Alumĩ 10 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

ĩNzila nampia nya kulukuuluu ingĩ kuantu tũlũ

¹ Anũna aane, numuloe nkankanaa munkolo yaane, kangĩ nukulompaa kwa kĩNzua kunsooko ya Aĩsilaeli, koona agũnue.

² Kuitĩ nukuakuĩla ya kĩna atĩĩte ukamatĩku kwa kĩNzua, ĩpa itĩ sika kunzĩla ya masala.

³ Kuitĩ pĩna sika amanile ĩkulukuuluu ya kĩNzua, naasiia kwikamĩnkĩĩlia ĩkulukuuluu yaao ĩeene, sika naĩĩĩka nsĩlĩlĩ ya kulukuuluu ya kĩNzua.

⁴ Kuitĩ uKilisito alukondelĩĩlie uUlagĩĩlio, kĩna wensi nusuĩlĩĩle waaalĩĩligue ĩkulukuuluu.

⁵ Kuitĩ uMusa wandĩkile mumpola za kulukuuluu nĩpũnile kuUlagĩĩlio, ya kĩna umuntu nukuukendegeelaa uwaasio ukitũla mupanga kuwaasio.

⁶ Ĩpa ĩkulukuuluu nĩpũnile kuusuĩĩli yukutambulaa itĩ, “Ulekiũga munkolo yaako, ‘Waani ukinankĩla kwieenda kwigyulu,’ (wamuleete uKilisito pana pansĩ.)

⁷ Katia, ‘Waani ukitima kwienda kuulungu?’ (wamuleete uKilisito kuna kiania kwipũna muakiu.)”

⁸ Ĩpa ĩũgile mbii? ULukaani lwĩpiipĩ ninduue, mumulomo waako numunkolo yaako, ingĩ ulukaani lwa usuĩĩli nakukulutanantagiaa.

⁹ Kunsooko, kanga umukũmuule ũYesu kumulomo waako ya kĩna ingĩ Shekulu, nukwishuĩĩla munkolo yaako ya kĩna uNzua alumũiukilie kwipũna muakiu, ukigũnĩka.

¹⁰ Kuitĩ umuntu kunkolo ukusuĩĩla waalĩĩligue ĩkulukuuluu, nukumulomo ukukũmuulaa wagũnue.

¹¹ Kuitĩ uwandĩkua uũgile, “Wensi nusuĩlĩĩle mumuakue sikukikolua kansoni.”

¹² Kuitĩ yukutilĩ kawĩkĩli pakatĩ ya Muyahũdi nuMugiliki, kuitĩ uyo muene Shekulu wa tũlũ ensi, mukola ugolĩ kuantu tũlũ naakumuĩtaa.

¹³ “Kuitĩ wensi nukakuliĩta ĩliina lya kĩShekulu ukigũnĩka.”

¹⁴ Iio gua, amuĩte mbii uyo nasika amusuĩlĩĩle. Kangĩ amusuĩĩle mbii uyo nasika amũigilie. Kangĩ amũigie mbii pĩna kutilĩ kamutanantia.

¹⁵ Kangĩ atanantie mbii pĩna sika atumue. Kĩna yandĩkue, “Laaa kĩna yukuloeelagiaa ĩmĩgulu yaao naitanantia impola nanziiza.”

¹⁶ Ĩpa sika tũlũ ensi naalĩ agombilie iMpola na Nziiza, kuitĩ uYesaya waũga, “Shekulu, waani alusuĩlĩĩle impola zĩĩtu.”

¹⁷ Iio gua, usuĩĩli ukupũnaa kuzaasio nazukũigagiguaa; nĩzaasio nazukũigagiguaa zukupũnaa kunzĩla ya lukaani lwa kĩKilisito.

¹⁸ Ĩpa nakolia, ĩo sika naiigiane? Eeze, iigilie; kuitĩ “uLuli luao nalusapatĩla muna nsĩĩ poo, Ninkaani zaao sunga impelo za unkũmbigyulu.”

¹⁹ Kangĩ nakolia, ĩĨsilaeli sika nĩlĩngane? Muandio uMusa nuũga, “Nĩkakumutenda muĩ nuwĩĩlũ kuantu nasika ndugu; Kundugu nangila kaulĩngi nĩkakumutakia inie.”

²⁰ Sunga uYesaya nugimia, nuũga, “Namonua nĩndĩo nasika andũũmile Nanigyelela kumiao nasika amkolelĩĩlie.”

²¹ Ĩpa kũIsilaeli uũgile, “Munsĩ pii nanĩambĩĩlia ĩmĩkono ĩantu naasiitile, ndĩo akakũ.”