Alumĩ 2 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Sunga nĩAyahũdi gua atimuĩle

¹ Luulo gua, ue nwĩmuntu tũlũ wensi nukulamulaa, umugila kawĩlongo; kuitĩ muzaasio nukumulamulaa nuĩngĩ ukĩlamulaa uue kĩna umutimu, kuitĩ ue nukulamulaa ukutendaa zizo-ziizoo.

² Kumanile gua kĩna uulamuli wa kĩNzua ingĩ wa tai kumuao naakutendaa ĩzaasio.

³ Usĩĩgilene ue nwĩmuntu tũlũ wensi nukulamula ĩaasio naakutendaa ĩzaasio nukwitenda zizo-ziizoo uue mukola, kĩna ukakĩnega nuulamuli wa kĩNzua?

⁴ Katia umelile uugolĩ wa uuza waakue, nuutũngĩli waakue? nuugigimĩliaa waakue; sikumanilene kĩna uuuuza wa kĩNzua ukukulũtaa ue upele?

⁵ Ĩpa kwilika lya ukakũ waako nĩnkolo nangila kaupeli, wĩĩĩkĩĩlie kĩuto kya utaki kulutondo nuukunukulua wa ulamuli wa kulukuuluu ya kĩNzua.

⁶ nukakumushookeelia wensi kwilika lya utendi waakue;

⁷ ĩaasio naakudũũmaa uukulu nikyulio nuusiitioononeka kuugigimĩlia wa kutenda namaaza, ikipeegua upanga wa kalĩ nakalĩ;

⁸ ĩpa ĩaasio ĩaleei nasika agombile ĩtai ĩpa akugombaa uoononeki ikiligia kyũo nuutaki.

⁹ ikitũla nzago nuukoi munkolo ya muntu wensi nukutendaa namabĩĩ, Muyahũdi tangua nuMugiliki gaa,

¹⁰ ĩpa ukulu nikyulio nĩmatiliga kumuntu wensi nukutendaa namaaza, Muyahũdi tangua nuMugiliki gaa;

¹¹ Kunsooko uNzua mugila kauloeelania.

¹² Kuitĩ tũlũ ensi naatimuĩle kĩnzinzi kya Ulagĩĩlio ikilimĩĩla kĩnzinzi kya Ulagĩĩlio, ndĩo naatimuĩle muUlagĩĩlio ikilamulua nuUlagĩĩlio.

¹³ Kuitĩ sika aao naiigilie udũũ uUlagĩĩlio naikitũla anakulukuuluu pa kĩNzua, ĩpa ĩasio naakuukendegeelaa uUlagĩĩlio ikialĩĩligua ĩkulukuuluu.

¹⁴ Kuitĩ indugu nazĩngĩ nangila kaUlagĩĩlio pĩna itenda ĩeene akola nazĩĩlĩ muUlagĩĩlio, aazaa nuulagĩĩlio munkolo zaao ĩeene.

¹⁵ Ĩo akulagĩĩlaa umulĩmo wa Ulagĩĩlio nawandĩkue munkolo zaao, numoo wao gaa ukuĩlĩĩle mumasĩĩgo maao ĩmeene kumeene makĩsokia katia makĩgidĩla,

¹⁶ palutondo luasio uNzua pĩna ukakuulamula uunkũnkũ wa antu kunzĩla ya kĩYesu Kilisito, kwilika lya Mpola na Nziiza nantanantilie.

¹⁷ Laaa ue nukuĩtaguaa Muyahũdi nukwishania uUlagĩĩlio nukukĩkũmazukia mwa kĩnzua,

¹⁸ nukwimana uulooa waakue, nukwigombia namaaza kunsooko umulagĩlue muUlagĩĩlio,

¹⁹ nukwimana kutai kĩna ue umuene umutongeeli wa apokũ, weelu waao naikyalile muwiilu,

²⁰ mulangi wa anaulu, mumania wa aniinoli, nutĩĩte ĩmpiani ya umani nĩ tai muUlagĩĩlio,

²¹ ue gua nukumanagiaa naĩngĩ, sikukĩmanagiaane ĩnkolo yaako? Ue nukutanantagiaa umuntu walekiiia, nwiiiane uue?

²² Ue nukuũgaa umuuntu walekigololia, nũgololiane ue? Ue nusuukĩĩlue ĩanzegamĩla, nũtepane iya munumba za wĩtekelo.

²³ Ue nukĩkũmazukia kunsooko ya Ulagĩĩlio, nukumuleegeliane uNzua ikyulio kunzĩla ya kuutimulĩla uUlagĩĩlio,

²⁴ Kuitĩ kĩna yandĩkue, “ĩLiina lya kĩNzua litukĩlua pakatĩ ya ndugu nazĩngĩ kunsooko yaani uniinie.”

²⁵ Tai kwiaalamigua yukuleeta nsaĩlo kanga wĩĩ mwityapa Ulagĩĩlio, ĩpa kanga wĩĩ mutimuli wa Ulagĩĩlio, kwiaalamigua kumuako ikitũla usiitiaalamigua.

²⁶ Luulo gua, kanga uzo nasika mualamigue ĩwityapile ĩmalagĩĩlio ma Ulagĩĩlio, uusiitiaalamigua waakue sika ikialĩĩliguane zĩ kwiaalamigua.

²⁷ Nindiyo nasika mualamigue kwipũna iyuukĩ, nwityapile uUlagĩĩlio, sikukakukulamulane ue nutĩĩte uwandĩkua nukwialamigua utũle mutimuli wa Ulaagĩĩlio.

²⁸ Kuitĩ uzo sika Muyahĩdi naMuyahũdi wa kunzi udũũ, kangĩ uwaalami wa tai sika wa kunzi numumuĩlĩ udũũ.

²⁹ Uzo ingĩ Muyahũdi wa tai, nwa munsĩ; uwaalami wa tai ingĩ wa moo, wa kĩnkoolo sika wa wandĩkua. uLukũmo luakue sika lupũnile kuantu ĩpa kwa kĩNzua.