Luka 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Muandĩĩlio

¹ Kunsooko iingĩ ĩkunkunĩĩlie kwiandĩka kĩĩsa-kĩĩsa impola naalĩ ntimĩĩligue pakatĩ yĩĩtu,

² kĩna alĩ akuganulĩĩle kwipũna umuandio, ĩaasio naalĩ akuĩli aakola kuziona nĩĩtumi a Lukaani,

³ nineene gaa naona kĩna iiza kunsooko alĩ mpelelĩĩle kĩĩsa-kĩĩsa kwipũna ĩkalĩ impola tũlũ, kukukuandĩkĩla shekulu Teopilo numuKulu,

⁴ koona umane ĩtai ya nkaani nalumumanigue.

Ukũnukulua mumpola za kulelua kwa kĩYohana Mubadĩĩzia

⁵ Patondo za kĩHelode mutemi wa Uyahũdi, alukoolĩ mupolia umuĩ, ĩliina liakue Zakalia, wa wĩali wa kĩAbia; numusungu waakue alĩ wa wĩleli wa kĩAloni, ĩliina liakue Elizabeti.

⁶ Tũlũ ensi abĩlĩ alĩ anakulukuuluu ntongela ya kĩNzua, naĩkamatĩkia mumalagĩĩlio mensi numuulagĩĩligua wa kĩShekulu, naĩĩ agila kishokio.

⁷ Nĩndĩo alĩ agila kamuana kunsooko uElizabeti alĩ mugumba, ndĩo tũlũ muubĩlĩ alĩ akombitile.

⁸ Pĩna alĩ wipolia mũlika lya wĩali waakue ntongela ya kĩNzua

⁹ kĩna alĩ ntendo ya apolia, nusaagulua wingĩle munumba ya kĩShekulu wakũũsĩĩle.

¹⁰ numulundo wensi wa antu alĩ ilompa panzi pityũngo lya kukũũsĩĩla.

¹¹ Nũgyeleelua numalaĩka wa kĩShekulu, wĩĩmĩkile paluandĩ lwa kĩgoosia paupolelio wa kukũũsĩlĩla.

¹² uZakalia pĩna numuona nukankanala, nũingĩĩlua nuooa.

¹³ Ĩpa uMalaĩka numuĩĩla, “Lekioopoka Zakalia, kuitĩ uulompi waako wiigagiguaa, numusungu waako uElizabeti ukakukulelelia muana mugosia, ukakumuĩta ĩliina liakue Yohana.

¹⁴ Nunduue ukitũla nuulumbi nukwiluluma, nĩantu iingĩ ĩkakuulumbĩĩlia uulelua waakue.

¹⁵ Kunsooko uzo ukitũla mukulu ntongela ya kĩShekulu, sikukikopa umubinio katia kĩgaalio Ukakijulua nuMuau Muelu, Sunga kwipũna mundaa ya kĩnina.

¹⁶ Ukakuagomola aana iingĩ a ĩSilaeli kwa kĩShekulu Nzua waao.

¹⁷ Nduyo ukitongela pausiu waakue mukola nkolo ningũlũ za kĩElia, wazigomole inkolo za ishee zitungĩnkane nĩaana, nĩaleki atiate ĩmasala ma anakulukuuluu, wamulĩganĩlĩlie ũShekulu ĩantu naĩzĩpĩlĩĩlie.”

¹⁸ uZakalia numuĩĩla uMalaĩka, “Nikimana mbii izi? Kuitĩ ĩne numunampala numusungu waane mukombi wa ntondo ningĩ.”

¹⁹ uMalaĩka numushookeelia nuũga, “Ĩne neene Gabilieli nanukuĩmĩkaa pantongela ya kĩnzua; numutumue kukĩtambuĩla nunduue nukukukuĩĩla impola izi nanziiza.

²⁰ Ĩpa laaa, ukitũla munakĩmũũmĩ, ulemue kwitambula sunga kulutondo luasio pĩna izi zijile kigyelela, kunsooko sikusuĩlĩĩle inkaani zaane; nindizo zijilitimĩĩligua mũtyũngo liakue.”

²¹ ĩAntu naalĩ amutũngĩĩle uZakalia naakulĩlua uutinia waakue muasio muNumba ya kĩNzua.

²² Pĩna nupũna sika nusũũma kukĩtambuĩla nĩndĩo, naalĩnga ya kĩna azuoonie kyula munumba ya kĩNzua. Nduyo nuatambulĩla ĩmĩkono, kunu namunakĩmũũmĩ.

