Luka 21 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Sadaka ya mukiĩlua mutũka

¹ Nunansula ĩmiiso maakue nuaona ĩagolĩ iĩĩkĩla ishadaka zaao muuĩĩkĩlo wa sadaka.

² Numuona mukiĩlua umuĩ mutũka nuĩĩkĩla pishenti pibĩlĩ muasio.

³ Nuũga, “Tai-taaii namuĩĩla, umukiĩlua nuasio namutũka azuĩĩkĩĩle iingĩ kwikĩlĩĩkĩĩla tũlũ ensi;

⁴ Kuitĩ ĩa tũlũ aza iĩĩkĩla kwipũna munsao zaao nazikĩlĩkĩlĩĩle, ĩpa uyu muutũka waakue azuĩĩkile tũlũ nuzitĩĩte za kĩlĩĩsia.”

ũYesu wikũnukula impola za kugũmulua iYelusalemũ nĩmpelo ya unkũmbigyulu

⁵ Nityũmpĩ lya antu pĩna alĩ akĩtambuĩla impola za Numba ya kĩnzua, kĩna alĩ nzogeeligue kumagũe namaaza niipeelo ya antu, nuũga;

⁶ “Mumpola za aya namwilaaa, intondo zijiliiiza pĩna sika likishaaga kigyũe mukiania igyũe nasika likigũmulua.”

⁷ Naamukolia naaũga; “Mumania, impola izi zikitũla nalĩ, kangĩ kĩlĩngasĩĩlio kĩ pĩna aya mĩpiipĩ kukigyelela?”

⁸ Nuũga, “Laaĩ, aleke kumulimĩĩlia, kuitĩ iingĩ ikiiza kuliina liane Iiuga, ‘ĩne neene;’ kangĩ; ‘iTyũngo lyasũgamĩĩla!’ Muleke kuatiata ĩaasio.

⁹ Ĩnie pĩna mukakigyũlia impola za ulugu nĩmalanga, mulekioopookigua, kuitĩ ĩzaasio zĩkakigyelela umuandio kutilĩ kawĩnegelo; ĩpa ĩmpelo sikaa ĩkakigyelela kuukaaũ.”

¹⁰ Paapo nuaĩĩla, “ĩNdugu ikiuuka ĩkue nĩndugu, nuutemi wĩkue nuutemi;

¹¹ ikitũla mĩmanga mĩkulu nĩnzala, nĩmauluĩle uko nĩnduuko, nimpola za koopokia, niilĩngasĩĩlio ikulu kwipũna kwigyulu.

¹² Ĩpa pĩna aya tũlũ mikaalĩ kukigyelela ĩkakumuguĩla inie nukukumuagia; ĩkakumutuala kumasũnagogi nukũitũngo, kangĩ mukitualua kuntongela ya atemi niijũmbe kunsooko ya liina liane.

¹³ Nindaaya mĩkakigyela mutũle akuĩli.

¹⁴ Ĩpa gua, mukamie inkolo zaani, mulekipinda-pinda tangua kĩna mukishookeelia,

¹⁵ Kunsooko ĩne nĩkakumupeela ĩmĩlomo nĩmasala, ĩalugu aani nasika ikishũũma kukumadula nukukumupĩnga-pĩnga.

¹⁶ Niniinie mukishakigua sunga nĩaleli nĩanũna nĩantua nĩasuaĩaani, nĩndĩo ĩkakumuulaga namwĩingĩ mumiani.

¹⁷ Niniinie mukishuukĩlua nĩantu tũlũ kunsooko ya liina liane.

¹⁸ Ĩpa ityũmbĩ kalĩmuĩ sika likilimansĩĩligua mumatũe maani.

¹⁹ Niniinie kuugigimĩlia waani mukiligia inkolo zaani.

²⁰ “Ĩpa pĩna mukakumĩona ĩkaa iYelusalemũ ipilimĩĩligua nĩmaũmbĩ ma ĩlaasi, paapo mumane ya kĩna uoononeki waakue wasũgamĩlaa.

²¹ Paapo naĩĩlĩ muUyahũdi atalamĩle kunkonko, nĩnaĩĩlĩ mukaa apũne kunzi, nĩnaĩĩlĩ mumĩgunda alekiingĩla muasio.

²² Kuitĩ intondo zaasio ingĩ za ukaasĩki, koona matimĩĩligue tũlũ naalĩ mandĩkue.

²³ Ukĩa kumuao naatĩĩte ĩmaimbi nĩnaakonkagiaa pantondo zaasio! Kuitĩ lukitũla luago lukulu muna nsĩĩ nuutaki kuantu a luuli ulu.

²⁴ Ikigua kuuugĩ wiyũmba, nĩndĩo ikiguĩlua utepua nukwisholua pakatĩ ya ndugu tũlũ, niYelusalemũ ikitilangĩlua nindugu nazĩngĩ sunga pĩna matũngo ma ndugu nazĩngĩ mikikondeeligua.

²⁵ “Kangĩ ukaa ikoolĩ ilĩngasĩĩlio mumpasu, mumueli, munsonda, numuna nsĩĩ luago lwa ndugu muutunduali kunsooko ya musũngũsĩko wa nanza nĩmaĩngo.

²⁶ ĩAntu ikia umukanka kuooa nukwilaaĩĩla impola nazijile muna unkũmbigyulu, kunsooko ingũlũ zigyulu zikishũngũsĩka.

²⁷ Paasio paapo ĩkakumuona uMuana-muntu ĩwijile mwilyũnde palumuĩ ningũlũ nuukulu wingĩ.

²⁸ Ĩpa impola izi pĩna zikiandia kukigyela, langamĩlĩ kwigyulu nukwinansula ĩmatũe maani, kunsooko uukomolua waani wasũgamĩĩlaa.”

Kĩna ijĩpĩĩle kwikengeala

²⁹ Nuaĩĩla mpiani, “Ulaaĩ umukuu nĩmakota mensi.

³⁰ Pĩna makondaa kwishonga ĩmalũka, mukuonaa nukwilĩnga inie uniinie ya kĩna ĩsongola yanũnkaa

³¹ Iio niniinie pĩna mwaona impola izi zandia kukigyela, mulĩnge ya kĩna uutemi wa kĩnzua wasũgamĩĩlaa.

³² Tai namuĩĩla, uwĩleli uu sika ukiula sunga aya tũlũ makondeeleke.

³³ iGyulu nĩnsĩĩ zikikĩla, ĩpa inkaani zaane sika zikikĩla kainiino.

³⁴ “Ĩsukukĩ gua, inkolo zaani zilekilemeeligua nuulakũ nulugaalo nuukunkunali wa uumĩ uu, sunga ulutondo luasio lumuagaane kumpũmpũkĩli zĩ mutego nukuguĩlanagiaa.

³⁵ Kuitĩ iio yĩkakuaagaana ĩantu tũlũ naikyalile muusiu wa nsĩĩ tũlũ.

³⁶ Kyalĩ nuukenge gua matũngo mensi nukwilompa, koona muligie ngũlũ kwimanka kwipũnĩĩla muaya tũlũ namĩkakigyela, nukwiĩĩmĩka ntoongela ya Muana-muntu.”

³⁷ Nulutondo luensi alukumanagiaa munumba ya kĩNzua, ĩpa muutiku alukulongolaa kwigona munkonko nyukuĩtaguaa Mĩzeituni.

³⁸ Nĩantu tũlũ alĩ akulaĩlaa kĩlĩ daau naenda naamuagaana munumba ya kĩNzua amũigie.