Alumĩ 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uUmuĩ nuKilisito sika ikamantĩĩne nĩmĩlandu

¹ Kuũge mbii gua? Kwikyalene mumulandu koona uukende wĩĩ wingĩ nangũlũ?

² Sika ioo! Ishie naalĩ kuukiĩlĩĩle umulandu kukakikyala mbii muwaasio?

³ Sika mumanilene kĩna ishie tũlũ naalĩ kuabadĩĩzigue mwa kĩKilisito Yesu, kuabadĩĩzigue munkia yaakue.

⁴ Kuitĩ alĩ kuaĩĩkue palumuĩ ninduyo kunzĩla ya ubadĩĩzo munkia yaakue, kĩna itĩ uKilisito alĩ wiiukile kwipũna muakiu kunzĩla ya ukulu wa kĩTata, iio-iioo nindiishie kugendele muupia wa upanga.

⁵ Kuitĩ malĩĩ ĩkwakamantaniligue ninduyo mumpiani ya nkia yaakue, iio-iioo kukikamantaniligua nukumpiani ya wiiuki waakue.

⁶ Kumanile kĩna uuntu wĩĩtu wa kalĩ alĩ ukononteelue mumusalaba palumuĩ ninduyo, koona umuĩlĩ wa mulandu uleegigue, kulekitũla asese a mulandu kangĩ.

⁷ Kuitĩ uzo naalukiile palumuĩ wĩĩ kulĩ numulandu.

⁸ Ĩpa malĩĩ ĩkwakile palumuĩ nuKilisito, kusuĩlĩĩle kĩna kukipangatigua palumuĩ ninduyo.

⁹ Kumanile kĩna uKilisito alĩ mũiukigue kwipũna muakiu; sikukikia kangĩ; uukiu sika ukumudemela nkangĩ.

¹⁰ Kuitĩ kunkia naalukiile; aluukiĩlĩĩle umulandu kamuĩ dũũ; ĩpa muupangati waakue, upangatile mwa kĩNzua.

¹¹ Iio-iioo niniinie mwĩsĩĩgĩle kĩna muakiu kumulandu, ĩpa muapanga kwa kĩNzua mwa kĩYesu Kilisito.

¹² Kuitĩ umulandu ulekitema munsĩ mumiĩlĩ yaani namĩkola ukiu sunga kwigombia inshula zaakue.

¹³ Mulekipũnia ipitũmpĩ pya miĩlĩ yaani kumulandu zĩ mata ma ubĩĩ; ĩpa mwĩpũnie iniinie kwa kĩNzua zĩ naapanga naapũnile muakiu. Sunga ipitũmpĩ pya muĩlĩ mupipũnie kwa kĩNzua zĩ mata ma kulukuuluu.

¹⁴ Kuitĩ umulandu sika ukakumudemela inie, kunsooko sika muĩlĩ nsĩlĩlĩ ya Ulagĩĩlio ĩpa nsĩlĩlĩ ya ukende.

Umania kwipũna mumpiani ya usese

¹⁵ Mbii gua; kutimulene kunsooko sika kuĩlĩ nsĩlĩlĩ ya Ulagĩĩlio ĩpa nsĩlĩlĩ ya ukende. Sika iio!

¹⁶ Sika mumanilene kĩna kumuakue uzo kanga mwĩpũnie uniinie zĩ asese aakue kukumugombia, mwitũla asese aakue namumugombilie, kanga wĩĩ wĩtumi wa mulandu nauleetile ukiu, katia wĩtumi wa ugombia nauleetile ĩkulukuuluu.

¹⁷ Ĩpa uNzua wasongeligue kunsooko inie naalĩ mwĩasese a mulandu alĩ mugoombilie munkolo zaani uumanigua naalĩ muapeegue.

¹⁸ Paasio pĩna alĩ muakomolue kwipũna mumulandu namutũla asese a kululuuluu.

¹⁹ Ntambuĩle kĩuntu kunsooko ya uneketũ waani wa kĩuntu. Kuitĩ kĩna alĩ mupũnilie ipitũmpĩ piani pya muĩlĩ piĩ asese a udobũ, nukuuleki naukĩlĩkĩlĩĩle; iio gua nunzuauu mupũnie ipitũmpi piani pya muĩlĩ piĩ asese a kulukuuluu kuweeligua.

²⁰ Kuitĩ pĩna alĩ muasese a mulandu, alĩ muagila kakulukuuluu.

²¹ Alĩ muligilie nsaĩlo kĩ munkaani zaasio namwikulelua inshoni unzuauu. Kuitĩ ĩmpelo ya nkaani izi ingĩ ukiu.

²² Ĩpaino pĩna mwakomolua kwipũnamumulandu nukwitũla asese a kĩNzua, mutĩĩte nsaĩlo yaani, ingĩ kwieeligua, nĩmpelo yaakue upanga wa kalĩ nakalĩ.

²³ Kuitĩ ĩkĩnamulĩmo kya mulandu ingĩ ukiu; ĩpa uupeegua wa kĩNzua ingĩ upanga wa kalĩ nakalĩ mwa kĩKilisito Yesu Shekulu wĩĩtu.