Alumĩ 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wilamukia

¹ Paulo nanĩmwĩtumi wa kĩYesu Kilisito, nanumuĩtue ntũle mutumua nukwikamatulua ntanantie impola na nziiza za kĩNzua,

² muzaasio nwapũnilie ilyago ĩkalĩ kunzĩla ya anakĩdagu aakue muwandĩkua naweeelu.

³ Ingĩ mpola za Muana waakue naalĩ mulelue kĩuntu muluuli lwa kĩDaudi,

⁴ nukukigyeleligua kungũlũ kĩna ingĩ muana wa kĩNzua kuwiiuki waakue kwipũna muakiu, kunzĩla ya kĩMuau mukola kuelia muene Yesu Kilisito Shekulu wĩĩtu.

⁵ Numumuakue umuene nakuanũnkula uukende nuutumua, koona kuzimanie indugu tũlũ zensi uugombigua wa usuĩĩli kunsooko ya liina liakue.

⁶ Mumiao niniinie gaa namuĩtua muĩ a kĩYesu Kilisito.

⁷ Namuandĩkĩla inie tũlũ namũkyalille mukaa yaLumĩ, namualĩĩ aloogua akĩNzua, namuĩĩtue mutũle eelu. uUkende wĩi kumiiani nĩmatiliga namapũnile kwa kĩNzua Tata wĩĩtu nukwa kĩShekulu Yesu Kilisito.

Shiio lya kĩPaulo kukuasoolia kuLumĩ

⁸ Tangua namusongelia uNzua waane mwa kĩYesu Kilisito kunsooko yaani tũlũ, kuitĩ uusuĩĩli waani witanantigua muna unkũmbigyulu wensi.

⁹ Kuitĩ uNzua nanukumutumĩlaa kunkolo yaane muMpola na Nziiza za Muana waakue, ingĩ mukuĩli waane kĩna iio nanukumutea inie muulompi waane upiupii, kangĩ sika nukukatalaa,

¹⁰ Nilompa kuuloa wa kĩNzua nsũũmĩkigue kwiiiza kunsiani zozi ntondo.

¹¹ Kuitĩ ntĩĩte nsula dũũ ya kumuona, nsũũme kukumupeela ĩkĩpeegua kya kĩnkoolo, koona mukamĩnkĩĩligue;

¹² itĩ kwĩkamie nkolo ĩne niniinie, wensi kuusũĩĩli wa muua, uwaani nuwaane.

¹³ Ĩpa anũna aane, sika numuloe muulie impola kĩna nkua ningĩ alĩ nukulomaa nĩĩze kunsiani, (koona ndigie inkali nukumuani gaa,) kĩna io nantĩĩte pakatĩ ya ndugu nzia; nangiligua sunga ityũngo lyolĩ.

¹⁴ Ĩne ndĩĩle mpaa kuaGiliki, nĩnasikaAlumi, ndĩĩle mpaa kuanamasala nĩnaagila ĩmasala.

¹⁵ Luulo gua kuluandĩ luane, ĩne nĩzĩpĩlĩĩlie kukuzitanantia iMpola na Nziiza sunga kunsiani namuĩlĩ kuLumĩ.

Muna zĩĩlĩ impola na Nziiza

¹⁶ Kuitĩ ĩne numugila kansoni kuMpola na Nziiza, kunsooko ingĩ ngũlũ za kĩNzua nazukuleetaa uugũnua kuwensi nusuĩlĩle, kuMuyahũdi tangua, nukuMugiliki gaa.

¹⁷ Kuitĩ ĩkulukuuluu ya kĩNzua yukukũnukulaguaa munsĩ yaakue kwipũna uusuĩĩli sunga kuusuĩĩli, kĩna yandĩkue, “uMukola kulukuuluu kunzĩla ya usuĩĩli ukitũla mupanga.”

Utimu wa ndugu nazĩngĩ

¹⁸ Kuitĩ uutaki wa kĩNzua wakũnukuĩlue kwipũna kwigyulu kuuleki wensi nuubĩĩ wa antu naakugilagiaa ĩtai kuubĩĩ waao.

¹⁹ Kunsooko impola za kĩNzua nazimanĩkile zaalĩĩ kualiĩ kumuao, kuiti uNzua alĩ wazigyelĩĩlie kumiao.

²⁰ Kuitĩ impola nasika zigyelĩĩle kwipũna kumĩlĩmo yaakue, ingĩ ingũlũ zaakue za kalĩ nakalĩ nuUnzua waakue, sunga agila kawĩlongo;

²¹ kunsooko pĩna naamumana uNzua, sika naamukulia kĩna muene Nzua, sunga kukumusongelia, ĩpa ĩmasĩĩgo maao maalĩĩ nakanda, nĩmioo yaao nya ulu nilyupigua.

²² Naĩkĩsĩĩgĩla kĩna akola masala naatũla anaulu.

²³ Naaukaĩla uukulu wa kĩNzua namugila kaoononeki kumpiani ikyelu lya muntu namukola oononeki, ninoni, ninimu, nĩnazĩkĩkuesaa.

²⁴ Luulo gua, uNzua nualeka munsula za nkolo zaao autiate uudobũ, sunga naaulia kikyulio mumiĩlĩ yaao eene kueene;

²⁵ Kunsooko alĩ akaĩĩle ĩtai ya kĩNzua niĩ uloongo, naakĩtekela nukukukĩtumĩla nakĩumbue palioma lya kiTyũnda nukukũmazukakiguaa ĩkalĩ nakalĩ! Amini.

²⁶ Kunsooko ĩĩ Nzua nualeka atiate inshula zaao za nsoni, sunga ĩakĩĩma naakaĩla intendo ziyuukĩ zĩĩ ntendo nasika ziyuukĩ.

²⁷ Nĩagoosia iio-iioo naaleka intendo zi yuukĩ kuakĩĩma, naĩaakĩlĩlia inshula agoosia atilĩ, naiitiata utendi wa nsoni, naaligia ĩeene munsĩ yaao ulĩpua nawijĩpĩĩle uulimĩĩli waao.

²⁸ Kangĩ kĩna alĩ asiitile kukumugomba uNzua muulĩngi waao, uNzua nualeka atiate ishala liao nasikigyombigue, atende nasika zijĩpĩĩle.

²⁹ Naijulua nuoonooni tũlũ wensi, nuubĩĩ nĩkĩaya nuukakũ. Naijulua nuwĩĩlũ nuulagi nuuleei nuupembeelia nĩmasĩĩgo namabĩĩ, ateketani,

³⁰ atũngania, asuukĩla Nzua, agaali, akola lukentulo, akola kĩkũmuukia, azĩpia mabĩĩ, agila kikyulio kualeli aao,

³¹ agila kaulĩngi, aleka ukamantani, agila kauloogua, agila kakĩsuuusu.

³² Ndĩo naakulĩngaa uulamuli wa kulukuuluu wa kĩNzua ya kĩnanaakutendaa itĩ ijĩpĩĩle ukiu, akutendaa izi, sunga sika iio udũũ, ĩpa ĩgombilie nĩndĩo naakuzitendaa.