Aepeso 5 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

uWikyaalĩ wa kĩnũna kya Kilisito

¹ Luulo gua, muĩ atiati a kĩNzua zĩ aana naaloogua.

² Mugendele muuloogua kĩna uKilisito naalumuloogilue inie, nwĩsuula kunsooko yĩĩtu, wĩĩ pyũnio nipyolia kwa kĩNzua, kwitũla munũnku namuuza.

³ Ĩpa itĩ ugololia nuudobũ wensi katia kwiawa, ilekitambulua kumiani kainiino, kĩna yĩijĩpĩĩle ĩeelu,

⁴ sunga inkaani za udobũ nĩza ulu nĩza nsoni; izi sika zijĩpĩĩle, ĩpa taazu kwishoongelia.

⁵ Kuitĩ ulukaani luasio mulumanile tai, ya kĩna ukutilĩ umugololia sunga umudobũ sunga nwansula mbĩĩ, (muene nukuatekelaa ĩanzegamĩla,) nutĩĩte uusaali muutemi wa kĩKilisito nuwa kĩNzua.

⁶ uMuntu waleke kumupembeelia kumakaani namagila kandogolelio; kunsooko ya aya uutaki wa kĩNzua ukuaagaanaa ĩaana a uleki.

⁷ Luulo gua, mulekikamantana ndĩo.

⁸ Kuitĩ ĩkalĩ alĩ mwĩkiiti, ĩpaino mwatũlaa weelu mwa kĩShekulu; gendelĩ zĩ aana a weelu. (

⁹ Kuitĩ ĩnkali ya weelu ĩkoolĩ muuuza tũlũ nĩkulukuuluu nĩtai),

¹⁰ Muzilekanule nazumuloelĩĩlie ũShekulu,

¹¹ kangĩ mulekikamantana muutendi wa kiiti nasika ukupĩaa inkali, ĩpa taazu muutakĩle.

¹² Kuitĩ namitendeka kumiao kukĩmpisĩ-mpisĩ ingĩ nsoni sunga kukumatambula.

¹³ Kuitĩ tũlũ pĩna matakĩlua naweelu, makigyelelagiguaa; kuitĩ kiensi nakikigyelelagiguaa ingĩ kya weelu.

¹⁴ Iio gua uũgile, “Laĩla ue nugonile indoolo, Iiuka kwipũna muakiu, NuKilisito ukakukumĩlĩkĩla.”

¹⁵ Laaĩ kĩĩsa kĩna mwigenda, sika kĩna antu naagila kamasala, ĩpa kĩna naatĩĩte ĩmasala;

¹⁶ ĩmwitumila kĩĩsa ĩmatũngo, kunsooko intondo izi ingĩ mbĩĩ.

¹⁷ Kunsooko ĩĩ mulekitũla anaulu, ĩpa muĩ antu naalĩngile kĩna uulooa wa kĩShekulu wĩĩlĩ.

¹⁸ Kangĩ mulekigaala umubinio, kuitĩ muasio ukoolĩ usambo, ĩpa mũjulue nuMuau;

¹⁹ ĩmukĩtambuĩla kumalumbĩĩlio nukumĩmbo nukuulumbi wa kĩnkoolo ĩmukumuĩmbĩla ũShekulu nukukumulumbĩĩlia kunkolo, zaani.

²⁰ ĩmukumusongelia uNzua Tata upiupii nukunsooko ya intu tũlũ, muliina lya kĩShekulu wĩĩtu Yesu Kilisito.

²¹ Mwĩniinupie muntu wensi numuua, muooa mwa kĩKilisito

²² inie asungu mwĩniinupie paagoosia aani kĩna zĩ kwa kĩShekulu.

²³ Kunsooko umugoosia ingĩ tyũe lya musungu, kĩna iio uKilisito ingĩ ityũe likyanisa, umuĩlĩ waakue, ninduyo muene Mugũni wa muĩlĩ.

²⁴ Kĩina iio ikyanisa lĩkĩniinupagiaa pa kĩKilisito, iio-iioo nĩasungu ĩniinupie paagoosia aao mulukaani luensi.

²⁵ Inie agooia, alooguĩ asungu aani kĩna iio uKilisito naalulĩloogilue ikyanisa, nwĩpũnia kunsooko yaakue,

²⁶ koona walielie pĩna alulĩogilie kumaazĩ nukuLukaani.

²⁷ Iio wileetelie ikyanisa lya ukulu, nigila kaudobũ katia uniolũ katia liensi nalĩkĩna aya, ĩpa lĩtule lielu nigila kibyado.

²⁸ Iio-iioo ijĩpĩĩle ĩagoosia kukualoogua ĩasungu aao kĩna ĩmiĩlĩ yaao ĩeene. Numuloilue umusungu waakue wĩloilue umuene.

²⁹ Kuitĩ kutilĩ nuusuukĩĩlue umuĩlĩ waakue tyũngo liensi, ĩpa ukuulĩĩsagiaa nukukuukendegeela kĩna iio uKilisito nukulĩtendelaa ikyanisa;

³⁰ kunsooko kwĩpitũmpĩ pya muĩlĩ waakue.

³¹ “Kunsooko ĩĩ umuntu ukakumuleka ũshee nunina, ukikamantana numusungu waakue; ndĩo naabĩlĩ ikitũla muĩlĩ umuĩ.”

³² Uu wau unkũnkũ naukulu; ĩpa itĩ nitambula impola za kĩKilisito nikyanisa.

³³ Ĩpa itĩ niniinie, mugoasia wensi wamuloogue umusungu wamukulie, nusungu wamukulilie umugoosia waakue.