numudumula ityũe mukĩtũngo,

²⁸ nulĩleeta ityũe liakue mukisela, numupeela umunanso, numunanso numupeela unina waakue.

²⁹ ĩAmanigua pĩna naaziigia, naaaza naausola umuĩlĩ waakue, naamuĩĩka mukĩbĩĩla.

Kwishooka kumuao naikyumi naabĩlĩ

³⁰ Nĩatumua naĩlundĩĩla pakĩYesu naamuganuĩla tũlũ zensi naalĩ azitendile nukukuzimania.

³¹ Nuaĩĩla, nzuĩ mwing'ene kĩna kutilĩ kaantu, musũũpie iniino. Kunsooko alĩ akoolĩ antu iingĩ naalĩ iiiza nukwienda, nalĩula kalioma lya kulĩa.

³² Naalongola mwipyango ing'ene kĩna alĩ tilĩ kaantu.

³³ Antu naaaona alonguĩle, iingĩ naaamana, naamanka kuasio kwipũna ikaa tũlũ naapika mbele.

³⁴ Pĩna nulega mwipyango nuona mulundo mukulu, nuaonela kĩsuusu kuitĩ alĩ zĩ nkolo nangila kamudĩĩmi, nuandia kukuamania ningĩ.

ũYesu ukualĩĩsia antu 5000

³⁵ Matũngo mingĩ pĩna namakĩla, ĩamanigua aakue naamuagaana, naaũga, “Munu mbuga ntilĩ, ĩpaino wiilaa.

³⁶ Alage alongole kumĩgunda nukũishaalĩ naipilimĩkĩlĩĩlie, ĩgulĩlie ĩkya kulĩa.”

³⁷ Nushookeelia, nuaĩĩla, apeelĩ uniinie kya kulĩa. naamuĩĩla, kulongolene kwigyula ĩmapũli ma shilinge magana mabĩlĩ, kuapeele alĩe.

³⁸ Nuaĩĩla, mutĩĩte mapũli manga. Longolĩ mulaae. Pĩna naamana, naaũga, “Mataano nishiĩ zibĩlĩ.”

³⁹ Nualagĩĩliaa aikyalansie ensi malindĩ-malindĩ, pamasanzĩ namatotũ.

⁴⁰ Naikyalansa nkĩlĩlĩ-nkĩlĩlĩ, ĩpĩĩa gyana, ĩpĩĩa makumi mataano.

⁴¹ Pĩna numasola ĩmapũli namataano, ninshiĩ nazibĩlĩ, nulangamĩla kwigyulu, numakembeta numaega ĩmapũli nuatiĩnkania ensi.

⁴² Naalĩa ensi naikyuta,

⁴³ Naasola ĩmaminangulua, naijulia ityooto kyumi naibĩlĩ, nĩma nsiĩ gaa.

⁴⁴ Nĩnaalĩ amalĩĩle ĩmapũli alĩ agoosia maagana ma nzogũ matano.

ũYesu wigenda mukiania ya nanza

⁴⁵ Ĩkamuĩ nuakangasĩĩlia ĩamanigua aakue ingĩle mwipyango, atongele kwityumbĩ kuBetisaida, pĩna uyo alukuulaga umulundo.

⁴⁶ Pĩna nualaga, nuenda kunkonko kwilompa.

⁴⁷ Pĩna niĩ mpĩndĩ, ipyango ali kĩlĩ liĩlĩ pakatĩ ya nanza, nduyo alĩ wing'ene pikiki.

⁴⁸ Nuaona akĩsinka kukulĩgendia ipyango kunsooko ĩnzega alĩpũnile kuntongela. Naitũla gyĩngu nwĩaagaana nwigenda munanza nuĩ zĩ ukuakĩla.

⁴⁹ Pĩna naamuona wigenda munanza naasĩĩga kĩna mwĩntũnga, naakuuta

⁵⁰ kunsooko tũlũ alĩ amuoonie, naakankanala. Ĩkamuĩ nwĩtambuĩla nĩndĩo, nuaĩĩla, kamiĩ nkolo, ingĩ neene, lekioopokĩ!

⁵¹ Nunankĩla mwipyango muna alĩ ĩĩlĩ; ĩnzega nĩtuula; naakulĩlua kwikĩlĩkĩĩla munkolo zaao,

⁵² Kuitĩ sika alĩ alĩngile impola za mapũli, ĩpa inkolo zaao nazikapũka.

Ukamigua naalĩ utendekile kuGenesaleti

⁵³ Pĩna naapũũta, naapika kunsĩĩ ya Genesaleti, naĩĩma paapo.

⁵⁴ Pĩna naapũna mwipyango, ĩkamuĩ ĩantu naamulĩnga,

⁵⁵ naamanka naasapatĩla munsĩĩ niasio yensi. Naandia kukuakenka naaluĩle muulĩlĩ, paasio pĩna alĩ iigilie pĩna alĩ wĩĩlĩ.

⁵⁶ Tũlũ pensi pĩna alĩ wingĩĩle mũishaalĩ numukaa numumĩgunda, naaaĩĩka ĩaluĩle pigyulĩlo, naamupeepia alĩpaatie sunga ishogolo lya ntiila yaakue udũũ; ĩaasio naalĩ amupaatilie naakamia.