2 Timoteo 4 - LYAGO NIPIA MPOLA NANZIIZA KU ANTU TŨLŨ Kuntambo ya Kĩnilyamba 2009

¹ Nukulagĩlĩĩlie ntongela ya kĩNzua nũShekulu Kilisito Yesu nukilamula naapanga nĩnaakiu, sunga kuwigyeleli waakue nuutemi waakue.

² Lutanantie uLukaani, ĩkamatĩkie matũngo namijĩpĩĩle nĩmatũngo nasika mijĩpĩĩle, uasokie ubĩĩ waao, uasugule, uakamie nkolo muugigimĩlia tũlũ numuumanigua.

³ Kuitĩ ityũngo likiiza pĩna ikishiita uumanigua wa kapanga, ĩpa kunzĩla ya kutiata inshula zaao ĩeene ĩkakĩligĩlia amania iingĩ, kuitĩ atĩĩte akutuĩ naakĩdũũmĩlia nazĩaloelĩĩlie.

⁴ Nĩndĩo ĩkakĩnega alekiiigia naza tai, ikigomokeela inshimu za ulongo udũũ.

⁵ Ue gua, sukuka munkaani zensi, gigimĩlia injago, ĩtume mulĩmo wa mutamantia, kondeelia uwĩtumi waako.

⁶ Kuitĩ ĩne naaziishonontekigua zĩ pyolia, nulutondo lwa kusaama kumuane lwasũgamĩlaa.

⁷ Nĩsinkile ulugu nauuza, umusĩnzo naumalĩĩlagiaa, uusuĩĩli naukendegeelaa.

⁸ Naishaagile numuĩĩkĩlĩgue ngala ya kulukuuluu, ĩniasio ũShekulu mulamuli nwa kulukuuluu nukimpeela paLutondo luasio; kangĩ sika uneene dũũ, ĩpa nĩaasio gaa naauloogilue uwigyeleli waakue.

Mpola za kĩPaulo nuwĩlagi

⁹ Ĩkamatĩkie ukaaae kwiiiza kumuane.

¹⁰ Kuitĩ uDeema wandekile, nuuloogua uunkũmbigyulu wa nzuauu, nuenda kuTesaloniki; uKeleske wendile kuGalatia, ũTito wendile kuDalimatia.

¹¹ uLuka wing'ene dũũ kwĩensi nineene umusole uMaliko, umuleete muĩzanie; kuitĩ ukĩntumĩlaa iiza dũũ.

¹² uTikiko alĩ namutualaa nuEfeso.

¹³ uMunkũmbĩ naalĩ nuulekile kwa kĩKalipo kuTiloa, pĩna ũjile, uleeteelie, niitabũ gaa, nangũlũ iyaasio iya mĩkunza.

¹⁴ uAlekizando, mutiana-yuuma, aluntendĩĩle ubĩĩ wingĩ; ũShekulu ukakumushookeelia kwilika lya utendi waakue.

¹⁵ Ninduue wĩsukuke nunuasio, kuitĩ alĩ wazipĩngaa dũũ inkaani zĩĩtu.

¹⁶ Pĩna alĩ nĩkĩkuĩla nkua ya muandio, ukutilĩ naalĩ wĩĩmĩkile paluandĩ luane, ĩpa tũlũ ensi naandeka; alekikosigua kuutimu uu.

¹⁷ Ĩpa itĩ ũShekulu nuĩmĩka paluandĩ luane, numpeela ingũlũ kwitanantia uLukaani kuukamatĩkũ, indugu nazĩngĩ alũigie. Itĩ yoi nangũnua kwipũna mumulomo wa nsimba.

¹⁸ ũShekulu ukindeegia kwipũna muubĩĩ wensi nukwingũna kuutemi waakue wa kwigyulu. Kumuakue wĩĩ ukulu ĩkalĩ nakalĩ. Amini.

¹⁹ Namukĩlia uPilisika nuAkila, nĩa munumba ya kĩOnesifolo.

²⁰ uElasito wĩĩmile kuKolinto. UTilofimo namulekile kuMileto, muluĩle.

²¹ Ĩkamatĩkie kwiiiza pĩna mikaalĩ matũngo ma mbula. uEubũlo ukulamukilie, nuPũũde, nuLiinosi, nuKilaudia, nĩanũna tũlũ ensi.

²² ũShekulu wĩĩ palumuĩ nĩnkolo yaako. uUkende wĩĩ niniinie.