Akolosai 3 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Nayukuleetaguaa muwiukigua palũmuĩ nuKilisito

¹ Luulo gua, naa mũiukile palumuĩ nuKilisito, zidũũmĩ za kukiania, uKilisito kĩna wĩĩlĩ pamukono wa kĩgoosia nwa kĩNzua wikyalansile.

² Sĩĩgĩ ĩza kukiania, sika naza muna nsĩĩ.

³ Kuitĩ alĩ mukiile, nuupanga waani upisue palumuĩ nuKilisito mwa kĩNzua.

⁴ uKilisito naupanga wĩĩtu, pĩna ukakigyela, paapo niniinie mukakigyela palumuĩ ninduyo muukulu.

⁵ Luulo gua, piulagĩ ipitũmpĩ pya miĩlĩ yaani pya muna nsĩĩ, ugololia, udobũ, nsula nambĩĩ, masĩĩgo namabĩĩ, nukwiawa, uuo ingĩ wĩtekeli wa anzegamĩla.

⁶ Kunsooko ya izo ukuuzaa uutaki wa kĩNzua.

⁷ Pakatĩ ya zaasio inie niniinie alĩ mukugendelaa ĩkalĩ, namwikyala muzaasio.

⁸ Ĩpaino gua, maĩĩkĩ kulĩ aya tũlũ, utaki nuugaali, nuubĩĩ, nuusingĩĩlia nĩmakaani ma ituki mumĩlomo yaani.

⁹ Muleke kĩĩĩla ulongo, kuitĩ mwaujiulile uuntu wa kalĩpalumuĩ nutendi waakue,

¹⁰ namuujala uuntu naupia naukutendaguaa upia muulĩngi kwilika lya mpiani yaakue uuyo naaluumbile.

¹¹ Ĩpaasio ukutilĩ Mugiliki katia Muyahũdi, katia namualamigue katia nasika mualamigue, sunga mugenda katia munakĩlungu, musese katia mukolelua; ĩpa uKilisito ingĩ muene yensi, numũyensi.

¹² Luulo gua, inie asaagulua a kĩNzua, eelu nĩaloogua, jialĩ ĩnkolo ya kĩsuusu, untu nauuza, wĩniinupia, upolo ugigimĩlia.

¹³ Ĩmukĩgigimĩlia nukukĩlekela kanga ĩutĩĩte ulukaani lwa kumukosia umuua; kĩna ũShekulu alumulekĩĩle inie, niniinie mutende iio.

¹⁴ Naikulu nangũlũ jialĩ uuloogua, uuo kĩtũngo kya ukamĩnkĩĩlũ.

¹⁵ Nĩmatiliga ma kĩKilisito mateme munkolo zaani, iio kĩna alĩ muĩĩtĩlue mumuĩlĩ umuĩ. Kangĩ muĩ nĩmasongelio.

¹⁶ uLukaani lwa kĩKilisito lwikyale kuwingĩ mumiani mumasala tũlũ ĩmukĩmania nukukĩsugula kumalumbĩĩlio nĩmĩmbo nuwĩlumbĩĩlio wa kĩnkoolo, ĩmukumuĩmbĩla uNzua kuukende munkolo zaani.

¹⁷ Luensi namukulutenda kulukaani katia kuutendi, tendĩ tũlũ muliina lya kĩShekulu Yesu, ĩmukumusongelia uNzua Tata kwa kĩuyo.

Wĩkyalĩ wa kĩnũna kwa kĩKilisito

¹⁸ Inie asungu, mwĩniinupie paagoosia aani, kĩna ijĩpĩĩle mwa kĩShekulu.

¹⁹ Inie agoosia, alooguĩ ĩasungu aani, mulekitũla nuugaali kumiao.

²⁰ Inie aana, akuliĩ ĩaleli aani mumpola zensi, kuitĩ ulukaani ulu luloelĩĩlie kwa kĩShekulu.

²¹ Inie atata, muleke kualeea ĩaana ani, koona alekishuukua.

²² Inie asese, akuliĩ mumpola tũlũ ĩaasio naĩĩlĩ zĩ ishekulu aani kukĩmuĩlĩ, sika kuusese wa miiso zĩ naakuloeelagiaa paantu, ĩpa kuugolokũ wa nkolo, ĩmumoopokile ũShekulu.

²³ Luensi namwitenda, tendĩ kumoo zĩ kwa kĩShekulu, Ĩpa sika kuantu,

²⁴ ĩmunanile ya kĩna mukiaanũnkula kwa kĩShekulu uupeegua wa usaali; kuitĩ mukumutumĩla ũShekulu Kilisito.

²⁵ Nukoononeelagiaa gua, ukiligia uligia wa oononeelia waakue, kutilĩ kauloeelia.