Akolosai 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia

¹ Paulo, mutumua wa kĩYesu Kilisito kulooa wa ki Nzua, nũTimoteo munũna wĩĩtu,

² kwamuandĩkĩla inie anũna naeelu nĩasuĩĩli naĩĩlĩ kuKolosai. uUkende wĩĩ kumiani nĩmatiliga namapũnile kwa kĩNzua Tata wĩĩtu.

Usongelia nuulompi

³ Kukumusongelagiaa intondo tũlũ uNzua Tata wa kĩShekulu wĩĩtu Yesu Kilisito pĩna kukumuloompeela inie,

⁴ pĩna nakũigia impola za usuĩĩli waani mwa kĩKilisito Yesu nuuloogua namutĩĩte kueelu tũlũ.

⁵ Kunsooko ya ulaaĩĩli namuaĩĩkĩligue ĩkĩuto kwigyulu. iMpola zaakue alĩ muziigilie ĩkalĩ kulukaani lwa tai lwa Mpola na Nziiza

⁶ naalĩ zipikile kunsiani, kĩna muna unkũmbigyulu poo nazipĩa inkali nukwikula, kĩna iio nukunsiani, kwipũna ulutondo pĩna alĩ mũigilie namulĩngĩkia uukende wa kĩNzua mutai.

⁷ Kĩna iio alĩ muamanigue nuEpafula mwĩtumi muloogua palumuĩ nindiishie. ĩngĩ mwĩtumĩkĩli musuĩĩli wa kĩKilisito kunsooko yaani;

⁸ nduyo alukulondoosilie uuloogua waani mwa kĩMuau.

⁹ Kunsooko ĩĩo nindiishie kwipũna ulutondo pĩna nakuziigia, sika kulekile kukumulompeela inie nikwilompa muligie uulĩngi wa ulooa waakue mumasala tũlũ nuulĩngi wa kĩnkoolo;

¹⁰ mugendele kĩna ĩmũjĩpĩĩle inie mwa kĩShekulu, ĩmukumuloeelia nangũlũ, mumulĩmo wensi namuuza ĩmwĩpĩa inkali, ĩmukĩongeela muulĩngi wa kĩNzua.

¹¹ Kangĩ musũũmigue kungũlũ, kwilika lya usũũmi wa ukulu waakue, kuukamatĩkũ tũlũ nuugigimĩlia palumuĩ nilyumbi.

¹² Sunga ĩmukumusongelia uTata, naalukũjĩpĩĩlie kwikamantana muusaali wa eelu muweelu.

¹³ Uyu alukugũnile kwipũna muusũũmi wa kiiti, nukukukusaamia kuutemi wa Muana wa uloogua waakue.

¹⁴ Mumuakue kutĩĩte ukomolua kunzĩla ya mugali waakue uleegeligua wa mĩlandu.

uKilisito numulĩmo waakue

¹⁵ Nduyo ingĩ mpiani ya kĩNzua nasika ikigyelaa, mulelua wa muandio wa iumbe tũlũ.

¹⁶ Kunsooko mumuakue intu tũlũ alĩ iumbue, naya mwigyulu niya muna nsĩĩ, naigyĩĩle nĩnasika igyĩĩle, kanga yĩĩ matengu ma ukulu katia utemi, katia akulu a kĩtemi, katia akola usũũmi; intu tũlũ alĩ iumbue kunzĩla yaakue nukunsooko yaakue.

¹⁷ Nduyo alukoolĩ pĩna alĩ ikaalĩ iintu tũlũ, niintu tũlũ yukukamantanĩlaa mumuakue.

¹⁸ Nduyo ingĩ tyũe lya muĩlĩ waakue, ikyanisa liakue, Nduyo ingĩ muandio, ingĩ mulelua wa muandio kwipũna muakiu, koona watũle mutongeeli muintu tũlũ.

¹⁹ Kunsooko mwa kĩuyo alĩ iloeelĩĩlie uwijuli tũlũ wakĩNzua wikyale,

²⁰ nukunzĩla yaakue kukuikamantania intu tũlũ mumuakue kanga yĩĩ intu naikoolĩ muna nsĩĩ katia naikoolĩ mwigyulu; pĩna aluleetile ĩmatiliga kunzĩla ya mugali wa musalaba waakue.

²¹ Niniinie, ĩmuandio naalĩ muakamatulue, kangĩ alĩ mualugu mumasĩĩgo maani kuutendi waani na ubĩĩ, ĩpaino wamukamantanagiaa,

²² mumuĩlĩ wa kĩuntu kiakue, kunzĩla ya nkia yaakue, koona wamuleete inie ntongela yaakue mwĩeelu, muagila kakĩlema sunga kimyelo,

²³ Kanga mwikyale muusuĩlĩ, muzengue mumukũlĩla wa ngũlũ mulekileegeligua paulaaĩĩli wa Mpola na Nziiza naalĩ mũigilie, naalĩ ntanantigue kuiumbe tũlũ nayĩĩlĩ nsĩlĩlĩ igyulu Nineene Paulo nantũla mwĩtumi waakue.

Tyũmpĩ lya kĩPaulo mumulĩmo wa kĩKilisito

²⁴ Ĩpaino nilumbĩĩlia uwaagi nanuutĩĩte kunsooko yaani, kangĩ nikijulĩĩlia waasio naukeepukile muwaagi wa kĩKilisito mumuĩlĩ waane, kunsooko ya muĩlĩ waakue nduo ikyanisa liakue.

²⁵ Iio nantũla mwĩtumi waakue kwilika lya ukendegeeli wa kĩNzua naalĩ numupeegue kunsooko yaani, nulutimĩĩlie ulukani lwa kĩNzua.

²⁶ ĩngĩ unkũnkũ waasio naalĩ upisue kwipũna ĩkalĩ nukwipũna uwĩleli tũlũ, ĩpa yakũnukulaguaa kueelu aakue.

²⁷ uWaasio uNzua naalusiile kukuũgyelelia kĩna wĩĩlĩ ugolĩ wa ukulu wa unkũnkũ uu pakatĩ ya ndugu nazĩngĩ; nduyo ingĩ uKilisito munsĩ yaani, ulaaĩĩli wa ukulu.

²⁸ Wayuuyu kukumutanantia impola zaakue, nakukumusugula muntu wensi, nukukumumania muntu wensi mumasala tũlũ, koona kumuleete muntu wensi mukamĩnkĩĩlũ mwa kĩKilisito.

²⁹ Nineene nĩkĩtumĩkia umulĩmo uu kwilika lya ngũlũ zaakue nukĩtuma umulĩmo munsĩ yaane kungũlũ.