Maliko 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Yohana Mubadĩĩzia nuutanantia waakue

¹ Muandio wa Mpola naNziiza za kĩYesu Kilisito, Muana wa kĩNzua.

² Kĩna alĩ nandĩkue nuYesaya umunakĩdagu; “Laaa, Namutuma umutumua waane ntongela ya usiu waako, nukijĩpĩĩlia ĩnzĩla yaako;

³ luli lwa muntu lukĩtunta mumbuga: Mĩzĩpĩĩliĩ ĩnzĩla ya kĩShekulu, Pigololĩ ipijĩla piakue.”

⁴ uYohana mubadĩĩzia nwigyelela mumbuga, nukwitanantia ubadĩĩzo wa upeli kuuleegeligua wa mĩlandu.

⁵ Naĩĩ kumuagaana ĩansĩĩ yensi nya Uyahũdi, nĩaniYelusalemũ; naabadĩĩzigua nunduyo mumongo wiYolidani, naikũmuula ĩmĩlandu yaao.

⁶ uYohana alukĩtũngaa ĩntiila ya maũli ma ngamĩa, numusipi wa ndĩlĩ mukĩĩno kiakue, nulĩa inkumbĩ nuuukĩ wa muuwĩĩ.

⁷ Nutanantia, nuũga, “Upolokile kunũma yaane namukola ngũlũ kwikĩla ĩne. Nineene sika nijĩpĩĩle kwitũna nukwitũngula sunga ĩmĩkoa ya ilaatu yaakue.

⁸ Ĩne numubadĩĩzilie kumaazĩ, ĩpa uzo ukakumubadĩĩzia kuMuau Muelu.”

Kwibadĩĩzigua kwa kĩYesu

⁹ iNtondo zaasio nuuza ũYesu kwipũna kuNazaleti ya Galĩlaya, nubadĩĩzigua nuYohana mũYolidani.

¹⁰ Ĩkamuĩ pĩna nupũna mumaazĩ, nuona igyulu nalĩkũnukuka, nuMuau zĩ nkunda, nutima mumuakue;

¹¹ luli nalupũna kwigyulu, “Ue uue Muana waane muloogua; nanumuloeeligue ninduue.”

Kwigemua kwa kĩYesu

¹² Ĩkamuĩ uMuau numutuala kumbuga.

¹³ Nuĩmumbuga intondo makumi manĩĩ, nũgemua nũShetani; nayĩĩ ĩensi ninimu; ĩamalaĩka naĩĩ kumutumĩla.

ũYesu wiandia umulĩmo waakue

¹⁴ uYohana Pĩna alĩ mutũngue mukĩtũngo ũYesu nuenda kũGalilaya, nũitanantia iMpola naNziiza za kĩNzua,

¹⁵ nuũga, “iTyũngo lyatimĩlaa, nuutemi wa kĩNzua wasũgamĩĩlaa; pelĩ musuĩĩle muMpola nanziiza.”

¹⁶ Pĩna nukĩlĩla pananza ya Galĩlaya, numuona uSimoni nuAndelea umunũna waakue, igumĩla ĩmazũĩlo munanza kuitĩ alĩ azũa-nsiĩ.

¹⁷ ũYesu nuaĩĩla, “Ntiatĩ, nineene nĩkakumutenda muĩ azũa-antu.”

¹⁸ Ĩkamuĩ naamaleka ĩmazũĩlo, naamutiata.

¹⁹ Nugenda kapenento, numuona uYakobo ũsha Zebedayo nuYohana umunũna waakue, ndĩo alĩ ĩĩlĩ mwipyango, naakumazĩpĩĩlia ĩmazũĩlo.

²⁰ Ĩkamuĩ nuĩĩta, naamuleka utata waao uZebedayo mwipyango palumuĩ nĩanamulĩmo, naamutiata.

ũYesu ukumukamia umunalĩsĩĩmuĩ kuKapelinaũmũ

²¹ Naingĩla muKapelinaũmũ; ĩkamuĩ palutondo lwa wikyali nũingĩla mũshũnagogi, nũimania.

²² Naakũmia kuumania waakue, kunsooko aluamanilie zĩ mukola usũũmi, sika kĩna ĩalangi.

