Aepeso 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Uwĩĩti wa kĩNzua wĩĩlĩ muumuĩ

¹ Luulo gua numupeepilie inie, ĩne nanumutũngua mwa kĩShekulu, mugendele kĩna ijĩpĩĩle uwĩĩtua waani naalĩ muĩĩtĩlue.

² Kuwĩniinupia tũlũ nuupolo, kuugigimĩlia, mwĩgigimĩlie muwĩloogua;

³ ĩmwĩkamatĩkilie kukuukendegeela uumuĩ wa kĩMuau mukĩtũngo kya matiliga.

⁴ Ukoolĩ umuĩlĩ nuMuau umuĩ, kĩna iio alĩ muĩĩtue kuulaaĩĩli umuĩ wa wĩĩtua waani;

⁵ ũShekulu umuĩ, uusuĩĩli umuĩ, ubadĩĩzo umuĩ,

⁶ uNzua umuĩ, nduyo Tata wa tũlũ, ninduyo nuĩlĩ kukiania ya yensi, numutũlũ yensi, numunsĩ ya tũlũ yensi.

⁷ ĩpa itĩ wensi kumiĩtu alĩ mupeegue uukende kwilika lya ngele ya kĩpeegue kya kĩKilisito.

⁸ Luulo itambulue, “Pĩna nunankĩla kukiania nutepa utepua, Nuapeela ĩantu ipeegua.” (

⁹ uLukaani luasio, “Nunankĩla,” ĩndogolelio yaakue yaani isiititũla alutimile tangua sunga kunandĩ za munsĩ ya nsĩĩ.

¹⁰ Uyo naalutimile, uuyo naalunankĩĩle ga kukiania kwikĩla igyulu liensi; intu tũlũ ijuligue ninduyo.)

¹¹ Ninduyo aluaĩĩkile ĩĩĩa atũle atumua, ĩĩĩa atũle anakĩdagu, ĩĩĩa atũle atanantia a mpola na nziiza, ĩĩĩa atũle adĩĩmi nĩamania;

¹² koona ĩeelu akamĩnkĩĩligue, umulĩmo wa kĩtuma utendeke, umuĩlĩ wa kĩKilisito uzengue,

¹³ sunga nindiishie tũlũ pĩna kukakuupikĩĩla uumuĩ wa usuĩĩli nukukumulĩngĩkia uMwana wa kĩNzua, kwitũla muntu wa kapanga, sunga ilika lya ukulu wa ugelo wa ũjuli wa kĩKilisito.

¹⁴ koona kulekitũla aana atakata, kangĩ ĩkwigumua kunu nukunu nukwikenkua kunzega zensi za mamania kuupembeelia wa antu, kuwĩsukukia naubĩĩ, ĩkwitiata ĩmiena ya ulimĩĩli.

¹⁵ Taazu kumĩambe ĩtai muuloogua, kukule mumuakue kunzĩla zensi, uyo muene tyũe, uKilisito.

¹⁶ Kwipũna mumuakue umuĩlĩ wensi ĩũkinĩnkanigua nukwikamantanigua kuwaalĩĩlia wa katũmpĩ kensi kwilika lya mulĩmo wa katũmpĩ kensi kamuĩ kamuĩ, iio umuĩlĩ ukukulaa nukukĩzenga muuloogua.

uUmĩ nawakĩlile nĩnaupia

¹⁷ natambula izi gua nukukuzikuĩla mwa kiShekkulu kwipũna nantende mulekigenda zĩ ĩa ndugu nazĩngĩ naakugendaa, mu naulu wishala liao;

¹⁸ ĩmasĩĩgo maao milyupiligue nĩkiiti, naakamatulua nuupanga wa kĩNzua kunsooko ya usiitimana naukoolĩ mumiao, naupũnile muukakũ wa nkolo zaao.

¹⁹ ĩAasio naakiile igyandi munkolo zaao, naĩgumĩla muusambo, naiawa kwitenda ubĩĩ wensi.

²⁰ Inie gua, sika iio alĩ mwĩmanilie uKilisito,

²¹ kanga alĩĩ mũigilie impola zaakue nukwimanigua mumuakue, kĩna ĩtai yĩĩlĩ mwa kĩYesu.

²² Muujiule uuntu wa kalĩ naukugendaa kwitiata intendo za muandio, naukoononekaa kukuzitiata inshula za upembelia;

²³ mutendue apia munkolo ishala liani;

²⁴ muujiale uuntu naupia naalĩ uumbue kumpiani ya kĩNzua, mukulukuuluu nuweelu wa tai.

Malagĩĩlio mumpola za wikyaalĩ wa lutondo luensi

²⁵ Luulo gua, ujiulĩ ulongo, mutambule ĩtai, wensi numunakaa waakue, kunsooko kupitũmpi, wensi katũmpĩ ka muua.

²⁶ Namwa nuutaki mulekitimula; ĩmpasu ĩlekishaalĩĩla pĩna uutaki waani wikĩĩlĩ kalamulegela,

²⁷ Kangĩ muleke kumupeela ũShetani ĩlioma.

²⁸ Nukũiaa walekiia kangĩ; taazu iiza wĩkakie kukĩtuma umulĩmo namuuza kumĩkono yaakue umuene, koona wĩĩ nĩkĩntu kya kumoomoelu umusilĩlua.

²⁹ Lukaani luensi nalubĩĩ lulekipũna mumĩlomo yaani, ĩpa naluuza lwa kuzĩpia pĩna ishiiiue, luapeele ukende ĩaasio naakulũigia.

³⁰ Kangĩ muleke kumupeela usungu uMuau Muelu wa kĩNzua, nakumuakue alĩ muaĩĩkĩlue umuhũli sunga kulutondo lwa ukomolua.

³¹ Ugaali tũlũ nĩmagũndo nuutaki nĩkĩlanga niituki malege kumiani, palumuĩ nuubĩĩ wensi.

³² Kangĩ muĩ nuupolo niinie kuniinie, akola kĩsususu, ĩmukĩlekela kĩna uNzua mwa kĩKilisito naalumulekĩĩle inie.