Aepeso 6 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Inie aana mũigie ĩaleli aani mwa kĩShekulu, kuitĩ ĩĩ yoĩ kulukuuluu.

² “Mukulie utata waako numaau waako,” (lyolĩ lyagĩĩlio lya muandio nalĩtĩĩte ilyago).

³ “Uligie uliukũ intondo zaako zĩĩ ningĩ muna nsĩĩ.”

⁴ Nininie namuatata, muleke kuagaalĩla ĩaana aani, ĩpa akendegeelĩ muumania numuusugulua wa kĩShekulu.

⁵ Inie asese, mũigie ishekulu aani a muĩlĩ, kĩna zĩ pa kĩKilisito kuooa nukwikĩkĩma, kuweelu wa nkolo,

⁶ sika kuusese wa miiso zĩ kukualoeelia ĩantu, ĩpa zĩ asese a kĩKilisito ĩmwitenda uulooa wa kiNzua kumoo;

⁷ kuuloa nauuza ĩmukumutumĩla ũShekulu sika antu;

⁸ ĩmumanile ya kĩna lukaani luensi naluuza nukulutenda, wensi ukiaanũnkula lulo-luulo kwa kĩShekulu, kanga wĩĩ musese katia wĩĩ mukolelua.

⁹ Niniinie namũishekulu, atendelĩ iio-iioo, muleke kuoopokia, ĩmumanile ya kĩna uzo na Shekulu waao kangĩ waani, ukoolĩ kwigyulu, nukumuakue kutilĩ kauloeelia.

mata Ma MuKilisito

¹⁰ Kumpelo, muĩ akamũ mwa kĩShekulu numuusũũmi wa ngũlũ zaakue.

¹¹ Jialĩ ĩmata tũlũ ma kĩNzua musũũme kukuĩgilia ĩmiena ya mupembeelia.

¹² Kunsooko umusiko wĩĩtu sika wa kĩkua nĩakola mugali nĩnama, ĩpa wa kĩkua nĩmatemi nĩanausũũmi, nĩanautemi a unkũmbigyulu wa ĩpaino wa kiiti, nĩmaũmbĩ ma kĩnkoolo namabĩĩ pakiania.

¹³ Kunsooko ĩĩ gua, kenkĩ ĩmata tũlũ ma kĩNzua musũũme kukĩsinka palutondo nalubĩĩ; nĩpĩna mwakondia tũlũ, kwiĩĩmĩka kee.

¹⁴ Luulo gua, ĩĩmĩkĩ, ĩmwĩtũngile ĩtai mũyĩĩno yaani nukwijiala ĩkulukuuluu mũikũa zĩ majialo ma yuuma.

¹⁵ Mumĩgulu mujiale uwĩzĩpĩĩlia wa mpola na nziiza za matiliga.

¹⁶ Palumuĩ niizi tũlũ, mumĩkenke ĩngula ya usuĩlĩĩ, kuniasio mukishũũma kwidibia inshonga tũlũ za mooto iza Mubĩĩ.

¹⁷ Kũtyũe jialĩ gyĩgu lya kyuma lya ugũnũa, muambe iyũmba lya kĩMuau, ndĩlo ingĩ uLukaani lwa kĩNzua.

¹⁸ Lompĩ matũngo mensi mwa kĩMuau, ĩmwinena nukwipeepia. Kangĩ kunsooko ya nkaani izi, mũkyale nuukenge ĩmwĩkamatĩkilie dũũ nukukualompela ĩeelu ensi.

¹⁹ Nompeelĩ nineene gaa, mpeegue uutambuli kukuumũmuula umulomo waane kuukamatĩkũ, nuutanantie unkũnkũ wa Mpola na Nziiza.

²⁰ Kunsooko ya waasio ĩne nanumutumua muna kĩtũngo; ndigie uukamatĩkũ mumpola izi kwitambula kĩna injĩpĩĩle.

Mumalĩĩlio

²¹ Ĩpaino, inie niniinie mumane impola zaane nuutendi waane kĩna zĩmbii, uTikiko umunũna muloogua, mwĩtumi namusuĩlĩ mwa kĩShekulu, ukakumuganuĩla impola tũlũ.

²² Uyo naalĩ numutumile kumiani kunsooko yoĩ-yooii, koona mumane impola zĩĩtu, ninduyo wamukamie inkolo zaani.

²³ Matiliga mĩĩ, kuanũna, nuuloogua palumuĩ nuusuĩĩli naupũnile kwa kĩNzua Tata, nukwa kĩShekulu Yesu Kilisito.

²⁴ uUkende wĩĩ palumuĩ nĩensi naamuloogilue ũShekulu wĩĩtu, Yesu Kilisito kuuloogua naugila kampelo.