²³ Muasio mũshũnagogi liao, ĩkamuĩ alukoolĩ muntu munalĩsĩĩmuĩ,

²⁴ nalĩkuuta, nalĩũga, “Kwĩmbii ninduue, Yesu Munazaleti? Wijile kukukumalane? Nukuĩzĩ wĩwaani; uue Muelu wa kĩNzua.”

²⁵ Yesu nulĩtakĩla, nuũga, “mũma, pũna mumuakue!”

²⁶ ĩLĩsĩĩmuĩ nalĩmuzũganga, nalĩlĩla kululi lukulu, nalĩmupũna.

²⁷ Naĩtũmba tũlũ ensi naĩĩ kĩkolia, naiiũga; “Yaani itĩ? Umanigua upia! Kuusũũmi wamalagĩĩlia ĩmasĩĩmuĩ, mamugombia.”

²⁸ Ĩkamuĩ impola zaakue nazikũmuukanga tũlũ pensi kunandĩ za Galĩlaya.

ũYesu ukumukamia umukuĩ namukĩĩma nwa kĩPetelo palumuĩ nĩnaĩngĩ iingĩ

²⁹ Ĩkamuĩ pĩna naalega mũshũnagogi, naapika kunumba ya kĩSimoni nuAndelea, palumuĩ nuYakobo nuYohana.

³⁰ Numukuĩ wa kĩSimoni alugonile, alĩ muluĩle; ĩkamuĩ naamuĩĩla impola zaakue

³¹ Numusũgamĩĩla, numuuukia numuamba umukono; uuluĩle naumulegela, nuĩ kuatumĩla.

³² Pĩna niĩ mpĩndĩ ĩmpasu pĩna nĩsaalĩĩla, naĩĩ kumuleetela tũlũ naalĩ alemue, nĩanamasĩĩmuĩ.

³³ Nĩkaa yensi alĩ ĩlundĩlĩĩle pamulango.

³⁴ Nuakamia iingĩ naalĩ alemue uluĩle nauluĩle, numaĩnga ĩmasĩĩmuĩ mingĩ, sunga sika numagombia kwitambula, kunsooko alĩ mamuĩzĩ.

ũYesu wiĩĩma kĩmpeelo nukwilompa, kangĩ wilega muKapelinaũmũ

³⁵ Nuuuka mwigyĩngu, kĩlĩ iilu, nupũna nulongola kumbuga kĩna tilĩ kaantu, kuasio nulompa.

³⁶ uSimioni nĩaasio naalĩ ĩensi naamutalamĩĩla;

³⁷ Pĩna naamuona naamuĩĩla, “Tũlũ ensi aza akukudũũma.”

³⁸ Nuaĩĩla, “Kuĩni nukuua, sunga kũishaalĩi nayĩpiipĩ, koona ntanantie nukuasio. Ĩĩ yaĩ nsooko alĩ nijilĩĩle.”

³⁹ Nuenda nutanantia mumasũnagogi mao munsĩĩ yensi nya Galĩlaya, nukwiĩnga ĩmasĩĩmuĩ.

Munamatana wikamigua

⁴⁰ Nuuza kumuakue munamatana, numupeepia nukũtũngama pamuakue, nuũga, “Kanga ĩumuloe, wishũũma kwinjelia.”

⁴¹ ũYesu numuonela kĩsuusu, nunansula umukono waakue, numuamba, numuĩĩla, “Numuloe, eela!”

⁴² Ĩkamuĩ ĩmatana namamulegela, nueligua.

⁴³ Numulagĩnkĩĩlia, ĩkamuĩ numuleegia kuukaaũ,

⁴⁴ Numuĩĩla, Laaa, uleke kumuĩĩla umuntu wensi kalukaani; ĩpa lenda wĩambie kumupolia, upũnie ĩsadaka ya kueligua kumuako kĩna uMusa alulagĩlĩĩlie, yĩĩ ukuĩli kumuao.

⁴⁵ Ĩpa nupũna, nuandia kwitanantia ningĩ nukwishapatilia ulukaani luasio, sunga ũYesu sika nusũũma kwiingĩla mukaa ĩwigyelĩĩle kualiĩ; ĩpa alĩ wĩĩlĩ kuweekusĩ, naamuagaana kwipũna nandĩ zensi.