²³ ĩNtondo za upolia waakue pĩna naziula, nulongola kukaa yaakue

²⁴ Pĩna nazikĩla intondo zaasio, uElizabeti musungu waakue nuligia ndaa, nwĩpisa ĩmieli ĩtaano nuũga,

²⁵ “Itĩ yoi alutendĩĩle ũshekulu muntondo pĩna alundaaĩkilie, nundeegelia inshoni zaane ntongela ya antu.”

Utanantio mumpola za kulelua kwa kĩYesu

²⁶ Pamueli wa mutandatu uMalaĩka Gabilieli nutumua nuNzua kukaa ya Galĩlaya nyukuĩtaguaa Nazaleti,

²⁷ kumunanso naalĩ muuuligue numuntu, ĩliina liakue Yosepũ wa kĩntua kya kĩDaudi; nĩliina lya munanso alĩ Malia.

²⁸ Pĩna numuagaana, nuũga “matiliga kumuako numukembetue, ũShekulu wĩpalumuĩ ninduue,”

²⁹ Nduyo nukankanala dũũ kunsooko ya lukaani luakue; nuĩ kĩsĩĩgia ĩĩ mĩlamu kĩ.

³⁰ uMalaĩka numuĩĩla, “Ulekioopoka Malia, kuitĩ waligagiaa uukende kwa kĩNzua,

³¹ laaa, ukitũla nĩndaa ukilela muana, ukakumuĩta ĩliina liakue Yesu.

³² Uyo ukitũla mukulu, ukiĩĩtua Muana wa Nwa kukiania; ũShekulu Nzua ukakumupeela ityengu lya kĩtemi lya kĩDaudi ũshee.

³³ Ukakumĩtema ĩnumba ya kĩYakobo sunga ĩkalĩ nakalĩ, nuutemi waakue ukaa ugila kampelo.”

³⁴ uMalia numuĩĩla uMalaĩka “Ikitũla mbii, kuitĩ sika numuĩzĩ kamugoosia?”

³⁵ uMalaĩka numushookeelia, nuũga “uMuau Muelu ukiiiza mumuako, ningũlũ za Nwa kukiania zĩkakukukũnĩkĩla umulũle; luulo gua umuana nukilelua ukiĩĩtua muelu, Muana wa kĩNzua.

³⁶ Laaa, uElizabeti, muntua waako waligilie ndaa ya muana mugoosia muukombi waakue, numueli uu wa mutandatu kumuakue naalukuĩtaguaa mugumba;

³⁷ kunsooko kutilĩ kalukaani nasika lũshũũmĩka kwa kĩNzua.”

³⁸ uMalia nuũga, “Laaa, ĩne nĩmuasi wa kĩShekulu; naitũle kumuane mũlika lya lukani luako.” uMalaĩka nulega nulongola.

uMalia ukumusoolia uElizabeti liĩmbo likyulio

³⁹ uMalia nuuuka muntondo zaasio, nulongolanga kunsĩĩ ya piikonko kukaa ĩmuĩ nya kũYuda.

⁴⁰ Nũingĩla munumba ya kĩZakalia, numuũgia uElizabeti.

⁴¹ uElizabeti pĩna nũigia ĩMĩlamu ya kĩMalia, ĩkaana nakapũũta mundaa yaakue, uElizabeti nwijulua nuMuau Muelu,

⁴² nwĩtunta kululi lukulu, nuũga “wakembetaguaa ue pakatĩ ya asungu; numulelua wa ndaa yaako wakembetaguaa!

⁴³ Lwingyelelaa mbii ulukaani ulu, sunga unina wa kĩShekulu waane wanzagaana ĩne?

⁴⁴ Laaa gua pĩna ululi lwa mĩlamu yaako lũingĩla muakutuĩ aane, ĩkaana kapũũta kuulumbi mundaa yaane.

⁴⁵ Umuliukũ naalusuĩlĩĩle, kunsooko zaasio zikikamĩnkĩĩligua naalĩ umuĩĩlue nũShekulu.”

⁴⁶ uMalia nuũga “uMoo waane ukumukulagiaa ũShekulu,

⁴⁷ nĩnkolo yaane yukumulumbĩĩlagiaa uNzua Mugũni waane;

⁴⁸ kunsooko uulaile uuniinupia wa muasi waakue. Kuitĩ laaa, kwipũna nantende wĩleli tũlũ ukinjĩta muliukũ;

⁴⁹ kunsooko Mukola ngũlũ wantendĩĩle makulu, nĩliina liakue ingĩ lielu.

⁵⁰ Nĩkĩnishungu kiakue kĩkoolĩ wĩleli nawĩleli kuaasio naakumoopokaa.

