Maliko 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uMugelasi munalĩsĩĩmuĩ wikamigua?

¹ Naapika kwityumbĩ lya nanza kunsĩĩ ya Agelasi.

² Pĩna nulega mwipyango, ĩkamuĩ nuagaanua numuntu naalupũnile paibĩĩla, munalĩsĩĩmuĩ;

³ uwikyaalĩ waakue alĩ paibĩĩla, alukutilĩ kaumuĩ naalusũũmile kukumutũnga, sunga ĩmatendele.

⁴ Kunsooko alukutũngaguaa ĩmatendele nĩmĩkoa nkua ningĩ; ĩmĩkoa nuĩtianga, nĩmatendele numaũnanga; kutilĩ nunumuĩ naalusũũmile kukumudula.

⁵ Ntondo zensi, utiku nĩmunsĩ alĩ wĩĩlĩ paibĩĩla numunkonko, nukwikuuta nukukĩtemanga namagũe.

⁶ Pĩna numuona ũYesu kĩlĩ wĩkulĩ, numumankĩĩla, numutũngamĩĩla,

⁷ nukuuta kululi lukulu, nuũga, “Kwĩmbii nunduue, Yesu, Muana wa kĩNzua nuĩlĩ kukiania? Nakulapia kwa kĩNzua ulekinjagia.” (

⁸ Kunsooko alĩ walĩĩĩlaa, “Ue lĩsĩĩmuĩ, pũna mumuntu.”)

⁹ Numukolia, “Ĩliina liako uue waani?” Numuĩĩla, “Ĩliina liane neene legioni, kunsooko kwĩiingĩ.”

¹⁰ Numupeepekia waleke kumaleegia munsĩĩ niasio.

¹¹ Nĩpaasio pankonko alĩ lĩkoolĩ dyale lya ngũlũi naalĩ zidĩĩma.

¹² ĩMasĩĩmuĩ tũlũ namamupeepia, namaũga, “Kutume mungũlũĩ, kuende kuzingĩĩla.”

¹³ Numagombia ĩmasĩĩmuĩ namapũna, namingĩla mungũlũĩ, ndĩlo idyale nalĩtinintĩkĩla pigyĩlĩlĩ sunga munanza; alĩ zĩ magana manzogũ mabĩlĩ, nazikapĩla munanza.

¹⁴ ĩAdĩĩmi aao naamanka naazishapatĩlia impola mukaa numũishaalĩ. ĩAntu naaaza aone nalutendekile.

¹⁵ Naamuagaana ũYesu, naamuona umunalĩsĩĩmuĩ wikyalansile, uyu wayu naalutĩĩte uLegioni, ujialile intiila, waazaa nĩmasala; naoopoka.

¹⁶ Ndĩo naalĩ aoonie naaaganuĩla impola naalĩ zumũgyelelĩĩle umunalĩsĩĩmuĩ ningũlũĩ.

¹⁷ Naandia kukumupeepia ũYesu walege mumĩmbĩ zaao.

¹⁸ Pĩna alĩ wiingĩla mwipyango, uzo naalĩ mũingĩĩlue nĩmasĩĩmuĩ numupeepia yĩĩ yĩensi nduyo.

¹⁹ Nduyo sika numugombia, ĩpa numuĩĩla, “Lenda kunumba yaako nukuantua aako, uaganuĩle naaza wakutendelaa ũShekulu, nĩkĩna azukukolĩĩlue ĩkĩnishungu.”

²⁰ Nuenda nuandia kwitanantia muDekapoli kĩna ũYesu alumutendĩĩle; naakulĩlua tũlũ ensi.

Wiiukigua wa kĩniYailo nukwikamigua kumusungu naalukupũnagiaa ĩmĩgali

²¹ ũYesu pĩna nukondia kwipũũta kwityumbĩ mwipyango, yũmbĩ kyulu nalyumulundĩkĩĩla; nduyo alĩ wĩĩlĩ pananza.

