Akolosai 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Inie ishekulu, apeelĩ ĩasese aani naya kulukuuluu nuulĩganĩĩlũ, ĩmumanile ya kĩna inie niniinie mutĩĩte Shekulu kwigyulu.

² Ĩkakĩkiĩ muulompi, ĩmwikyalile nuukenge muwaasio nukwishongelia,

³ ĩmukukulompeela nindiishie, gaa, koona uNzua wakũgyuĩle umulango kuLukaani luakue kwitambula unkũnkũ wa kĩKilisito nanumutũngue kunsooko yaakue,

⁴ koona nuwigyelelie kĩna injĩpĩĩle kwitambula.

⁵ Gendelĩ kumasala ntongela yaao naa kunzi. iNtondo namuapeegue, muzitumĩle iiza.

⁶ iNkaani zaani zitũle nuukende intondo tũlũ, ĩnkolũ umulenge, mumane kĩna yumũjĩpĩĩle kukumushookeelia muntu wensi.

uPaulo akualamukia ĩaakue, kangĩ wimalĩĩlia nkaani

⁷ uTikiko munũna muloogua, mwĩtumi namusuĩĩli, mwĩtumi mĩaane mwa kĩShekulu, ukakumuĩĩla impola zaane tũlũ.

⁸ Uzo nanumutumile kunsiani kunsooko yoĩ-yooĩĩ, koona mumane impola zĩĩtu, kangĩ wamukamĩnkĩĩlie inkolo zaani.

⁹ uOnesimo ukoolĩ nduyo, umunũna namusuĩĩli, muloogua kangĩ muntu wa kunsiani. Aao ĩkakumuĩĩla impola tũlũ za kunu.

¹⁰ uAlisitaliko, namutũngua mĩaane, ukumulamukia, nuMaliko umũpyua wa kĩBalinaba; (mumpola zaakue alĩ muligilie ĩmalagĩĩlio na wapika kunsiani musũgamĩĩliĩ),

¹¹ sunga ũYesu nukuĩtaguaa Yusito ukumulamukia. MuAyahũdi aa dũũ ĩaane mumulĩmo wa utemi wa kĩNzua, ndĩo alĩ pyumbulio kumuane.

¹² uEpafula nwa kunsiani, mwĩtumi wa kĩYesu, ukumulamukia; ukĩkamatĩkagiaa intondo tũlũ kunsooko yaani muulompi waakue, koona muĩmĩke ke, akamĩnkĩĩlũ, mulĩngĩkie uulooa tũlũ wa kĩNzua.

¹³ Kuitĩ namukuĩla ya kĩna utĩĩte wĩkamatĩkia wingĩ kunsooko yaani nukunsooko yaao naĩĩlĩ kuLaodikia nukunsooko yaao naĩĩlĩ kũYelopoli.

¹⁴ uLuka mukilĩki muuloogua, nuDeema akumulamukia.

¹⁵ Alamukiĩ ĩanũna naĩĩlĩ kuLaodikia, sunga nuNimufa nikyanisa nalĩkoolĩ munumba yaakue.

¹⁶ Ĩmbalua ĩĩ pĩna yasomua kunsiani, mumĩkendegeele sunga ĩsomue numũkyanisa lya Alaodikia nĩndĩo nya kuLaodikia ĩsomue niniiie.

¹⁷ Muĩĩlĩ uAlikipo, “Wakendegeelekie uwĩtumi naalumupeegue mwa kĩShekulu, koona uukondeelie.”

¹⁸ Ĩĩ mĩlamu yaane neene Paulo kumukono waane uneene. Mijukĩ ĩmatendele maane. uUkende wĩĩ niniinie.