⁵¹ Waatendile ngũlũ kumukono waakue; waapalansanagiaa ĩanalukeemo mumasĩĩgo ma nkolo zaao;

⁵² waaguusagiaa ĩakulu kwipũna mumatengu maao ma kĩtemi; nuanansula ĩaniino.

⁵³ Naakolue nzala waikyutagiaa namaaza, nĩagolĩ waaleegagiaa mĩkono mĩtilĩ.

⁵⁴ Wamualĩĩlagiaa uĨsilaeli umwĩtumi waakue ĩwijukile kĩnishungu kiakue;

⁵⁵ Kĩna alĩ waaĩĩlĩĩle ĩatata ĩĩtu, uIbũlahimu nuwĩleli waakue sunga ĩkalĩ nakalĩ.”

⁵⁶ uMalia nũkyala nunduyo zĩ mieli ĩtatu; nushooka kumuakue.

kwilelua kwa kĩYohana Mubadĩĩzia. Liĩmbo lishongelio

⁵⁷ iTyũngo lya kĩtũnguĩla uElizabeti pĩna nalĩpika, numulela muana mugoosia

⁵⁸ ĩAnakaa nĩantu aakue pĩna naigyũlia kĩna ũShekulu aluongelĩĩlie kumuakue kĩnishungu kingĩ, naalumba palumuĩ nduyo.

⁵⁹ ulutondo lwa munaana pĩna nalupika, naaza kukumualamia umuana, naasiia kukumutea ĩliina lya kishee, Zakalia.

⁶⁰ uNina nushookeelia nuũga, “Sika iio, ĩpa ikiĩĩtua Yohana.”

⁶¹ Naamuĩĩla, “Mukĩntua kiako kutilĩ nukuĩtaguaa ĩliina liasio.”

⁶² Naamukolia ũshee kunzĩla ya mĩkono muloe wĩitue liina kĩ.

⁶³ Nulompa ulubao, nuandĩka “ĩLiina liakue Yohana Naakulĩlua tũlũ ensi.”

⁶⁴ Ĩkamuĩ umulomo waakue naumũmuuka nululĩmĩ luakue nalutonta nutanbula nukukumukulia uNzua.

⁶⁵ Naingĩĩlua nuooa ĩanakaa aao tũlũ. impola izi zensi naziganulua munsĩĩ tũlũ nya piikonko pya Uyahũdi.

⁶⁶ Tũlũ naalĩ aziingilie naaziĩĩka munkolo zaao naaũga, “uMuana uyu ukitũla wĩmbi. Kuitĩ umukono wa kĩShekulu alĩ wĩpalumuĩ nduyo.”

uNakidagu wakĩ Zakalia

⁶⁷ uZakalia ũshee, nũjulua nuMuau Muelu, nupũnia uunakĩdagu, nuũga,

⁶⁸ “Wakũmazukigue ũShekulu Nzua wa Ĩsilaeli, kuitĩ waaaganile ĩantu akue nukukuakomola.

⁶⁹ wakuĩmĩkĩĩlie ulupembe lwa ugũnua munumba ya kĩDaudi umwĩtumi waakue

⁷⁰ kĩna alutambuĩle kwipũna mualugu ĩĩtu, kumulomo wa anakĩdagu aakue naeelu. Kupuma ĩkalĩ

⁷¹ kugũnue kwipũna mualugu ĩĩtu, numumĩkono yaao naakusuukĩĩlue;

⁷² Koona waakolelue kĩnishungu ĩatata ĩĩtu, nukukijuka ilyago liakue nalielu,

⁷³ uulapi naalumulapĩĩle uIbũlahimu utata wĩĩtu

⁷⁴ Kukukupeela kugũnue kwipũna mumĩkono ya alugu ĩĩtu, kumutumĩle kutilĩ kaooa,

⁷⁵ muweelu numukulukuuluu ntongela yaakue intondo zĩĩtu zensi.

⁷⁶ Nunduue muana, ukiĩĩtua munakĩdagu wa Nwa kukiania, Kuitĩ ukitongela pausiu wa kĩShekulu umuzĩpĩlĩlie injĩla zaakue;

⁷⁷ ualĩngie ĩantu aakue uugũnua kuuleegeligua wa mĩlandu yaao,

⁷⁸ Kunzĩla ya kĩnishungu kĩkulu kya kĩNzua wĩĩtu, umuasio uweelu wa kukiania wakuagaanile ishie

⁷⁹ Kukuamĩlĩkĩla naakikyalaa mukiiti numumulũle wa ukiu, nukwishongia ĩmĩgulu yĩĩtu munzĩla ya matiliga.”

⁸⁰ uMuana nukula, nuongeeleka ingũlũ munkolo; nũ kyala mumbuga sunga palutondo lwa kigyelela kumuakue kũIsilaeli.