Aepeso 1 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

Wĩlamukia

¹ Paulo, mutumua wa kĩKilisio Yesu kuulooa wa kĩNzua, namuandĩkĩla inie eelu namukoolĩ kuEpeso, namuasuĩĩli mwa kĩKilisito Yesu.

² uUkende wĩĩ kumiani nĩmatiliga namapũnile kwa kĩNzua Tata wĩĩtu nukwa kĩShekulu Yesu Kilisito.

Kyulio kwa kĩNzua

³ Wakũmazukigue uNzua, Tata wa kĩShekulu wĩĩtu Yesu Kilisito, naalukukembetile mwa kĩKilisito kuukembetua tũlũ wa kĩnkolo naupũnile kwigyũlu;

⁴ kĩna iio naalukusaguĩle mumuakue pĩna ĩmĩkũlĩla ya unkũmbigyulu alĩ ikĩĩlĩ kalaĩĩkua, kutũle eelu, nagila kishokio ntongela yakue muulogua.

⁵ Kuitĩ wakusaaguĩle kwipũna iyuukĩ, koona kutendue aana aakue kunzĩla ya kĩYesu Kilisito, kwilika lya ugombigua wa ulooa waakue.

⁶ Ukũmigue uukulu wa ukende waakue naalukukembetile mumuloogua waakue.

⁷ Mumuakue kutĩĩte ukomolua munzĩla ya mugali waakue, ulegeligua wa mĩlandu, kwilika lya ugolĩ wa ukende waakue,

⁸ naalukongelĩĩlie kunsĩĩtu mumasala tũlũ nuumani.

⁹ Ukumanĩkilie ishie uunkũnkũ wa ulooa waakue, kwilika lya usiio waakue naalĩ wigyelĩĩle mwa kĩKilisito,

¹⁰ wĩĩ ulĩganĩĩlũ wa ukamĩnkĩĩlũ wa matũngo, uKilisito watũle tyũe lya tũlũ-tũũlũũ, intu naikoolĩ kwigyulu, niintu naikoolĩ muna nsĩĩ gaa.

¹¹ Numunsĩ yaakue alĩ kuatendue usaali kwilika lya usiio wa kĩuyo nukutendaa inkaani tũlũ kwilika lishĩĩgo lya ulooa waakue;

¹² ishie naalĩ kumulaaĩlĩĩle uKilisito ĩmuandio, alĩ kuasaagulue kwikyale kuukũmazukia wa ukulu waakue.

¹³ Mumuakue niniinie ga, naalĩ mũigilie ulukaani lwa tai, impola na nziiza za ugũnua waani, nukwishuĩĩla mumuakue alĩ muaĩĩkĩluue umuhũli nuMuau Muelu wilyago,

¹⁴ muene ingĩ uĩĩkĩĩli wa usaali wĩĩtu sunga kupeegue uukomolua wensi, kuukũmazukia wa ukulu waakue.

Ulompi wa kumumana uNzua

¹⁵ Kunsooko ĩo gua, nineene kwipũna pĩna alĩ niigilie impola za usuĩĩli waani mwa kĩShekulu Yesu, sunga uuloogua waani kueelu tũlũ,

¹⁶ sika nileka kwishoongelia kunsooko yaani nukukumũjuka inie muulompi waane.

¹⁷ Koona uNzua wa kĩShekulu wĩĩtu Yesu Kilisisto, Tata wa ukulu, wamupeele ĩnkolo ya masala nĩnya ukũnukulua, mumulĩnge uyo kĩna wĩĩlĩ.

¹⁸ Ĩmiiso maani ma nkolo meeligue, koona mumane kĩna wĩĩlĩ uulaaĩĩli wa wĩĩto waakue, sunga mumane kĩna wĩĩlĩ uugolĩ wa usaali waakue naukulu mueelu.

¹⁹ Nukwimana kĩna wĩĩlĩ uukulu naukĩlĩkĩlĩĩle wa ngũlũ zaakue munsĩ yĩĩtu nakusuĩlĩĩle; kwilika lya mulĩmo wa ngũlũ za usũũmi waakue.

²⁰ Naali wĩtumĩĩle mwa kĩKilisito, pĩna alukumũiukia kwipũna muakiu, numuĩĩka pamukono waakue wa kĩgoosia kwigyulu,

²¹ Kukiania zigi kwikĩla uutemi wensi nuusũũmi ningũlũ nĩkĩtemi, nĩliina liensi nalukuteaguaa, sika muna unkũmbigyulu wau udũũ, ĩpa sunga muwaasio gaa naũjile.

²² Nuĩĩka iintu tũlũ nsĩlĩlĩ ya mĩgulu yaakue, numuĩĩka watũle tyũe mũintu tũlũ yensi kunsooko ikyanisa,

²³ numuĩlĩ waakue; uwijuli waakue nukuijulagiaa intu yensi tũlũ pensi.