Alumĩ 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Nkali za usuĩĩli

¹ Iio gua, kunsooko kuaalĩĩligue ĩkulukuuluu kuusuĩĩli, kutĩĩte matiliga kwa kĩNzua kunzĩla ya kĩShekulu wĩĩtu Yesu Kilisito.

² Kwa kĩuyo kuusuĩĩli kwaligilie usũgamĩĩli kuukende uu nakuĩmĩkile munsĩ yaakue, nukwilumba muulaaĩĩli wa ukulu wa kĩNzua.

³ Ĩpa sika iio dũũ, sunga kulumbile numunzago gaa, ĩkumanile kĩna uwaagi ukuleetaa ugigimĩlia,

⁴ nuugigimĩlia ukuleetaa ukamia nkolo, nuukamia nkolo ukuleetaa ulaaĩĩli,

⁵ nuulaaĩĩli ugila kansoni, kunsooko uulogua wa kĩNzua wiitĩĩlue munkolo zĩĩtu kunzĩla ya kĩMuau Muelu naalĩ kuapeegue ishie.

Uloogua wa kĩNzua ugyelĩĩle munkia ya kĩKilisito

⁶ Ishie pĩna alĩ kuagila kangũlũ, ityũngo pĩna nalĩpika, uKilisito nukia kunsooko ya anamĩlandu.

⁷ Kuitĩ ikakũ umuntu kwikia kunsooko ya munakulukuulu, ĩpa ishũũmĩkile umuntu kwigimia wakie kunsooko ya muntu namuuza,

⁸ ĩpa uNzua ulagĩlĩĩle uuloogua waakue umuene kunsĩĩtu pĩna alĩ kĩlĩ kwĩanamĩlandu, uKilisito alukiile kunsooko yĩĩtu.

⁹ Naikulu nangũlũ, pĩna kuaalĩĩligue ĩkulukuuluu kumugali waakue, kukigũnua ninduyo kwipũna muutaki wa kĩNzua.

¹⁰ Kuitĩ malĩĩ pĩna alĩ kwĩalugu, nakukamantanigua kwa kĩNzua kunzĩila ya nkia ya Muana waakue; naikulu nangũlũ pĩna kwakondia kwikamantanigua, kukigũnua kuupanga waakue.

¹¹ Ĩpa sika iio udũũ, sunga kukĩlumbĩĩlia kwa kĩNzua kunzĩla ya kĩShekulu wĩĩtu Yesu Kilisito; kwa kĩuyo alĩ kuanũnkuĩle uukamantanigua wĩĩtu.

Nkia mwa kĩAdamu, uupanga mwa kĩKilisito

¹² Luulo gua, kĩna kunzĩla ya muntu umuĩ umulandu nũingĩla muna unkũmbigyulu, nukunzĩla ya mulandu uuo, nkia; iio gua, nĩnkia nĩapikĩĩla ĩantu tũlũ ensi kunsooko tũlũ ensi atimuĩle.

¹³ uMulandu alaĩ ukoolĩ muna unkũmbigyulu pĩna alĩ kĩlĩ ukutilĩ Ulagĩĩlio.

¹⁴ Ĩpa ĩnkia alĩ ĩtemile kwipũna kwa kĩAdamu sunga kwa kĩMusa, sunga muaasio nasika alĩ atimuĩle kwilika lya utimu wa kĩAdamu, naalĩ mpiani yaakue umuene nũjiliiiza.

¹⁵ Ĩpa uupeegua wa ukende sika wilika nuutimu. Kuitĩ malĩĩ kuutimu wa muntu umuĩ, iingĩ naakia, naikulu nangũlũ uukende wa kĩNzua nuupeegua nawĩĩlĩ muukende wa muntu umuĩ, ũYesu Kilisito, ukĩlĩkĩlĩĩle kuantu iingĩ.

¹⁶ Sunga muna wĩĩlĩ umuntu nuasio numuĩ nutimuĩle, sika iio wĩĩlĩ uupeegua; kunsooko uulamuli nawaazile kunzĩla ya umuĩ nauleeta ulamulua wa kukaasigua; ĩPa uupeegua wa ukende nawaazile kunsooko ya utimu wingĩ ukuleetaa kwialĩĩligua ĩkulukuuluu.

¹⁷ Kuitĩ malĩĩ kuutimu wa muntu umuĩ nkia nĩtema kunzĩla ya unuasio numuĩ, naikulu nangũlũ ĩaasio naaanũnkuĩle iwiingĩ wa ukende nuupeegua wa kulukuuluu, ikitema muupanga kunzĩla ya nuasio numuĩ ũYesu Kilisito.

¹⁸ Iio gua, kĩna yoi uutimu wa umuĩ naukuleetaa ulamulua wa kukaasigua kuantu tũlũ ensi, iio-iioo uutendi wa umuĩ wa kulukuuluu ukuleetaa ualĩĩligua wa kulukuuluu ya upanga kuantu tũlũ ensi.

¹⁹ Kuitĩ kĩna yoi kuuleki wa umuĩ naiingĩ naatũla anamĩlanudu, iio-iioo nukwigomba kumuakue umuĩ, naiingĩ naatũla anakulukuuluu.

²⁰ uUlagĩĩlio alĩ wingĩĩle koona uutimu wĩĩ ukulu nangũlũ; numulandu pĩna naukula, uukende naukula kwikĩlĩkĩĩla.

²¹ Itĩ yoi kĩna umulandu nalĩ utemile muukiu, iio-iioo nuukende uteme kunzĩla ya kulukuuluu kuupanga wa kalĩ nakalĩ kunzĩla ya kĩYesu Kilisito Shekulu wĩĩtu.