Maliko 13 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ũYesu wipũnia uunakĩdagu kuutaulua wa Numba ya kĩNzua ninazijiliiiza

¹ Pĩna alĩ wipũna muNumba ya kĩNzua, umuĩ wa amanigua akue numuĩĩla, “Mumania, laaa ĩmagũe nuuzengua uu wa ukulilua!”

² ũYesu nushookeelia numuĩĩla, “Waonaane uuzengua uu naukulu. Sika likishaaga kigyũe mukiania igyũe nasika likitaulua.”

³ Pĩna alĩ wikyalansile munkonko ya Mĩzeituni kwitunginkana ninumba ya kĩNzua, uPetelo nuYakobo nuYohana nuAndelea naamuũna kĩmpeelo, naamukolia wing'ene.

⁴ “Kuĩĩle, impola izi zikitũla nalĩ kangĩ kĩlĩngasĩĩlio kĩ, izi tũlũ pĩna zikiandia kwikondeeleka.

⁵ ũYesu nuandia kukuaĩĩla, Ĩsukuki, muntu wensi waleke kumulimĩĩlia.

⁶ Iingĩ ĩkiiiza kuliina liane iiũga, ‘Ĩne ingĩ muene, nĩndĩo ĩkakualimĩĩlia iingĩ!’

⁷ Niniinie pĩna mukiiigia impola za ulugu nuukũmuuki wa ulugu, mulekitũmbua; maasio mikitũla kutilĩ kawĩnegelo, ĩpa ĩmpelo ikĩĩlĩ.

⁸ Kuitĩ ndugu ikiuuka ĩkue nĩndugu, nuutemi wĩkue nuutemi; nĩmĩmanga uko ninduuko, nzala ikitũla ikoolĩ; aya maya muandio wa uwai naukulu.”

⁹ “Kendegeelĩ inkolo zaani, kuitĩ ĩkakumutuala kumalindĩ, numumasũnagogi mukikuua, mukiĩĩmĩkigua ntongela ya akulu nĩatemi kunsooko yaane, mutũle ukuĩli kumiao.

¹⁰ NiMpola naNziiza zikitanantigua tangua mundugu tũlũ zensi.

¹¹ Nĩpĩna ĩkakumutuala inie nukukumutũngia, muleke kĩkunkunalia kĩna mukitambula kĩ. Ĩpa luensi namukipeegua pityũngo liasio, lutambulĩ; kuitĩ sika niinie namwitambula, ĩpa ingĩ uMuau Muelu.

¹² Numunũna ukakumusakia umunũna waulague, nũshee numuana waakue yoi, nĩaana ĩkakuasakia ĩaleli aao aulague.

¹³ Niniinie mukitũlishuukĩlua nĩantu tũlũ kunsooko ya liina liane. Ĩpa umukola kugigimĩlia sunga kumpelo, uyo ukigũnĩka.

¹⁴ Ĩpa pĩna mwakĩona ĩkĩolũ kya oononeki kiĩĩmĩka pĩna sika ijĩpĩĩle (nwishoma nwalĩnge), paapo naĩĩlĩ muUyahũdi naatalamĩle kunkonko.

¹⁵ Numuntu nuĩlĩ kwityembe walekitima sunga walekiingĩla kwishola kakĩntu munumba yaakue.

¹⁶ Nunuasio nuĩlĩ kumugunda walekishooka kukuusola umunkũnbĩ waakue.

¹⁷ Ĩpa ukĩa kumuao naa maimbi nĩaasio naakoonkagiaa intondo zaasio!

¹⁸ Ĩpa lompĩ maleke kigyelela aya pantondo za mbula.

¹⁹ Kuitĩ intondo zaasio zikitũla za luago nasika lwalatũla, kwipũna umuandio wa kuumba pĩna uNzua aluumbile sunga nantende, kaangĩ sika lũjilitũla kainiino.

²⁰ Kanga ũShekulu ĩsika alukaguĩlie intondo zaasio, sika alũjiligũnĩka nunumuĩ; ĩpa kunsooko ya asaagulua naaluasaaguĩle nuzikagulia intondo.”

²¹ Paapo kanga muntu wamuĩĩle, “Laaa, ‘uKilisito nsuuyu papa’; laaa ‘nsuuyo uko,’ lekishuĩĩlĩ.

²² Kuitĩ mijile kigyelela maKilisito ma ulongo nĩmanakĩdagu ma ulongo, namikitenda iilĩngasĩĩlio nĩmakula kukualimĩĩlia, kĩna ishũũmĩkile, sunga ĩasaagulua.

²³ Inie gua, ĩkendegeelĩ; nakondagiaa kukumuĩĩla impola zensi.

²⁴ “Ĩpa pantondo zaasio, pĩna uluago luasio lwakĩla, ĩmpasu ĩkakilyupa, numueli sika ukieelia uweelu waakue,

²⁵ nishonda zikitũligua kwigyulu, ningũlũ nazĩĩlĩ kwigyulu zikishũngũsĩka.

²⁶ Paasio paapo ĩkakumuona uMuana-muntu upolokile mumalũnde kungũlũ ningĩ nuukulu.

²⁷ Paapo ukakuatuma ĩamalaĩka nukukuailingĩĩla ĩasaagulua aakue kwipũna kunandĩ zinĩĩ za upũnĩĩlo wa nzega, kwipũna kuluandĩ lwa mpelo ya nsĩĩ sunga kuluandĩ lwa mpelo igyulu.”

Kĩna ijipĩĩle kwikengeala

²⁸ “Ĩmaniĩ mpiani kumukuu; pĩna ulutambĩ luakue lukuũmbaa nukwishonga ĩmalũka, mukulĩngaa kĩna ĩsongola yanũnkaa.

²⁹ Iio gua niniinie pĩna mwaona aya makiigyela, mulĩnge kĩna wĩpiipĩ pamĩlango.

³⁰ Tai nukumuĩĩla, uluuli ulu sika lukikĩla sunga aya tũlũ mensi makondeeleke.

³¹ iGyulu nĩnsĩĩ zikikĩla, ĩpa inkaani zaane sikazĩkikĩla kainiino.

³² Ĩpa impola za lutondo luasio nityũngo liasio, kutilĩ nuzimanile, sunga ĩamalaĩka kwigyulu sunga uMuana, isiititũla uTata dũũ.

³³ Sukukĩ, kengealĩ, mulompe, kuitĩ sika mumanile ityũngo liasio pĩna likitũla.

³⁴ Ikitũla zĩ muntu nutũngile musĩnzo kulĩ, nuleka ĩnumba yaakue, nuapeela ĩĩtumi aakue uusũĩmi, wensi umulĩmo waakue, numulagĩĩlia umulindĩĩla-mulango wakengeale.

³⁵ Kengealĩ gua, kuitĩ sika mumanile pĩna ukiiiza ũShekulu wa numba, kanga mpĩndĩ, kanga muutiku wa katĩ, kanga pĩna ĩamumbĩ aikunkula, kanga daau;

³⁶ walekiiiza kumpũmpũkĩli wamuagaane mugonile

³⁷ Niitĩ nanukumuĩĩla inie, nukuaĩĩla tũlũ ensi, Kengealĩ.”