²² Nuuza umuĩ wa akulu a shũnagogi, ĩliina lĩakue Yailo; pĩna numuona, nugua pamĩgulu yaakue,

²³ numupeepia, nuũga, “Umunanso waane wĩpiipe kukia, wĩĩze umuĩĩkĩle ĩmĩkono yaako, umukamie, wĩĩ mupanga.”

²⁴ Nuenda palumuĩ nduyo, yũmbĩ kyulu nalyumutiata, nalyukumupĩnga-pĩnga.

²⁵ Numusungu umuĩ naalukupũnagiaa ĩmĩgali kumiaka kyumi nĩbĩlĩ,

²⁶ nuaga kuakilĩki iingĩ, numala inshao tũlũ naalutĩĩte, sika nuona kauuza nĩnainiino, ĩpa nulualĩĩla udũũ.

²⁷ Pĩna nuziigia izi ĩza kĩYesu, nuuza mwiyũmbĩ kwipũna kunũma, numĩamba ĩntiila yaakue.

²⁸ Kuitĩ nuũga, “Kanga mambe ĩntiila zakue udũũ nikikamia.”

²⁹ Ĩkamuĩ ĩnjiĩlio ya mĩgali yaakue nĩtipa, numana mumuĩlĩ waakue kĩna wakamagiaa muluago.

³⁰ Ĩkamuĩ ũYesu pĩna nulĩnga munkolo yaakue kĩna ngũlũ zamukeepela, nuũga, “Waani azumambĩĩlie intiila zaane?”

³¹ ĩAmanigua aakue naamuĩĩla, “Uoonie iyũmbĩ nalyukukupĩnga-pĩnga, ninduue wiũga, Waani numambĩĩlie.”

³² Nukalankalia wamuone naazutendile itĩ.

³³ Numusungu pĩna numana naaza mutendelue, noopoka nũikĩkĩma nuuza numuguĩĩla, numuĩĩla ĩtai yensi.

³⁴ Nduyo numuĩĩla, “Maau, uusuĩĩli waako wakukamagiaa, lenda nĩmatiliga, wĩĩ mupanga kwipũna muluago luako.”

³⁵ Pĩna alĩ kĩlĩ witambula, naaaza kwipũna kumukulu wishũnagogi naaũga umunanso waako wakiaa; yaakĩgua nakĩlĩ ukumuzũga uMumania.

³⁶ Ĩkamuĩ ũYesu pĩna nulũigia ulukaani naalĩ lutambulue, numuĩĩla umukulu wishũnagogi, “Lekioopoka, suĩĩla udũũ!”

³⁷ Sika numugombia kaumuĩ kukĩtiata ninduyo, isiititũla uPetelo nuYakobo nuYohana umunũna wa kĩYakobo.

³⁸ Naapika kunumba ya mukulu wishũnagogi, nuona umuzũgo nĩkĩlĩlo nuukuuti wingĩ.

³⁹ Pĩna nũingĩla, nuaĩĩla, nĩkĩ mukĩzũga nukwikuuta; umuana sikukiile, ĩpa ugonile ndoolo.

⁴⁰ Naamusekekia. Pĩna nuapũnia tũlũ ensi kunzi, numusola ũshee nunina wa muana nindĩo naalĩ yĩensi nduyo, nũingĩla muna alĩ wĩĩlĩ umuana.

⁴¹ Numũtyapa umukono umuana, numuĩĩla, “Talita kumi; ĩndogolelio yaakue, Munansoo nakuĩĩla, uuka!”

⁴² Ĩkamuĩ umunanso nuuka nũigenda; alutĩĩte miaka kyumi nĩbĩlĩ. Ĩkamuĩ naakulĩlua ukulĩlua ukulu.

⁴³ Nualagĩnkĩĩlia waleke kuzimana kaumuĩ, nuaĩĩla wapeegue india walĩe.