Apilipi 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia

¹ Paulo palumuĩ nũTimoteo, ĩtumi a kĩYesu Kilisito, kwamuandĩkĩla inie namwĩeelu mwa kĩKilisito Yesu namuĩlĩ kuPilipi, palumuĩ nĩalĩnguli nĩaalĩĩlia ikyanisa.

² uUkende wĩĩ kumiani nĩmatiliga namapũnile kwa kĩNzua Tata wĩĩtu nukwa kĩShekulu Yesu Kilisito.

Shongelio nuulumbi wa kĩPaulo

³ Namusongelia uNzua waane pensi pĩna numũjukile inie,

⁴ intondo tũlũ muulompi waane nukumulompeela kwilyumbi.

⁵ Namusoongelia kunsooko ya ukamantani waani mumpola na nziiza kwipũna ulutondo lwa muandio sunga nantende yoĩ.

⁶ Nanulusanilie ntuulu, ya kĩna uyo naalĩ wandilie umulĩmo namuuza munsĩ yaani ukakuukondeelia sunga kuLutondo lwa kĩYesu Kilisito.

⁷ Itĩ yoi injĩpĩĩle kukumusĩĩgĩla inie tũlũ; kunsooko inie mukoolĩ munkolo yaane, mwĩakamantani palumuĩ nineene muukende, muutũngua waane, sunga pĩna nukuzikuĩla Mpola na Nziiza nukukuzikamĩnkĩĩlia.

⁸ Kuitĩ uNzua ingĩ mukuĩlĩ waane kĩna numutĩĩtĩĩle inie nsula kĩna ĩnsula nya kĩKilisito Yesu umuene.

Ulompi wa kĩPaulo kuasomi aakue

⁹ uUlompi waane ntuu, uuloogua waani wĩongeele kwitũla wingĩ zigi, muulĩngi nuulekanuli tũlũ;

¹⁰ mugombie namaaza, mutũle nĩnkolo nanzelu, ĩmuagila kaukũmpania kunaĩngĩ sunga kuLutondo lwa kĩKilisito

¹¹ Mũjuligue inkalĩ za kulukuuluu kunzĩla ya kĩYesu Kilisito, kuukulu nulukũmo lwa kiNzua.

Naalĩ ndeetue kwipũna mukĩtũngo kiakue

¹² Ĩpa itĩ anũna aane, numuloe mumane ya kĩna impola tũlũ naalĩ zinjaganile ĩne zaleetilee usapatĩlia wa Mpola na Nziiza.

¹³ Itĩ, yoi, yikualiĩ ntongela ya ĩlaasi iJumba lya kĩtemi nĩantu tũlũ ya kĩna ĩmatendele maane ingĩ kunsooko ya kĩKilisito.

¹⁴ Kangĩ iingĩ pakatĩ ya anũna alĩgagia ukamatĩku mwa kĩShekulu kunsooko ya utũngua waane, sunga ĩkamatĩkĩlie dũũ kwitambula ulukaani lwa kiNzua kutilĩ kaooa.

uPaulo ulumbile ya kĩna uKilisito witanantigua

¹⁵ Ĩĩĩa itanantia impola za kĩKilisito kunsooko ya wĩĩlũ muumankinĩla; ĩĩĩa gua kunkolo nanziiza.

¹⁶ Ĩa itenda itĩ kuuloogua, amanile ya kĩna numuĩĩkue kunu koona nkuĩle iMpola na Nziiza.

¹⁷ ĩAasio naingĩ akumutanantia uKiliisto kuumankinĩla, sika kunkolo nanzelu, naasĩĩgile kwiongeelia injago za utũngua waane.

¹⁸ Yaani gua. Ĩpa kunzĩla zensi, kanga yĩĩ kuunamampĩlu katia kutai-taaii, uKilisito witanantigua; kuluulo numbĩle, kangĩ nikilumba.

Upanga katia ukiu, nayĩmbĩ naiiza

¹⁹ Kuitĩ manile kĩna izi zikipĩluka kwitũla ugũnua waane, kunzĩla ya ulompi waani nukuwaalĩĩlia wa kĩMuau wa kĩYesu Kilisito.

²⁰ Yĩĩ kwilika lya kutũngĩlĩkia nuulaaĩĩli waane ndekikolua kansoni, ĩpa kuukamatĩkũ tũlũ kĩna intondo tũlũ, sunga nunzuauu uKilisito ukikuligua mumuĩlĩ waane, kanga yĩĩ kuumĩ waaane katia kunkia yaane.

²¹ Kuitĩ kumuane ĩne, uumĩ waane ingĩ uKilisito, nukũkia ingĩ nsaĩlo.

²² Ĩpa itĩ kanga yĩĩ kuuumĩ wa mumuĩlĩ kumuane ĩne yukuleetaa nkali za mulĩmo. Iio gua, lwa kusaagula sika nulumanile.

²³ Numutuunue pakatĩ ya nkaani zibĩlĩ. Ntĩĩte nsula ndege muna nsĩĩ nikyale palumuĩ nuKilisito, kuitĩ ingĩ iiza nangũlũ;

²⁴ kuluandĩ luua kukikyala munu mumuĩlĩ ijĩpĩĩle nangũlũ kunsooko yaani.

²⁵ Nineene pĩna ng'ombile izi, manile ya kĩna nĩkakikyala nukwiĩĩma ensi niniinie tũlũ, mukule sunga kwilumba muusuĩĩli;

²⁶ uwĩkũmia waani mwa kĩKilisito Yesu wĩongeele kunsooko yaane, nukunsooko ya ukoolĩ waane palumuĩ niniinie kangĩ.

Usuguli wa kĩgalimanga

²⁷ uLugendo luani lutũle kĩna ijĩpĩĩle iMpola na Nziiza za kĩKilisito, koona malĩĩ ĩnikiiiza kukumuona inie katia kanga nĩĩ nukutilĩ, nĩziigie impola zaani, kĩna muĩmĩkile kuukamũ kunkolo ĩmuĩ, kũshĩĩgo lĩmuĩ ĩmukĩsinka kuusuĩlĩ wa Mpola na Nziiza.

²⁸ Sunga mulekioopooka ĩalugu aani mulukani luensi; kumuao aasio ingĩ kĩlagĩĩlo kualiĩ kya ulimĩĩli waao, ĩpa kumuani ingĩ kĩlagĩĩlo kya ugũnua waani, nduo upũnile kwa kĩNzua.

²⁹ Kuitĩ muapeegue kunsooko ya kĩKilisito, sika kwishuĩĩla mumuakue udũũ, ĩpa nukwiaagigua gaa kunsooko yaakue.

³⁰ Sunga niniinie mukoolĩ nuwĩsinki wau namuoonie kumuane, nukwiigia ya kĩna ĩne kĩlĩ nkoolĩ muumo.