Alumĩ 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Usiiti wishookeeligua

¹ Ĩpa gua, uMuyahũdi utĩĩte ukĩlĩkĩĩli kĩ? Nukwiaalamigua nsaĩlo kĩ?

² Ingĩ nsaĩlo nkulu kunzĩla zensi. Tangua apĩĩlue inkaani za kĩNzua.

³ Yaani gua, kanga ityũmpĩ liao ĩsika asuĩlĩĩle. uUsiitishuĩĩla waao ukuleegagiaa uusuĩĩli wa kĩNzua.

⁴ Sika iio! uNzua wĩĩ wa tai numuntu wensi wĩĩ mulongo; kĩna yandĩkue, “Koona upeegue ĩkulukuuluu munkaani zaako, Udule pĩna wilamulua ue.”

⁵ Ĩpa gua, kanga uutimu wĩĩtu ulagĩĩle ĩkulukuuluu ya kĩNzua, kuũge mbii; kĩna uNzua sika munakulukuuluune nuleetile utaki. (Nitambula kĩuntu.)

⁶ Sika iio! Kunsooko paasio, uNzua wishũũma mbii kukuulamula uunkũmbigyulu.

⁷ Ĩpa gua, malĩĩ ĩtai ya kĩNzua Iĩkĩlĩkĩlĩĩle kuukulu waakue kunsooko yaulongo waane, nĩkĩ kĩlĩ nilamulua zĩ munamĩlandu.

⁸ Kunĩkĩ kulekiũga (kĩna kuatũngigue, nĩkĩna naĩngĩ naĩkakilie kwitambula ya kĩna kuũgile), “Kutende namabĩĩ koona maaze namaaza. uUlamulua waao ingĩ wa kulukuuluu.”

Muntu wensi ukutimulaa

⁹ Mbii gua ishie kwĩaazane kwikĩla naĩngĩ? Zũi, sunga kainiino! Kunsooko kwakondilie kukuasokia ĩAyahũdi nĩAgiliki ya kĩna tũlũ ensi ingĩ anamĩlandu,

¹⁰ kĩna yandĩkue, “Kutilĩ umunakulukuuluu sunga kaumuĩ

¹¹ Kutilĩ nulĩngile, Kutilĩ nukumudũũma uNzua.

¹² Tũlũ ensi endile kungĩ. Agila kansaĩlo tũlũ palumuĩ” Kutilĩ nukutendaa naiiza, sunga kaumuĩ.

¹³ “ĩKĩmĩlo kiao ingĩ kĩbĩĩla kualiĩ; kunĩmĩ zaao akupembeelagiaa.” “Usungu wa mũilu munsĩ ya mĩlomo yaao.”

¹⁴ “ĩMĩlomo ijulile ijũmo nuukalĩ.”

¹⁵ “ĩmĩgulu yaao mĩpepeele kwimanka kwiita ĩmĩgali.

¹⁶ Oonooni nuwaagi ukoolĩ munzĩla zaao.

¹⁷ ĩNzĩla ya matiliga sika amĩmanile.”

¹⁸ “Kukumoopoka uNzua yukutilĩ pamiiso maao.”

¹⁹ Kumanile gua, kĩna impola zensi naukutambula uUlagĩĩlio ukutambulaa kuasio naĩĩlĩ nsĩlĩlĩ ya Ulagĩĩlio, koona umulomo wensi umũmigue, uunkũmbigyulu tũlũ wensi ukosigue pa kĩNzua.

²⁰ Kunsooko ĩĩ, ukutilĩ umukola muĩlĩ nukialĩĩligua ĩkulukuuluu ntongela yaakue kuutendi wa Ulagĩĩlio. Kuitĩ kwilĩnga ĩmĩlandu yukuuzaa kunzĩla ya Ulagĩĩlio.

Kulukuuluuu kunzĩla ya usuĩĩli mwa kĩKilisito

²¹ Ĩpaino, ĩkulukuuluu ya kĩNzua ngyeleligue pĩna ukutilĩ nuUlagĩĩlio; nkuĩlue nuUlagĩĩlio nĩAnakĩdagu;

²² ingĩ ĩkulukuuluu ya kĩNzua kunzĩla ya usuĩĩli mwa kĩYesu Kilisito kuaasio tũlũ nasuĩlĩĩle. Kuitĩ ukutilĩ kawĩkĩli;

²³ kunsooko tũlũ ensi atimuĩle nukwikeepeelua nuukulu wa kĩNzua.

²⁴ Naaalĩĩligua ĩkulukuuluu nakanda kuukende waakue kunzĩla ya ukooli nawĩĩlĩ mwa kĩKilisito Yesu.

²⁵ Uyo uNzua numuPũnilie watũle tyengu lipyolia kunzĩla ya usuĩĩli mumugali waakue. Itĩ walagĩĩle ĩkulukuuluu yaakue, kunsooko ya kuĩleka ĩmĩlandu naalĩ ĩtongĩĩle kwitendua muugigimĩlia wakĩnzua.

²⁶ Koona walagĩĩle ĩkulukuuluu yaakue pĩnityũngo ĩlĩ, kĩna muene munakulukuuluu, kangĩ kĩna muene mukola kumualĩĩlia ĩkulukuuluu unuasio nutĩĩte uusuĩĩli mwa kĩYesu.

²⁷ Yĩmpĩĩ gua kukĩkũmazukia. Igyalĩlue kunzi. Kwilyagĩĩlio kĩ; kwilagĩĩlio lya utendine. Zũi, ĩpa kwilagĩĩlio lya usuĩĩli.

²⁸ Luulo gua kwaamba ulu, ya kĩna kuutendi wa ulagĩĩlio.

²⁹ Katia uNzua ingĩ Nzua wa Ayahũdi udũũne, sika Nzua wa ndugu nazĩngĩ gaane. Eeze, ingĩ wa ndugu nazĩngĩ gaa.

³⁰ kunsooko uNzua ingĩumuĩ nukakualĩĩlia ĩkulukuuluu kuusuĩĩli waao ĩaasio naaalamigue; nĩndĩo nasika aalamigue kunzĩla ya usuĩĩli uo-uuoo.

³¹ Ĩpa gua, kwaleegagiaane uUlagĩĩlio kunzĩla ya usuĩĩli. Sika iio! Kuluandĩ luua kwakamĩnkĩĩlia uUlagĩĩlio.